$#مام جەلال# یەکێتی نەبوو؟$
#هێڤیدار ئەحمەد#
#11-01-2019#
$ساڵی 2013 لە پارکی تارین، لەسەر ڕێگەی پیرمام یادی دامەزراندنی یەکێتیی نیشتمانی کوردستان بوو. کە گەیشتمە ئەوێ، بە بڵندگۆیەکی گەورە دەنگی مام جەلال بەسەر کەشی ڕێوڕەسمەکەدا زاڵببوو و دەیگوت: سەفین لەبن بێ، یەکێتی لەبن نایەت.$
#نێچیرڤان بارزانی#، سەرۆکوەزیرانی هەرێمی کوردستان، لەو یادەدا ئامادە بوو و وتارێکی پێشکەشکرد. یەک ڕستەی وتارەکە هەرگیز لە مێشکم دەرناچێ، کاتێ وتی: پارتی ئەوەی لێکنەداوەتەوە کە دامەزراندنی یەکێتی بۆ بەدیلی پارتی بێت.
خاوەنی قوتابخانەی یەکێتی مام جەلالە، وەکوو کەسێکی سیاسی لێهاتوو کە بەوە ناسراوبوو، قەت کردنەوەی گرێیەکان لای ئەو مەحاڵ نەبوو. جارێک بەڕێز سەعدی پیرە، ئەندامی مەکتەبی سیاسیی یەکێتی، پێیگوتم یەکێتییەکان ناڕەحەتبوون کە کاتی خۆی مام جەلال چووە سەری ڕەش و لەگەڵ کاک مەسعود ڕێککەوتنی کرد، منیش یەکێک بووم لەوانە، بۆیە بە مام جەلالم گوت: پێویست بوو بچییە سەری ڕەش؟ مام جەلال بەمنی گوت: بەڵێ، پێویست بوو ئەو سەردانە ئەنجام بدەم. تەنانەت پەیوەندی پارتی و یەکێتی گەیشتە ئەوەی بەڕێز نێچیرڤان بارزانی دەیگوت کاکە من جێگری ڕاستەقینەی مام جەلالم نەک ئەوانی دیکە. مەبەستی بەڕێزیان ئەوەبوو کە هەرکاتێک داواکارییەک بێتە پێش، پەیوەندی نێوانیان ئەوەندە بەهێزە کە شتێک نییە مەحاڵ بێ چارەسەر نەبێت.
مەبەستم لە باسکردنی ئەو ڕاستییەی سەرەوە بۆ ئەوە بوو، بڵێم پارتی و یەکێتی دوو هێزن ئەوەندە بە یەکەوە خەباتی هاوبەشی باشیان هەبووە، مرۆڤ هەرکاتێ بیەوێت دەتوانێ هەڵوێستی زۆر باش بۆ خزمەتی ئەو دوو حیزبە و خەڵکی کوردستان باس بکات.
بێگومان لە 10 ساڵی کۆتایی تەمەنی مام جەلال ئەو برایەتییەی نێوان پارتی و یەکێتی زۆر بەدیکرا. مادام مام جەلال ئەوابوو، دەبووایە کەسە نزیکەکانی تاڵەبانی باش لە مام جەلال و لەو سیاسەتەی لەگەڵ پارتی دەیکرد بۆ بەهێزکردنی کوردستان لەسەر ئاستی ناوخۆ و بەرانبەر بەغدا و دەوڵەتانی دیکە تێبگەن. مام جەلال ئەوەندە لەگەڵ سەرۆک بارزانی تەبا بوو کە لە بەغدا دەیگوت: من کاندیدی بارزانیم. مەبەستی لەمەش ئەوە بوو کە شکۆی کورد لە بەغدا نەشکێت، بەڵام لەدوای کۆچی دوایی مام جەلال، ئەو برایەتییەی نێوان پارتی و یەکێتی، ئەگەر نەڵێین کۆتاییهاتووە، هەرگیز ناتوانین بڵێین مامەڵەی ماڵباتی تاڵەبانی و یەکێتی بەگشتی ئەوەیە کە مام جەلال هیوای بۆ دەخواست.
