ئەرەنیشەو یانەو مامۊسا بېسارانی
یەرەشەمە ڕۊدیارو (17-01-2025ز.) ئەرەنیشتەی هەفتانەو یانەو مامۊسا بېسارانی (سنەی) بە بەشداری بڕېو دڵسۊزێ فەرهەنگوو هۆرامانی و ئەندامې و دەسەو ڕاوەبەرا، لوا ڕاوە.
کاکە د.موکەررەم غەفاری پېسەو ڕاوەبەرو دەسەو ڕاوەبەراو یانەو مامۊسا بېسارانی، چەنی شرۆویوی سەرو هەرماناو یانەو مامۊسا بېسارانی، جە هەرمانێ و تەقالاکا کاکە ڕەحیم غۆڵام وەیسی کە چن ساڵې ئەرک و زەحمەتوو وەرپەرسی یانەو مامۊسا بېسارانی سەرو شانەیشەو بېیەن، دەس وەشیش کەرد و ئاماژەش کەرد؛ دڵسۊزی و  هەرمانێ کاکە ڕەحیمی  پەی خزمەت بە فەرهەنگوو هۆرامانی جە یانەو مامۊسا بېسارانینە، یاگې دەس وەشانە و پەنەزانایەنێ و هەر پی بۊنۆ بە زوانو گرڎو ئەنداماو یانەو مامۊسا بېسارانیوە، دەس وەشی تاییبەتتش  پەنە ماچمې و قەدرزانوو زەحمەتەکاش هەنمێ. هەرپاسە ئاواتە وازێنمێ کاکە د.سلمان خوڎامرادی بە هاز و ویری تازە جە ڕاو خزمەت بە فەرهەنگ و زوانی هۆرامی، سەرکۆتە بۊ و بتاوۊ بە  هەرمانەی ئەواوجەمی و یاردی گرڎو ئەندامە ئازیزەکا ، جموجوڵی فەرهەنگی یانەو مامۊسا بېسارانی فرەتەر کەرونە.
د.غەفاری چەنی باس سەرو ئا لێژنا کە پەنەوازێنێ، هەرمانەی تابەتەشا چەنە کریۆ، بە ئاماژە بە گرینگیشا، دەس نیشانش کەرڎې و بە دەنگو ئەنداماو ئەرەنیشتەی، وەرپەرسې  پەی لێژنەکا هۊرچنیەی.
درېژەو ئەرەنیشتەکەینە، د.سەلمان خوڎامورادی پېسەو وەرپەرسی تازەو  یانەو مامۊسا بېسارانی، دماو قەدرزانی و پەنەزانایی وېش، پەی ئەرەپەرمای و بەخشای ئی ئەرکیە جە لایەنو ئەنداماو یانەو مامۊسا بېسارانیوە بە ئاڎی، جە کاکە ڕەحیم غۆڵام وەیسی پەی زەحمەتانێوی فرەی کە جە ماوەو زیاتەر جە دە ساڵانە پەی یانەو مامۊسا بېسارانی کېشتێنېش، دەس وەشیێوی تاییبەتش کەرد و واتش: ئا زەحمەتێ ئاغەی غۆڵام وەیسی چی چن ساڵانە کېشتێنێ کەس نمەتاو نکۊڵیشا چەنە کەرۊ و گرڎیما پسەو یانەو مامۊسا بېسارانی، وېما قەدرزانوو زەحمەتەکاش مزانمې و ئاواتەوازێنمێ لەش ساقی و سەربەرزی فرەتەر، ئاژینو ژیوایش بۊ.
د.خوڎامورادی ، درېژەو قسەکاشەنە، جە دەس پەنەکەرڎەو وەرزیوی تازەی جە یانەو مامۊسا بېسارانینە قسېش کەرڎې و ئی جۊرە واڕوگۆڕیایە ، پەنەوازو گرڎو ئەنجومەنە فەرهەنگیەکاش زانا. به کوڵە باسێو سەرو ڕسالەتو بییەی یانەو مامۊسا بېسارانی و وەرچەمو دماڕۆو ئی ئەرەمەرزیایە، ئاماژەش کەرد؛ مەرام و وەرپێکوو یانەو مامۊسا بېسارانی، گەشە و پارېزناو فەرهەنگ و ئەدەبی هۆرامین , هەر پی بۊنۆ بەرنامې یانەو مامۊسا بېسارانی مشۊم دەورو ئی نیاز و مەرامیە چنیا و مەرزیارە.
دماو قسە کەرڎەو چن نەفەراتەر جە بەشدارە ئازیزەکا سەرو ئی ڕۆتیە، پېسەو کاکە بەختیار لۆتفی، کاکە ناسر فەتاحی و دادە کەژال بیگلەری و چن کەسایەتیێ تەرێ، ئی ئازیزێ پەی وەرپەرسی و هەرمانە دلېو لێژنەکا، هۊرچنیەی:
یاگەگیروو ڕاوەبەرو دەسەو ڕاوەبەرا (نایب ڕئیس هیئت مدیرە): دادە هوما ڕەشیدی
بازڕەسێ:  دادە سارا ڕەسووڵ ئابادی-کاکە خوڎاکەرەم سوبحانی.
دەبیرو یانەو مامۊسا بېسارانی: کاکە وەلی کاکایی
پەیوەندی گرڎین (ڕوابط عمومی): دادە فەرانەک جەمشیدی -کاکە موکەررەم غەفاری.
وەرپەرسۊ ماڵی و دارایی: کاکە فەرهاد سەعیدی
لێژنەو هۊرچەرخنای (کمیتە  تدارکات): کاکە هووشەنگ نادری -کاکە کوسار موحەممەدی
لێژنەو فەرهەنگی و ئەدەبی: کاکە م.دلېر ئەداک
لێژنەو زاڕوڵا: دادە کەژاڵ بیگلەری.
لێژنەو دەسوەشانە و تەجلیلی: کاکە حامد حێسامی- کاکە وەلی کاکایی- کاکە هاشم حێسامی.
لێژنەو ژەنا: دادە چنوور شەفیعی- دادە شۆعلە بەیانی
پېشکەش کاری و ئەرەمەرزنای : کاکە نایب منبەری
بڕیار دریا، کۊ دەسەو ڕاوەبەرا، پېسەو ئەدمینی چەمیارێ تاقمە و کاناڵەی تلگرامی  یانەو مامۊسا بېسارانی  بانێ.[1]