سکرتێرە 41

وەزیری ئاوەدان کردنەوەی گۆتی : کورە خوای دەکرد دەبووە جهەننەم، ئەمن پرسیاری چی لێدەکەم و ئەو چم وەرام دەداتەوە ! گۆتم : ئێ کاکە هەر ئەوەندەی لەکنەمنگۆ، خۆ ناچم بەکەیفی خۆم سیناریۆت لۆ داڕێژم..!
سەرۆک وەزیران لەو سەری مێزەکەی لەسەر کورسیەکەی دانیشت و ئەمەش هەر کەسەو لە جێی خۆمان دانیشتین، هەمووی هەناوی ڕژابوو، ڕوحیان هاتبووە سەر کوونە کەپوویان، چاوەڕێ بوون سەرۆک وەزیران بیتەقێنتەوە ! لۆیێ قوڕگیان هیشک ببوو، سەرۆک وەزیران فایلەکەی پێشە خۆی کردەوەو هەندەک هەرگێڕو وەرگێڕی کرد، پاشان ڕووی لە جاحێرەکی کرد، کە لەنێزیکی سەرۆک وەزیرانی ڕاوەستابوو، گۆتی : بڕۆ ئەو سیدیەم لۆبینە، ئەوی لەسەر مێزەکەی منە ! ئەویش گۆتی : بەسەرچاو گەورەم، جەماعەت هەمووی زەندەقیان چوو، مردن بەپارە بایە دەیانکڕی، هەموو پەنجەیان بەمێزی دادەهیناو دەلەرزین، هەندەکیان سۆر هەرگەڕان و ئارەقەیان کرد..! جاحێرەکە هات و سیدیەکەی دا دەست سەرۆک وەزیرانی و ئەویش وەریگرت، بەینەکی تەماشا سیدیەکەی کردو سەرەکی باداو هاویشتیە ناو فایلەکەی..! ئەوجە دەستی بەقسان کردو گۆتی : دەوجە لۆم باس کەن بزانم ئەو خولەی لە لوبنان دیتتان کووبوو ؟ هەمووی قوڕگی هیشک ببوو، کەس نووققەی لێوە نەهات ! تەماشایەکی منی کردو گۆتی : ئەتوو کووی تێگەیشتی ؟ گۆتم : خولەکەی دەرێی ؟ گۆتی : بەرێ ! گۆتم : وەڵلاهی بەس خول نەبوو، حەیفە ئەو پارە نازدارە بەو شتانە سەرف دەکرێ، ئەمن بەخۆم هیچ سوودم لێ نەبینی، ئەگەر برادەرانیش سوودیان لێ دیتیە دەکرێ باس بکەن ! گۆتی : پێدەچی برادەران سوودەکی باشیان لێ دیتبی، لۆیێ وەرامت نادنەوە، گۆتی : عەلاکووللین، لۆیێ گازم کردینە هەتا قسە لەسەر بابەتی گرنگ هەیە بیکەین، کە پەیوەندی بەهەموو وەزارەتەکان هەیە ! هەموو سەرمان دەلەقاند بزانین ئەو چشتە چیە !؟ گۆتی : ئەنگۆ دەزانن کۆمەرەک بینای گەورە هەیە لەهەموو وەزارەتەکان، لەجێی ستراتیجی و بازرگانین، ئەمە وەکو حکومەت هیچ سوودیان لێ نابینین، هەموو بەتارن و دەرکەیان پێوە درایە، دەکرێ ئەو بینایانە بدەینە موزایەدەو بیانفرۆشین و لەجێی وان بازاڕو مۆڵی گەورەو هوتێلی بەرز بەرزی گەشتیاری دروست بکەین و دیمەنی شارەکەش جوان ببی..! وەکی سەرۆک وەزیران ئەو قسەی کردو هیچ بەلای بابەتی سیدیەکەی شڕبلی دانەچوو، جەماعەت هێزیان هاتەوە بەرێ هەناسەکی خۆشیان هەرمژی، هەموو تەماشا ئێکدیان داکردو ڕوویان کراوە، وەزیر شارەوانی قسەی کردو گۆتی : گەورەم، جەنابی سەرۆک وەزیران، ئەگەر پێت باشبی ئەمن لیستەکی ئامادە دەکەم بەناوی ئەو جێیانەی سەر بە وەزارەتی