ئەو کەسانەی کارتی ئەلیکترۆنی دەفرۆشن دەڵێن، یاریی ئەلیکترۆنیی پەبجی لە هەرێمی کوردستان ژمارەیەکی زۆر بەکارهێنەری هەیە، ئەمەش وایکرووە فرۆشی یوسی کە ڕێگایەکە بۆ کڕینی چەک و جلوبەرگ و ئۆتۆمبێل و بەرزکردنەوەی ئاستی یاری پەبجی بەکاردێت، خواستێکی زۆری لەسەر بێت.
یاریی ئەلیکترۆنی پەبجی (PUBG) کە کورتکراوەی (Player Unknown's Battlegrounds) یارییەکی ئەلیکترۆنییە و لە ڕێگەی ئۆنلاینەوە دەکرێت.
ئەم یارییە بۆ یەکەمجار لە 23ی ئاداری 2017 دەرکەوت، بەڵام زۆر بە خێرایی بە جیهاندا بڵاوبووەوە، ئێستا ئەم یارییە یەکێکە لە بەربڵاوترین یارییە ئەلکترۆنییەکان، ئەپەکانی لەسەر مۆبایلە زیرەکەکان لە هەردوو سیستەمی ئەندرۆید و ئای ئۆ ئێس بەردەستە.
یارییەکە وەرزییە و هەردوو مانگ جارێک نوێ دەبێتەوە، لەگەڵ نوێبوونەوەش بۆ ڕاکێشانی سەرنجی بەکارهێنەرانی، چەک و جلوبەرگ و ئۆتۆمبێلی تازە زیاددەبێت، بۆ کڕینی چەک و جلوبەرگ و ئۆتۆمبێل و بەرزکردنەوەی ئاستی ئارپیی یاریی پەبجی پێویستیی بە یەکەیەکە کە پێیدەگوترێت یوسی، دەتواندرێت لە ڕێگەی کارتی مۆبایل و کارتە ئەلیکترۆنییەکان بەدەست بهێنرێت.
نیاز ئەحمەد ئیسماعیل، خاوەنی نووسینگەی نیاز بۆ فرۆشتنی کارتی ئەلیکترۆنی لە بازاڕی کۆتری سەلام لە شاری #هەولێر#، کە جوملەفرۆشێکی یوسیی کارتی پەبجییە، دەڵێت: بەهۆی کڕینی یوسی بۆ یاریی پەبجی فرۆشی سیمکارتی ئاسیا و زین یەکجار زۆر بووە. بۆ نموونە لەو بێ بازاڕییە تەنیا ئێمە ڕۆژانە 7 تاوەکو 10 هەزار سیمکارتی ئاسیا دەفرۆشینە تاکفرۆشەکان ئەوانیش بە ڕێگەی تایبەت لە ڕێگەی ناردنی نامە بۆ کۆمپانیا ئەو کارتەی تێدایە دەیکەن بە یوسی بە خەڵکی دەفرۆشن و جارێکی دیکە سیمکارتەکە بە ئێمە دەفرۆشنەوە، لەم کڕین و فرۆشتنەوەش نزیکەی 1000 دینار لە هەر سیمکارتێک قازانج دەکەن.
سەرجەم ئەو سیمکارتانەی کەسانی وەکو نیاز دەیفرۆشن بۆ دەرهێنانی یوسی بەکاردێت. نیاز دەڵێت: ڕۆژانە تەنیا ئێمە بایی 20 تاوەکو 30 ملیۆن دینار سیمکارت بۆ یوسی دەفرۆشین، ئەمە لە کاتێکدایە ئێستا بەهۆی بێکاری و دواکەوتنی مووچە بازاڕ لاواز بووە دەنا پێشتر ڕۆژانە بایی 50 تاوەکو 60 ملیۆن دینارمان دەفرۆشت.
نیاز ئەحمەد، گوتی: جوملەفرۆشێکی زۆر لە پارێزگای هەولێر و شارەکانی دیکەی کوردستان کارتی ئەلیکترۆنیی گووگڵ پلەی و ئایتونس و سیمکارتی ئاسیا و زین بۆ یوسی دەفرۆشن، بۆیە پێشبینی دەکەم مانگانە نزیکەی بایی ملیۆنێک و 500 هەزار دۆلار یوسی لە هەرێمی کوردستان بفرۆشرێت.
لە پارێزگاکانی عێراق ئەو جۆرە سیمکارتانەی ئاسیا کە لە بازاڕ بە علوج دەناسرێن نییە، بۆیە پێشتر جوملەفرۆشەکانی هەولێر بەشێوەی کۆ ئەو جۆرە سیمکارتانەیان بۆ شارەکانی عێراق دەنارد، لەوێش بۆ یوسی پەبجی بەکاردەهات.
