[وەرن بچین بەرەو پیری]
(پێشوازی مانگی ڕەمەزان)
وا ساڵ جارێ تر گەڕاوە... میوانێکی نوێی هێناوە... ماهی ڕەمەزانی ناوە... کام ڕەمەزان؟ مانگی قورئان... کەشی ئیمان... دەوای جەستە و گیان و ژیری... وەرن بچین بەرەو پیری.
هات تا ئێمە لەگەڵ خوادا، ئاوەدانبێ نێوانمان... تا ئاودێریکا سەوزەگیای ئیمانمان... تا وەکوو ئاوایی (ڕەقیم) وێران نەبین... گرفتاری ڕێی شەیتان و تاوان نەبین.
ئەو ئەیەوێ، پێش لەوەی فریشتەی مەرگ چۆک داباتە سەر سینەمان... تیماریکا ئەو، گشت زام و برینەمان... زامی غەفڵەتی ڕۆژانی ئەم ژینەمان... تا ئامادەبێ بۆ حزوور، دڵی سافی بێ دەغەڵی و بێ کینەمان... تا پێش کۆچوبار و سەفەر... ڕێی بەهەشتمان بخاتە بەر... باخی تەقوا لە دڵمانا بێنێتە بەر.
برا و خوشکم! باوە، دایە! ڕۆژوو کە فەرمانی خوایە... تەنها ئامانجی تەقوایە... فێرمانەکا پارێزکار بین... بەم دنیا دەسخەڕۆ نەبین، مادەم میوان و ڕێبوار بین... تاکوو دڕک نەبین، گوڵ بین... گوڵێکی سەرپەلی چڵ بین... گۆڕیشمان باخچەی بەهەشت بێت، کاتێ بە میوانی گڵ بین.
ڕۆژوو ئەو قوتابخانەیە... کە پڕ لە پەند و وانەیە... فەرمانی زاتی خواوەندی تاقانەیە... ڕەمەزان ئەو میزانەیە... ئەڵێ ڕۆحتان نەگەییوە، کرچ و کاڵە... وا یەک ساڵە، جەستە بەسەر ڕۆحا زاڵە... ئەم پڕ و ئەویان بەتاڵە... ڕۆحی برسی دەوای دەوێ... دەمەزەردی بڕوای دەوێ... (شەحن)ی وزەی تەقوای دەوێ.
یاران ڕەمەزان دوا چرکەی ساتەکانی... موناجاتی ناو شەوانی... سوژدەی دەمی پارشێوانی... ئەڵقەی قورئانی بەیانی... ئێوارە و ڕۆژووشکانی... دڵان پڕ لە باوەڕ دەکا... بەجۆرێ نەزان فێر دەکا... ڕێوی بە بێچوە شێر دەکا... ئەوەی تەقوای تیا نەڕواوە... بڕیاری تەوبەی نەداوە... غەیبەت و جنێوی ماوە... جگەرەی واز نەهێناوە... کرژ نییە، سست و خاوە... تەنها ئەوەی پێی بڕاوە... برسیی نان و تینوی ئاوە.
کەسێ ڕۆژوو ئامانجی خۆی تیا پێکاوە... جەژنی ڕەمەزان بەدواوە... ئەگەر پیرە و ئەگەر لاوە... لەو پەیمانەی بە خوای داوە... بەردەوامە و نەوەستاوە... ئەڵێی تیغی تازەساوە.
ڕۆژوو نەفس دەکا چارە... نەفس هارە... زۆر نابارە... لە فەرمانی خوا بێزارە... ئاخر ئەم نەفسە بێبارە... کە ئەڵێی ماری حەوت سەرە... حەزی لە ئەمبەرا و بەرە... وەک کەوی سەودا لە سەرە... جڵەو نەکرێ زۆر خەتەرە.
هەر کەس نەفس فەرامۆشکا... ئەبێ دین هەڕاجفرۆشکا... لە دۆزەخ جێ بۆ خۆی خۆشکا... کڵاوێک لە سەری دەکا... تا لە ڕێی ڕاست بەریی دەکا... ڕووزەردی مەحشەری دەکا... نەفس کە ڕۆژوو بێ نان و ئاوی دەکا... بە جۆرێ لغاوی دەکا... تێی دەخوڕێ، قاوی دەکا... کز و هەڵقرچاوی دەکا.
برا و خوشکم! بەخۆکەوە... لە قافڵەی پارشێوکەرانا، بە ڕێ کەوە... چڵکی گوناﮪ لە خۆت کەوە... ئەمە هەلی ڕاهێنانە... ئەمە خاڵی وەرچەرخانە... بەهارەوەرزی ئیمانە... قەواڵەی تەوبە و پەیمانە... تا بۆ بەهەشتی نەبڕاوە... هەموو ببینە پەروانە.
هۆزانەوان: #مەلا غەریب پێنجوێنی#
دیوانی: #هەنسک و هیوا#. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=