منەو با هەر وەزیرەکیش لەڕاستەخۆی بیکا، ئەوجە پێشکێشی جەنابتی دەکەین و دەکرێ بڕیارەکی لەسەر بدەی، وەزیرەکان گۆتیان : ئەمەش ئامادەینەو چشتەکی زۆر باشە، ئەدی ئەو بینایە کەونانە لۆ بمینێن..! ئەمن دەستم برند کرد، سەرۆک وەزیران گۆتی : فەرموو..! گۆتم : ئەمن ڕایەکی پێچەوانەم هەیە، ئەو بینایانە موڵکی دەوڵەتن و هەق نیە دەستکاری بکرێن و بکڕدرێن و بفرۆشرێن، سبەینێ ئەو حکومەتە دەڕواو ئێکیدی دی، لەوانەیە ئەو سوودی لێببینی، گوناحە بفرۆشێ و بدرێتە کابرایەکی لەوگۆڕەی بێ بینایەکی لەسەر قیت کاتەوەو خێرو بێری بخوا، بەڕاستی ئەوە غەدرەکی گەورەیە لە حکومەت و دەوڵەت و هاوڵاتی دەکرێ..! سەرۆک وەزیران ڕەنگی تێکچوو، مشەوەش بوو، گۆتی : حکومەتی لۆ دەڕواو ئێکیدی دێ، ئەمە ناڕۆین هەر دەمینێین، هاتینە هەتا بمینێینەوە، ئەمە نەمینێین کەس نامینێ، گۆتم : قوربان وەختی خۆی سەددام حوسێنیش وەیدەگۆ، هەونکە کەس نازانی قەبری لەکێیە..! وەزیری ئاوقاف گۆتی : گەورەم ئەتوو دری خۆت لۆ تەنگ دەکەی، بیدە دەنگدان و خلاس و بڕاوە..! سەرۆک وەزیران گۆتی : ئەوە بیرۆکەکی باشە، یاڵلا کێ لەگەرە بفرۆشێ ! جەماعەت هەمووی تێکڕا دەستیان برند کردو گۆتیان ئەمە لەگەرین، بەتاقی تەنێ بەس ئەمن دەنگم نەداو دژی ئەو بڕیارەی بووم..!
سەرۆک وەزیران کە دیتی هەموو دەنگیان دا، زۆر دری خۆشبوو، پشتی بەکورسیەکەی داو بە زەردەخەنەوە تەماشا منی کرد، گۆتم : بڕوا بکەن ئەو خراپترین بڕیارە دەیدەین، کاکە شتی وا مەکەن و موڵکی دەوڵەت مەفرۆشن، تاوانە ئەو وراتە هەڕاج بکرێ لۆ بەرژەوەندی چەند کەسەکی.! وەزیرەکان هەموو خۆیان لەمن گیڤ کردەوەو بە چاو قووچاندن لێو کرۆژتنی ئیشارەتیان دەدامێ کەوا بێدەنگ بم و واز لەو بابەتەی بینم..!
سەرۆک وەزیران فایلەکەی پێشە خۆی هەرگرت و گۆتی : دانیشتنەکەمان تەواو، دەکرێ بڕۆنەوە وەزارەتەکەی خۆتان ! ئەمە هەستاین و خواحافیزیمان کردو هاتینە دەرێ، وەزیری شارەوانی هاتە تەنیشتە من و گۆتی : ئەرێ ئەو بەزمە چبوو دروستت کرد ؟ گۆتم : بەشەرەفت ئەوە بڕیار بوو داتان ؟ گۆتی : کورە بابە خۆ بەدەستەمە نیە، سەرۆک وەزیران بڕیاری دایەو تەواو، گۆتم : مەعقولە موڵکی دەورەتی بدرێتە موزایەدەو هەڕاج بکرێ ! گۆتی : کورە موزایەدەی چ و حاری چ هەی فەقیر حار، ئەوە هەمووی کلاواتە، سبەینێ بە کلاوات دەدرێتە موزایەدەو کەس ناوێری بێتە موزایەدەکەش، هەر هەمووی سەرۆک وەزیران کوڕو برایەکانی و خزم و کەسی بە نرخەکی زۆر هەرزان هەریدەگرنەوە، لەوانەیە مەتری بە دووسەت و پەنجا دیناری بکڕنەوە، لەکاتەکی هەندە جێ مەتری سی وەرەقەی دەکا..!