نیاز ئەحمەد، دەڵێت: پێشتر فرۆشمان سێ بەرامبەری ئێستا بوو، چونکە بەشێوەی جوملە سیمکارتمان بۆ یوسی هەناردەی شارەکانی عێراق دەکرد، بەڵام ئێستا بەهۆی کۆرۆنا هاتووچۆی نێوان شارەکانی هەرێمی کوردستان و عێراق نییە، بۆیە بازاڕمان لاواز بووە.
بەگوێرەی زانیاری کارتفرۆشەکان لە سیمکارتێکی ئاسیا ئەگەر 5,500 دینار باڵانسی تێدابێت 271 یوسی دەردەهێنرێت، لەو سیمکارتانەش کە 3.500 دینار باڵانسیان تێدایە 150 یوسی دەردەهێندرێت، بۆ بەرزکردنەوەی ئەکاونتێکی یاری پەبجی لە ئاسایی بۆ گۆڵد 600 یوسی پێویستە، بۆیە فرۆشی یوسی لە 600 یەکەوە دەست پێدەکات، بۆ نموونە ئێستا لە بازاڕی هەولێر بە نرخی تاک 600 یوسی بە 12 هەزار دینارە. 813 یوسی بە 15 هەزار دینارە، 1355 یوسی بە 25 هەزارە، 2439 یوسی بە 42 هەزارە، 5149 یوسی بە 85 هەزار دینارە، 10298 یوسی بە 165 هەزار دینارە، بەم شێوەیە تا ژمارەی یەکەکانی یوسی بەرزتربێت نرخەکەشی هەڵدەکشێت.
محەممەد تەها، کە کارتفرۆشێکی یوسیی یاریی پەبجییە لە بازاڕی کۆتری سەلام لە هەولێر، بەشێوەی ئۆنلاین و ڕاستەخۆ یوسی دەفرۆشێت، دەڵێت: هەر کەسێک کە ئەکاونتێکی پەبجی دابنێت، ناتوانێت جلوبەرگ و چەکی تایبەت بە دەست بهێنێت تاوەکو ئارپییەکەی بۆ گۆڵد بەرز نەکاتەوە کە 600 یوسی پێویستە، کاتێکیش کەسەکە چووە ناو یارییەکە و ئاڵوودە بوو، بیر لەوەدەکاتەوە هاوشێوەی هاوڕێکانی چەک و جلوبەرگ و پەرەشوت و ئۆتۆمبێلی بە ڕەنگی تایبەت هەبێت. نرخی ئەوانەش تێچووی زۆرە بۆ نموونە جلوبەرگ هەیە بە 500 دۆلارە.
بە گوتەی محەممەد تەها، ئەوانەی ئەو یارییە دەکەن، زۆر بە خێرایی ئاڵوودەی یارییەکە دەبن و ناتوانن دەستبەرداری ببن. محەممەد تەها دەڵێت: هەژار و دەوڵەمەند ئاڵوودەی یاریی پەبجی بوون، گەنجی واهەیە تا ئێوارە کرێکاری دەکات ئێوارە بەر لەوەی بچێتەوە ماڵەوە دێت پارەکەی بە یوسی دەدات، کەسی واش هەیە گوێی لە پارە نییە بە جارێک بایی ملیۆنیک تا 5 ملیۆن دینار یوسی دەکڕێت، بۆ نموونە کڕیارێکم هەیە، تاوەکو ئێستا بایی 18 هەزار دۆلار یوسی کڕیوە، ئێستا ئەکاونتەکەی لای من داناوە بۆ فرۆشتن و داوای 10 هەزار دۆلار دەکات، بەڵام لەبەر ئەوەی تووشی شۆک نەبێت پێمنەگوتووە لەو بازاڕە ئەکاونتەکەت لە 1.500 تاوەکو 2000 دۆلار زیاتر ناکات.
محەممەد تەها زیاتر لەبارەی ئاڵوودەبوونی گەنجان بە یاریی پەبجی قسە دەکات و دەڵێت: ئاڵودە بوون بە یاریی پەبجی لە ئاڵوودە بوون بە ماددەی هۆشبەر خراپترە، کەسی واهەیە شەو تا بەیانی ناخەوێت یاری بە گرووپ دەکات، بۆیە کەسانێک تەنیا بۆ نمایش ئامادەن زۆرترین پارە بە کڕینی یوسی بدەن، تەنیا بۆ ئەوەی لە یارییەکان جوان دەرکەون. بۆ نموونە کەسی وا هەیە 20 تاوەکو 30 چەکی نایابی هەیە هەموو کردووە بە ماکس کە تێچووی هەر چەکێک نزیکەی 500 تاوەکو 700 دۆلارە، ئەمە بێجگە لە دەیان جلوبەرگی جیاواز کە نرخی هەریەکەیان لە 500 دۆلار کەمتر نییە.
ڤایرۆسی کۆرۆنا کاریگەری لەسەر ئەو یارییەش هەبووە، ئێستا یاریزانانی پەبجی کەمتر یوسی دەکڕن.