دوو مانگ زیاتر بەسەر سوێندخواردنی پەڕڵەمانتارانی خولی پێنجەمی پەڕڵەمانی کوردستاندا تێپەڕیووە. پارتی هەر زوو وتی پێش سەری ساڵ (پێش 2019) کابینەی نۆیەم دەستبەکاردەبێت، پارتی پشتی بە هاوبەشەکانی قایم بوو کە بە پلەی یەکەم یەکێتیی نیشتمانیی کوردستانە. بەڵام یەکێتی دۆخی دانووستاندنەکانی ئاڵۆز کردووە. ڕاستە قوورسە بۆ حیزبێکی وەکوو یەکێتی کە بەهۆی ڕێککەوتننامەی ستراتیژییەوە لەگەڵ پارتی دەسەڵاتی ئەم وڵاتەی 50 بە 50 دابەشکردبوو، ئێستا ناتوانێت ئەوە هەزم بکات کە پارتی بڵێت بە چاوی زیاتر لە 21 کورسی سەیری یەکێتی دەکەین، بەڵام ئەوەی جاران نا! کە خودی یەکێتی هۆکاری ئەوەشبووە.
لە کۆی 111 ئەندامی پەڕڵەمانی کوردستان بۆ خولی پێنجەم، 75 ئەندام لە سنووری پارتین (#هەولێر# 48 و #دهۆک# 27) ، تەنیا 36 پەڕڵەمانتار لە سنووری یەکێتین (#سلێمانی# 35 و #هەڵەبجە# 1) . ئەمەش دەریدەخات کە خەڵک بەهۆی ناسەقامگیری سیاسی لەو سنوورەی یەکێتی تێیدا باڵادەستە، کەمتر بڕوایان بە دەسەڵات و ئاڵوگۆڕی دەسەڵات هەیە. لە سنووری پارتی کە ڕێژەی بەشداری لەلایەن لایەنگرانی پارتی و یەکێتی و هەموو حیزبەکانی دیکە دوو بەرانبەر و زیاتر بووە. ئەمەش ئەوە دەگەیەنێت کە دەبێ یەکێتی بە سیاسەتی خۆیدا بچێتەوە.
یەکێتی داوای لە پارتی کرد کە گەڕێکی نوێی دانووستاندنەکان دەستپێبکەن، بەڕێز #مەلا بەختیار#یش تێیدا ئامادەبێ و لەگەڵ سەرۆک بارزانی کۆببنەوە. پارتی وتی مادام لەگەڵ سەرۆک بارزانییە، واتە دانووستاندنەکان قۆناغێکی باش دەبڕێت. پارتی بە برادەرانی یەکێتی گوت ئەم جارە کە هاتن، ناوی کاندیدی خۆتان بۆ سەرۆکی پەڕڵەمان و جێگری سەرۆکی حکومەت، چ سەرۆکی حکومەت یەک جێگری هەبێ یان دووی هەبێ، پێشکەش بکەن، بەڵام نە شاندی یەکێتی هات و نە ناوی کاندیدەکانیشیان هێنا.
مام جەلال هەندێکجار بۆ کێشەیەک تەلەفۆنی بۆ سەرۆک بارزانی دەکرد و دەیگوت نانی نیوەڕۆ درووست بکەن، وا هاتم کێشەکان یەکسەر چارەسەر دەبوون، کەچی ئێستا لەم قۆناغەدا یەکێتی لە ڕێگەی نامەیەکەوە داوای لە پارتی کردووە مەلەفی حکومەت کە تێیدا داوای ڕەچاوکردنی پێگەی یەکێتی کراوە وەکوو جاران و مەلەفی #کەرکووک# و کێشەکانی لەگەڵ بەغدا چارەسەر بکرێ!