گۆتمه وەزیری شارەوانی : بەخوای قسەکەت تەواوه بەران هیچ ناکرێ، چونکه ئەو میللەته نققەی لێوه نایێ، گۆتی : چاوەکەم ئەو قسانەی کردم نەگێڕیەوه، وەڵلا وه بیللا بەس بزاندرێ قسەم کردیه به عێل و عەشیرەتەوه بن بزر دەکرێم. گۆتم : مەترسێ قسان ناکه م..! گه یشتینه لای گەراجی و خواحافیزیمان لێکدی کردو سواری تڕومبێلی بووم و بەڕێکەتین بەرەو وەزاره تی.. جەعۆ گۆتی : گدۆ ئەوڕۆ دەعوەتی منی، گۆتم نانت ناخۆم و لێت عادزم ! گۆتی : لەمن عادزی ؟ گۆتم : بەرێ، ئەوه قه ت عەیبت نەکرد ئەو بەزمەت به مام عەوڵای کرد، کێڕان خۆت گه یانده نەنه خانێی و به نزینت به ئاگری داکرد، گۆتی : توخوا ئەگەر گلەییم لێبکەی، ئاخر ئەوه ئیشه عەوڵا لۆق درێژ کردیتی، ئەمه هێشتا جێی قوونمان گه ڕم نەبووه له وەزارەتی ئه و چوو زێخەی هینا، به ویزدانت زێخه ئیوەی بوو عەوڵا خۆی پێ دادا، دەرێی باگوردانه..! گۆتم : ڕاسته ئیشەکی قۆڕی کردیه بەران غەرەت بەغەرەتی چاناکرێ..! گۆتی : ئەگەر درت هێشایه ئەوه داوای لێبوردن دەکەم و تەئکیدبه جارەکیدی دووباره نابتەوه..! گۆتم : زۆر باشه، بەران دەبی بچی داوای لێبوردن له مام عەوڵای بکەی چونکه زۆر پڕه لێت، ئەمن نەبامایه شەڕه قۆچەکی هەر لەگەر دەکردی، گۆتی : وەی بەچاوان، هەرئێستا بگه ینەوه وەزارتی داوای لێبوردنی لێدەکەم، گۆتم : زۆر باشه، ئه دی لۆ دەعوەتم دەکەی، خێره ؟ گۆتی : وەڵلا بەبەغایەکانم فرۆشت ! گۆتم : کوره دەوس..! گۆتی : زێخه م بمری، گۆتم : لەکێ فرۆشتت ؟ گۆتی : لێره، لە ئەنجومەنی وەزیران، هەتا ئەتوو کۆبونوەت تەواو کرد، ئەمن هەردووکم فرۆشت، گۆتم : فرۆشتته کێ ؟ گۆتی : سەرۆکی دیوانی ئەنجومەنی وەزیرانی، ئەدی جارێدی پێم نەگۆتی ئەویش پێڕی خۆمانه و کۆتربازه..! گۆتم : بەچەندت دایێ ؟ گۆتی : باش بوو، چەوراتیەکی تێدابوو، گۆتم : بەڕاست بەڕاست بەچەندت دایێ ؟ گۆتی : وەڵلا هەردووکی به بیست و یه ک وەرەقەی ! گۆتم : زۆر نیه ؟ گۆتی : لۆوی زۆر نیه، خۆ ئەو ئارەقه ی پێنەکردیه، تەئکیدبه وەسلەکی پێدەکاو پارەکەی وەردەگریتەوه، گۆتم : ئێ باشە کوو جێی دەکاتەوه، خۆ نانووسی بەبەغام کڕیه ! گۆتی : کوره دەنووسی ئالیکم کڕیه، ئەدی ئەوێ سارێ نەیاننووسیبوو بایی چارسەت پێنجسەت ملیۆنی ئالیکمان کڕیه لۆ ئەنجومەنی وەزیران، ئەوەش ئەوها تەرتیب دەکا..!