محەممەد دەڵێت: گەنج هەیە پێشتر بایی 60 هەزار دۆلار یوسی لە ئەکاونتەکەیدا هەبووە، ئەوانە پێشتر قازانجێکی زۆریان بۆ ئێمە هەبوو، بەڵام ئێستا بازاڕ لاواز بووە، ڕۆژانە بایی 500 تاوەکو 600 دۆلار یوسی دەفرۆشین.
هاوشێوەی پەیج و ئەکاونتەکان، لە هەرێمی کوردستان کڕین و فرۆشتن بە ئەکاونتی یاری پەبجیش دەکرێت.
عومەر حەمید کە ماوەی ساڵێکە کڕین و فرۆشتنی یوسی و ئەکاونتی یاری پەبجی دەکات، دەڵێت: نرخی ئەکاونتی پەبجی بەگوێرەی بەرزی ئارپی و ئەو چەک و جلوبەرگانەی تێیدایە دەگۆڕێت، نرخی ئەکاونتەکان لە نێوان دوو تاوەکو حەوت هەزار دۆلارە.
ئەم یارییە قازانجیشی هەیە، بە تایبەتی ئەگەر کەسەکە یاریزانێکی لێهاتوو بێت. عومەر دەڵێت: ئەم یارییە وەک قومار وایە، هەندێک شت هەیە بە پارە دەکڕدرێت هەندێک شتیش دیارییە، دیارییەکەش وەک قومار وایە. پارە دەدەی ئەگەری دەرچوونی دیارییەکە 0.5%ە، جاری وا هەیە بە پارەیەکی کەم دەردەچێت، جاری واش هەیە پارەیەکی زۆرت دەڕوات، هیچت بۆ دەرناچێت.
هەندی لە یاریزانە لێهاتووەکانی پەبجی لە فەیسبووک پەیجی تایبەت بە ئەکاونتەکانیان دادەنێن و یارییەکان بەشێوەی لایڤ بڵاودەکەنەوە خەڵکێکی زۆر بینەریانە و ئەستێرەیان بۆ دەنێرێت، لەو ڕێگەیەوە پارەیان دەست دەکەوێت، دوای ئەوەی پەیجەکەشیان ژمارەی لایکی زۆر بوو و لایڤەکانیان 20 هەزار تەماشاکەری تێپەڕاند، بە پارە ڕیکلامی تێدا دەکەن.
عومەر حەمید، دەڵێت: لەلایڤیک بەشدار بووم 94 هەزار ئەستێرەی بۆهات. ئەو کەسانەشی کە بینەری لایڤەکە بوون لە خۆشی بینینی یارییەکە نزیکەی 800 دۆلاریان خستە سەر حیساب بانکییەکەی یاریزانەکە، من داوام کرد ڕیکلام بۆ کارەکەم بکات داوای 2000 دۆلاری کرد.
بەهۆی ئەو خواستەی لەسەر یوسی دروست بووە ژمارەیەک لە کۆمپانیاکان کاری سەرەکیان کردووە بە هاوردنی ئەو کارتانەی بۆ یوسی بەکاردێت، کارتەکانیش لە ئەمەریکا هاوردەی ئیمارات دەکرێن و لەوێشەوە بۆ هەرێمی کوردستان.
لە هەرێمی کوردستان هیچ بریکارێک بۆ ئەو کارتانە نییە، بۆیە هەموو کۆمپانیا و بازرگانێک دەتوانێت بازرگانی بەو کارتە ئەلیکترۆنیانە بکات.
ئیدریس نەوزاد سارمەمی، بەڕێوەبەری فرۆشتنی بەشی کارتی ئەلیکترۆنی لە کۆمپانیای دەلتا، دەڵێت: لە بەغدا چەند کۆمپانیایەکی تایبەت بە فرۆشتنی ئەم جۆرە کارتانە هەیە، ئێمە زیاتر لەهەرێمی کوردستان و شارەکانی ناوەراست فرۆشمان هەیە، پێشتر مانگانە بایی ملیۆنێک و 800 هەزار دۆلار کارتمان دەفرۆشت لەم بڕە نزیکەی 400 تاوەکو 500 هەزار دۆلار فرۆشمان لە هەرێمی کوردستان هەبوو ئەوەی دیکە لە عێراق دەفرۆشرا، بەڵام ئێستا بەهۆی کۆرۆنا و قەیرانی دارایی مانگانە بایی 500 هەزار دۆلار کارت لە هەرێمی کوردستان و عێراق دەفرۆشین.
ئیدریس سارمەمی، گوتیشی: ئێمە نازانین فرۆشی یوسی لە ڕێگەی کارتی ئاسیا و زەین چەندە، بەڵام بەپێی بەدواداچوون بۆمان دەرکەوتووە مانگانە لەهەرێمی کوردستان تەنیا بۆ بەکارهێنانی یوسی بایی زیاتر لە ملیۆنێک دۆلار کارتی Google play و iTunes و هەندێک جۆر کارتی دیکە دەفرۆشرێت.[1]