پارتی و یەکێتی لە دوو کیشوەری جیاواز نین تا بە نامە لەگەڵ پارتی قسە بکرێ. لەو ماوەیەدا کەسە نزیکەکانی بەڕێز کۆسرەت ڕەسوڵ عەلی، جێگری یەکەمی سکرتێری گشتیی یەکێتی چاویان بە بەڕێز سەرۆک بارزانی و بەڕێز نێچیرڤان بارزانی کەوتووە، ئەو سەردانانە هەندێ هیوایان درووستکردووە کە ڕەنگە گرێیەکان ببنەوە، بەڵام ئەوەش بەندە بەوەی کە بڕیار و ئیرادەی کێ لەنێو یەکێتیدا سەردەکەوێ؟
یەکێتی وەک بڵێی هیچ کێشەیەکی ئەو وڵاتە لە ئەستۆی ئەودا نییە، جگە لە کێشەی بایکۆتی پارتی لەسەر #بەرهەم ساڵح# (سەرۆککۆماری ئێراق) . ئەمە یەکێکە لە داواکارییە سەرەکییەکانی یەکێتی لەگەڵ پارتی. برادەرانی یەکێتی باش دەزانن بەڕێز بەرهەم ساڵح بۆ ئەوانیش ماڵ نییە. دڵی بەرهەم ساڵح بۆ یەکێتی تەنیا بۆ پۆستی سەرۆککۆماری لێدەدا! دەبێ یەکێتی زۆر لە پێگەی بەرهەم ساڵح گەورەتر بیربکاتەوە. ئەو پۆستە دەڕوات، بەڵام چارەنووسی یەکێتی و پارتی لە هەرێمی کوردستان هەر پێکەوەیە.
پارتی مەرحەباییەکی بەرهەم ساڵح هەر دەکات، بەڵام دەبێ کاتی بێت. پێکهێنانی حکومەت و یەکلاییکردنەوەی پرسی کەرکووک دوو بابەتی گرنگی ئەم وڵاتەن. دەبێ یەکێتی ڕەچاوی پارتی بکات لە دەستنیشانکردنی کاندیدیان بۆ پۆستی پارێزگاری کەرکووک، کە پێمان ناخوشە ئەو قسەیە دەکەین، بەڵام باشترە بۆ خودی یەکێتی پاشان بۆ پارتی و خەڵکی کەرکووکیش کە کاندیدەکەیان بۆ پۆستی پارێزگار، لە گرووپی 16ی ئۆکتۆبەر نەبێت.
پارتی گەورەتر تەماشای وێنەکە دەکات، قەت مەسەلەی دوو ئیدارەیی لە ئەدەبیاتی پارتی دا نییە، ڕاستە لێرە و لەوێ قسە دەکرێ، ئەویش وەک کاردانەوەیەک بەرانبەر هەندێ قسەی نابەرپرس لەنێو یەکێتیدا. بەڵام کێشەی باشووری کوردستان و ئێستای ڕۆژاوای کوردستان و گۆڕانکاریی ناوچەکە ئەوەندە گەورەن، دەبێ کار لەسەر ئەوەبکرێ کە هەرچی زووە دامەزراوە فەرمییەکانی هەرێمی کوردستان (سەرۆکایەتی هەرێم، حکومەت و پەڕڵەمان) دەستبەکاربن و لە ڕێگەی ئەو دەزگایانەوە موخاتەبەی بەغدا و دەوڵەتانی دیکە بکەن، کە بەڕوونی پارتی ئەم نامەیەی گەیاندووەتە برادەرانی یەکێتی.
برادەرێک بەمنی گوت، پارتی ئامادەیە هەموو شتێک لەگەڵ یەکێتی واژۆ بکات و بە دڵی یەکێتی بێ، بەڵام بە مەرجێک یەکێتیش مام جەلال بۆ پارتی زیندووبکاتەوە. بۆیە ئەوەی پێویستە لەسەر یەکێتی ئەوەیە کە بەدوای ئەو پەرتووکە بکەون کە بە کردەوەکانی مام جەلال بۆ داڕشتنی سیاسەتی دوای ڕێککەوتنی واشنتن لەنێوان پارتی و یەکێتیدا لەلایەن مام جەلالەوە نووسرا! چونکە لەڕاستیدا ئەوە ئەو یەکێتییە بوو کە مام جەلال لەگەڵ پارتی دەیویست، نەک ئەوەی ئێستا ئەولادی مام جەلال دەیکەن. یانیش ڕەنگە مام جەلال یەکێتی نەبووبێ و ئێمە نەمانزانیبێ! [1]