گه یشتینەوه وەزارەت، دیتم مام عەوڵا هاتتەوه دەوامێ، گۆتم : ئەوه لۆ هاتیەوه، ئەدی ئەمن ئەتووم ئیزن نەدابوو ؟ گۆتی : ئوستاج بڕوابکه درم نەهات بەتەنێ ئەو وەزارەتەی لەسەر سەری توو بەجێبێلم، گۆتم هەونکه بێی من ئوستاج ئیشی لەبەر ناڕوا بابچم فریای کەوم..! گۆتم : پێویست بەو کلاواتانه ناکا برێ لەبەر زێخەی هاتیمەوه و تەواو، پێکەنی و گۆتی : ئەتوو ئیللا دەبی لەبنی کودی بده ی، چوومه ژۆرێ دیتم مەغدید وا له پرسگەی دانیشتیه و چاوەڕێم دەکا، سه لامم کردو له بەرم قیت بۆوه و بەگەرمی وەرامی دامەوه، یەکسەر چوومه ژۆرەکه ی خۆم، مام عەوڵا هات و گۆتی : ئەو کابرایه لەمێژه چاوەڕێت دەکا، بێته ژۆرێ ؟ گۆتم : بابێ بزانم جەعۆ کوو لەگەری پێکهاتیه، کابرا هاته ژۆرێ و سەلامی کردو دانیشت، بەخێراتنم کردو ئەخباری خێزانیم پرسی، گۆتی : وەڵلا باشه، وەلەو ئەوشۆ نەیهێشتیه ئەمن بنووم، هه تا سبەینێ له خه وێ تڕومبێلی دەهاژووشت و خۆی به دارو دیواری دادەدا..! گۆتم : ئەلحەمدولیللا سەلامەت بوو، ئین شاڵلا بەرایەکی گەورەی گێڕایتەوه، گۆتی : وەڵلا مەمنونم و ئەوه لەسەر قسەی کاک جەفعەری هاتیمه که گۆتی وەره وەزارەتی، ئەوه سویجی تڕومبێله که م لۆ هینایی و فه ڕموو ! گۆتم : ئەوجه ئەمن چ له سویجی تڕومبێلی بکەم و لۆ لۆمنت هینایه ؟ گۆتی : وەڵلا له سەر قسەی وی هینایتم، ئەو گۆتی : سبه ینێ وەره وەزارەتی و سویجی تڕومبێلەکەی لۆ جەنابی وەزیری بینه و بیدێ، ئەو پارەی تڕومبێلەکی تازەت دەداتێ و بڕۆ بیکڕه..!

گۆتم : جەعۆ بەتووی گۆ ؟ گۆتی : ئەرێوەڵلا ! گۆتم : ئەتوو بەڕاستیتە ؟ گۆتی : ئەرێ بەگۆڕی بەگیسی داکم ! گۆتم : بابە ئەو سووندانە شەرعی نینە و واز لەگۆڕی بەگیسی داکت بینە، جارێ ڕاوەستە با گازی جەعۆی بکەم، جەڕەسەکم لێداو بەڕێوەبەری نووسینگەکەم هات، گۆتم : برێ جەعفەری هەر ئێستا بگاتە ئێرە..! دیاربوو مەغدید هەستی کرد ئەمن توڕە بوویمە و بەو وەزعەی ڕازی نیمە، لۆیێ بەردەکی فڕێدا ناو گۆمێ و گۆتی : وەڵلا عەزم کرد پێت برێم، بەدۆ لە سبەینێ زوو چوویتە تەواری و داخیل کرایە، پۆلیسیش دۆسیەکی گەورەی لۆ کردتەوەو لەوانە کەشف و تەختیت و شتی وا دەربچی لۆ مەسەلەکەی..! هیچ خۆم تێکنەداو وەرامم نەداوە..!
