موٙرفیمو-ە
بەشەی دوەمە
نویستەی: #ناجح گوڵپی#
ئاقیبەت ماچو مورفیم یام فوٙنیمو (ە) ئەرکیٛ موٙرفیمو گیٛڵای و ئەرەتاشای مەوینوٙ، پاسە بوٙ موٙرفیمێوی فرە بەردارەن جە واتسازینە، شوٙنیەرە ئەرکیٛوی تەمام مەوینو پیٛسەو فوٙنیمێو دلیٛو واتیٛنە، چون ماناو واتیٛ مەواڕوٙنە، پەوکای مەشوٙ حەسابش پەی بکەری، پاسە نەزانی کە گولانەن-گولالەن، وەلێم متاوو بواچو فرەتەرین ئەرک و هەرمان مەپوٙڕنوٙنە، ئی موٙرفیمە مەشوٙ کاتو نویستەینە حەسابش پیٛسەو ویٛش پەی بکەری، نەک ئیسە بڕێ هامڕێ هەنیٛ کولەکیٛ تەڕەنە ئی موٙرفیمیە نمەنویسانیٛ، بەنامیٛ ئانەیەوە بگیٛڵمیٛوە پەی خەتی ئەسڵی زوانو گورانی، منیچ پیٛخامم ئانەن کە چا دەورو زەمانەن هەکە بە گورانی نویسیان، زانشتو دەنگسازی، دەنگئەشناسای و واتسازی نەبیەن، ئی زانشتیٛ نەئیزیێبیٛنیٛوە تا نیمەو سەدەو نوزدەی، پەوکەتی ڕانویس یام دەنگیٛ و نوسییٛ زوانەکەی یاگیٛ ویٛشا نەگیٛرتیٛبییٛنە، تەنیا ئا کاتە دەنگیٛ و نویسیٛ عەرەبییٛ بییٛنیٛ کەلکشا چەنە هوٙرگیریان، نازانشتین ئیسە نویسیٛ هەزار ساڵا چیٛوەڵی بەکارباری پەی نویستەی بە بەهانیٛ گیٛڵایۆ پەی رەسەنی یام نمەبوٙ بە ئەلف و بیٛ فڵانە زوانی بنویسمیٛ. هەر ڕانویسێ بگیٛری ئیسە بیەن بە ملکو خەڵکی، سودش چەنە هوٙرمەگیٛروٙ. ڕانویسی و ئاردەینە، ئەرەنیای ئەلفو بیٛ زوانی هەرمانەو زوانئەشناسینە، بەتایبەت دەنگئەشناس و دەنگساز، متاومیٛ جە بەڵەداو زوانی کەلک بگیٛرمیٛ و ڕانمایما بکەرانیٛ پەی نویستەی، نەک بە حەزو ئارەزوو ویٛما.[1]