هەندەی نەبرد جەعۆ هات، گۆتی : فەرموو گەورەم ئەمرکە ! گۆتم : ئەتوو چت بە مەغدیدی گۆتیە ؟ گۆتی : مەغدید کێیە، وەڵلا ئەمن کەس ناناسم بەو ناوەی ! گۆتم : ئەو زەلامەی دەرێم، ئەوەی بەرامبەرت دانیشتیە ! جەعۆ ڕەنگی تێکچوو، گۆتی : ئا ئەوەی دەرێی، ئەوەی ژنەکەی خۆی بەمە داداو خوا ڕەعمی کرد نەیکووشتین ! کابرا شێت بوو، گۆتی : خێزانی من خۆی بەنگۆ دادا ؟ جەعۆ گۆتی : بەرێ بەرێ، کێ دەرێ خێزانت ئینجازەی (ئیجازە - مۆڵەت) هەیە، مەغدید هەندە خۆی برند دەکردو بە عاردی دادەدا، گۆتمە جەعۆی : ڕاست و دروست پێم برێ، ئەتوو بەو پیاوەت گۆتیە، وەرە وەزارەتی سویجی تڕومبێلی بەدیعەی بدە وەزیری و ئەو تڕومبێلەکی تازەت لۆ دەکڕی..!؟ گۆتی : ئەوی ڕاستی بی، ئهههه، وەمگۆتیەو وەمنەگۆتیە ! گۆتم : مەعنای چیە ؟ گۆتی : وەڵلا ڕەنگە ئەو دەمی ئاگام لە خۆ نەبووبی و وەمگۆتبی، بەران شەوێ کەچوومەوە مارێ و لێی ڕاکشام، لەسەر جێی زۆر فکرم لەو ڕووداوەی کردەوە، لۆم وەدەرکەت هیچ خەتای مەی تێدانیەو بەدۆ موخالیف بووە..! مەغدید بەهەر چار پەلان هەردەپەڕی، دوو جاران لۆ جەعۆی چوو، ئەمن نەمهێشت، گۆتم : کاک مەغدید با زۆری لۆ کەمی نەرێین، حەز دەکەی دەچینە مروری و با تەختیت بێ، ئەگەر خەتای من بوو، تڕومبێلەکەت لۆ چا دەکەمەوە، بابە ئەگەر خەتای منیش نەبوو، ئەوە بڕۆ چاکەوە، نیوەی مەسرەفەکەت دەدەمێ، ئەمان ئەگەر ئەتوو بەتەمای ئەوەی بی ئەمن سویجت لێ وەرگرم و تڕومبێلەکی تازەت لۆ بکڕم، ئەوە چشتی وەها قەت ڕوو نادا ! مەغدید قیت بۆوەو گۆتیە جەعۆی : بمری باشترە نەکوو لە قسەی خۆت پەشیمان ببیەوە، باشە ئەتوو دونێ چت بە منگۆ، ئێستا لۆ گێڕت گۆڕیە، جەعۆ حاشای لێکردو هەزار سووندو قورعانی خوارد و گۆتی : ئەمن گووی ئەوهام نەخواردیە..! گۆتم : کاک مەغدید ئەمن قسەی خۆم کردو ئەتووش کەیفی خۆتە ! مەغدید بەتوڕەیی چووە دەرێ و گۆتی : وەڵڵاهی لێتان خۆش نابم و ئەنگۆ غەدر لەمن دەکەم، وەتێنەگەی وەزیری و پێت ناوێرم، وەڵلا وەبیللا لێت خۆش نابم، ئاخر لۆیێ ئەوهامان بەسەر هات و مارمان وێران بوو، هەرچی گەندەو مەندەی دنیایێیە بووە وەزیر، بە گۆڕی بەگیسی داکم سەددام لەنگۆ زۆر باشتربوو..!
گازی جەعۆم کرد، گۆتم : کورە ئەتوو کەنگی دەبیە پیاو، باشە ئەو کێشە چبوو لۆ منت دروست کرد، گۆتی : لۆ مەمنونی خوای نابی لەو وەزعە قۆڕەی قورتارم کردی، وەڵلا وەکی چاوم بەسەرو پرچی مەغدیدی کەت، گۆتم : هەونکە شەش چەقوو تەرعمان دەداتێ، لەباتی چاکەی قەرداریشم کەوە گدۆ..! گۆتم : جارەکیدی خۆ تێکەر ئیشی من نەکەیی و هەقت لە هیچ نەبی، هەونکەش کوو مەغدیدت لەمن هار کردیە، دەبی ئەوها هێوری کەیەوە..!

گۆتی : ئەوجە کوو هێوری کەمەوە، گۆتم : ئەو پارەی لە بەبەغایە سوودانیەکان قازانجت کردیە، بیدێ با تڕومبێلەکەی پێ چاکاتەوە ! گۆتی : وەڵلا تەڕ کاسبیم کرد، ئەمن دەیکەم و بەدۆی ژنی مەغەی دەیخوا، گۆتم : ئەگەر ئەو بەزمەت لەگەر مام عەوڵای نەکردبا تووشی ئەو حارەی نەدەبووی..! گۆتی : ئاخ لەو زمانەی من، وەڵلاهی دەرێم قەرەم بڕەکی بینم و لەبنیڕا بیبڕم، گۆتم : ناوەڵلا مەیبڕە، بەرکو بڕەکی لێبگرەوە..!
لەو قسانە دابووین زەنگی مۆبایلەکەم لێیدا، لە تروکۆلەری تەماشام کرد نووسرابوو ؛ وەزیری کارو باری ژنان..! گۆتم : ئەی ئەوە چیە، قاتی بەخۆم تەلەفۆن لۆ خۆم ناکەم، وەرامم داوە، ژنەکی دەنگ ناسک گۆتی : هەلەو جەنابی وەزیر کوی ؟ گۆتم : باشم بژی ئەتوو کووی ؟ گۆتی : وا دەڕوا، وەڵلا حەزم کرد تەلەفۆنەکت لۆ بکەم و ئەحوارت بپرسم، گۆتم : کێی جەنابت ؟ گۆتی : ئەمن وەزیرەکەی پێشە توومە لۆ کاروباری ژنان، خولی من تەواو بوو، هەونکەش خانەنشینم ! گۆتم : هەربژی و سەرکەوتوبی، فەرموو ئەمرکە ! گۆتی : وەڵلا گلەییەکم لێت هەیە، گۆتم : دەبا ئەمنیش گلەییەکت لێبکەم، بوومە وەزیر و نەهاتی دەسکە گورەکی بینی و پیرۆزباییم لێبکەی ! گۆتی : وەزیر هەیە کەیفی بە وەزیرەکەی پاشە خۆی بێ، کە دێتە جێی وی ! گۆتم : ئەوەندەش وەیە، دەبرێ ئەتوو گلەیەکەت چیە ؟ گۆتی : وەڵلا گلەیەکەم لەسەر دایە جووجەیە، باشە کەس نەما لەو وەزارەتەی ملی لەبەر ملی بنێی دایە جووجە نەبی، وەڵلا گوناحت دەگاتێ ئەوهای لێدەکەی ! گۆتم : لۆ چم لێکردیە، پێم گۆتیە دەبی دەوامت مەزبووت کەی و خلاس و بڕاوە، گۆتی : ئەوجە دایە جووجە لە وەزارەت بی و نەبی چ لە وەزعەکەی دەگۆڕێ، قابیلە تفەنگی بە دەست بی و لەسەر چیای حەمرینی ڕاوەستابی بەرامبەر دوژمنی، کورە دە ئیزنی دە ڕەحمەت لە بابت، با ئیسرەحات بکاو، حەفتەی ڕۆژەکیش بێتە مارت و ئەو مارەت لۆ وەکی پیفۆکی لێبکا، گۆتم : ماری من یان ماری توو ؟ لە قریتەی پێکەنینێی داو گۆتی : ماری هەردووکمان..! گۆتم : ببورە ئەمن پێویستم پێی نیە، ناتانم ئیزنیشی بدەم لۆ ماری توو، دەکرێ پاش دەوامان بێتە مارینگۆو لۆتان وەکی پیفۆکی لێبکا، گۆتی : ماخران درت چەند ڕەقە، ئەتوو ئەو وەزارەتەی ئەوها باژۆی سەری دەخۆی و خۆشت بە پەلەکی دادەدەی..! گۆتم : داوای لێبوردن دەکەم، ئەوە یاسایەو دەبی هەموومان پابەند بین بە دەوامێ..! کە لەمن مەئیوس بوو ئیشەکەی لۆ بکەم، بێ خواحافیزی مۆبایلەکەی قەپات کرد..!
مام عەوڵا هات و گۆتی : وەڵلا شەمسەدین گەندەبای بە مشەوەشی هاتیەو دەیەوێ بتبینی ! گۆتم : خێر، قاتی پیرداود بێ ددان بە چایە مۆرینگۆیەکەی نەمردیە، وەڵلا مردبی قەتلەکم بە ملی داهات و لەبن نایێمە دەرێ، گۆتی : کورە خێر برێ ئوستاج، وەڵلا وەبزانم پیرەی گەمبۆزت بەو چایەی سەگتۆپ کرد ! گۆتم : چبکەین چارە چیە ؟ گۆتی : جەعۆ نەبوویتە ڕاوێژ کارو تەکبیر کەرت، بەوی برێ با خووتتەکت لۆ دانێ و فریات کەوی..! گۆتم : مام عەوڵا، وەختی فشقیات و ڕابواردنیە، دەتوو جارێ ڕاوەستە با شەمسەدین گەندەبای بێتە ژۆرێ، بزانین چبووە، هەنگی تەکبیرەکی لە حاری خۆمان دەکەین، هەی نەخۆم کاو نە ئەو چایەی مۆرینگۆیەم کا..!

مام عەوڵا چوە دەرێ و شەمسەدین گەندەبای هینا ژۆرێ، شەمسەدین ڕەنگی تەواو تێکچوو بوو، هیلاک و ماندی دیاربوو، کەفی لە دەوی دەهاتە دەرێ، هەر ئەوەتە نووسکەی دەهات، دوو جار گۆتی : سەلامو عەلێک، لێی تێنەگەیشتم، مام عەوڵا گۆتیە من : باشە ئەتوو لۆ ناچی سەر لە دختۆرەکی گێی بدەی هەی مارت خرانەبی، کابرا دەرێ سەلامو عەلێک و ئیللەڵا و بڕایەوە..! گۆتم : ئا ئێ ئێ، عەلەیکەسەلام بەخێربێی ! تومەز ئەمنیش لەترسی مردنی پیرداود بێددانی دەنگم نووسابوو، هەر ئەوەتە قسەم پێدەکرا، خوا خێری مام عەوڵای بنووسی قسەی منیشی لۆ گەندەبای تەرجوومە کرد، مام عەوڵا گۆتیە گەندەبای دانیشە دا، ماخران دەرێی باشووکە دندووکی لێدای، زوو تێمان بگەینە پیرداود مایە یان مردیە !؟ شەمسەدین سەری لەقاندو گۆتی : مایە ما، بەران پیرداود چ پەیوەندیەکی بەمن دایە هەتا لەمن بپرسی !؟ کە شەمسدین ئەو قسەی کرد بڕەک هاتمەوە سەرەخۆ، دانیشتم و پارم دا کورسی، گۆتم : یەعنی ئەتوو هیچ خەبەری پیرداودت لۆمە نەهینایە ؟ بە نووسکە نووسک گۆتی : ناوەڵلا، لۆ پیرداو چیلێهاتیە ؟ مام عەوڵا گۆتی : ئەو سەیە دونێ شەوێ دەرمانی قووەتێی خواردیە، گۆتمان نەکوو زۆری خواردبی و سەگتۆپ بووبی ! شەمسەدین گۆتی : نەبابە، ساغ و سەلامەتە، ئەوڕۆ سبەینێ لەگەر گەردو گوری بەیانی دیتم، هەر شانی هەردەتەکاندو گۆرانی ئەرێ لەیلێی دەگۆ، گۆتم : سەیە، ئەوە بەو سبەینە زووەی کێوە دەچی ؟ گۆتی : دەچمە مەیدانی عەیوانان گیسکەکی وەها قەرەو دەکڕم هێلکەی مراوی لەسەر پشتی ڕاوەستی..! مام عەوڵا سەری هینا بن گێی من و گۆتی : وەڵلاهی ئوستاج وابزانم ئەو گیسکە لۆ تووە، بەشی منیش دانێ ها، نەچی بەخۆو بە داکی ئەعمەدی هەمووی لرف کەن ! گۆتم : وەختی گیسکیە، دە ڕاوەستە بزانین شەمسەدین گەندەبای لۆ ئەوها مشەوەشە..!
چایەکیان لۆ شەمسەدینی هینا، هەر لە بایی غارێ تێکیداو بە دوو فڕان ئاوای کرد، گۆتی : چایەکی دیشم لۆ بینن خێرتان دەگاتێ، گۆتم : هەر چایە پەستەکەی بینن لە کنی دانێن، با لوولەکەی بەسە دەوی وەکا..! چایەکی دی خواردەوەو باشبوو بڕەک هاتەوە سەرەخۆو دەنگیشی هاتەوە تایمی خۆی..! گۆتم : دەوجە لۆمان باسکە بزانین لۆ ئەوها مشەوەشی و چ ڕوویدایە ؟ شەمسەدین گۆتی : ئوستاج، ئەتوو بەخۆت دەزانی پێش ماریمە هەدیقەکی (حەدیقە) گەورەی لەپێشە، عوکمەت هیچی لێ نەچاندیەو هیچ خزمەتی نەکردیە، ببووە زبرخانە، ئەمن لەگەر خەرکی گەڕەکێ قسەم کردو گۆتم : چاوەڕێی عوکمەتی مەکەن لۆتان بکاتە دارو بارو فریز، وەڵلا عوکمەت ڕوونی لە کێچی دەگری، دەوجە پیاوی چاکبن، وەرن با بەخۆمان تەرتیبی بکەین، ئەلهەقی خەرکەکە بە گێیان کردم و هەر کەس پێش ماری خۆی خاوین کردەوەو ڕێکمان هێخست و داروبارو فریزمان لێچاند، بووە هەدیقەک ئەممان هەدیقە، ئەوڕۆ سبەینێ هاتمە دەرێ، دەبینم پێش هەدیقەی پڕی شۆفەرو گلێدەر بووە، گۆتم : ئیلاهی دەبی ئەوانە چ ئیشیان هەبی، وەڵلا چوومە کنیان، دیتم کابرایەکی تەنگەستووری سەرو سمێر بۆیاغ کرای، وەڵلا بتدیتبا واتدەزانی پشیلەیەو لەبن سێری (ساج) نانی هاتتە دەرێ..! قسەی لەگەر سایەقی شۆفەرو گلێدەرەکان دەکردو دەیگۆ هەتا عەسرێ هەمووم لۆ ساف کەن، وەکی لێی چوومە پێش ناسیمەوە، وەختی خۆی کەونە سەرۆک جاش بوو، کوڕەکی خۆی ناو لێنابوو سەددام، ڕۆژێ هەتا هێوارێ ڕاوە پێشمەرگەی دەکردو لە ئەنفالەکانیش بەپێش دەبابەی سەددامی کەتبوو..! سەلامم لێکردو بەسەری لموزی گۆتی : ئالەن بابە..! گۆتم : کاکە ئەوە خێرە ئەو شۆفەرو گلێدەرەت هینایتە گەڕەکیمە ؟ گۆتی : ئەوە ئیشی توو نیە و ئەمن بە ئەمری عوکمەتی هاتیمە ! گۆتم : ئەمری عوکمەتی لۆ ئەتووی ناردیە ؟ گۆتی : ئەو عاردەیان دایتە من، وا سافی دەکەم و دەیکەمە قەتعە قەتعەو دەیفرۆشم..!
مایتی[1]