=KTML_Bold=عێراق، ریفۆرمی خوێ!=KTML_End=
#ئاسۆ عەبدوللەتیف#
ئیمانۆیل ماکرۆن لە وڵاتێکی گەورەی وەک فەرەنسا بێ هیچ پێشینەیەکی حیزبی و سیاسی و تائیفی هات و تەواوی کۆمەڵگای فەرەنسی سەرسام کردو ئێستا دەڵێن ناپلیۆنی سەدەی بیست و یەکەمی فەرەنسا، چونکە وەک خۆی هات و بە نەرمی خەریکی شۆرش و ریفۆرمی نوێ و دەستکاریکردنی قۆناغی پێشووی فەرەنسایە بەره و قۆناغێکی گەشەسەندووی جیاواز لە رووی ئابوری و ئیداریەوە.
ماکرۆن خۆیەتی و تەعبیر لە رۆحی فەرەنسیەکان دەکات، بەڵام لە عێراق ئەم مۆدێلە نییە، هەمیشە عێراق چاوی بڕیوەتە دەرەوەی خۆی، ئێران و ئەمریکا بە نموونە! کەسێک نیە گوزارشت بێت بۆ عێراقیەکان و وەک سیمبولی دیموکراسی و چاکسازی و پاڵەوانی گۆڕانکاری ریشەیی وێنابکرێت، کۆمەڵێک ئەکتەری سیاسی و دینی و بازرگانی تازە، بە ئارەزووی خۆیان بەڵانسی حوکمرانییان تێکداوە بۆخۆیان و چۆنیان بوێت ئاوا نەخشی دەکەن، حکومەت درووست دەکەن، دەیڕوخێنن، هەڵبژاردن چێ دەکەن و کار بە دەرەنجامەکانی ناکەن، ساختەکاری دەکەن، پەرلەمان سڕدەکەن و چالاکی دەکەنەوه و نەوت دەردێنن و دەیفرۆشن و وڵات ئەخەنە ژێر باری نائاسایی و قەرزو ئابوریەکەی هەلاهەلا دەکەن و کەس لێپرسینەوە ناکات، بەکورتی هەرکاراکتەرێک خاوەنی هێزو پاره و روئیای خۆیەتی بۆ دەسەڵات، بۆیە هەمیشە عێراق لە رۆخی نائارامیدا دەمێنێتەوه و عێراق هی کەس نیه و هی هەموو کەسیشە.
ئێستا شارێکی وەک بەسرە کە بوئرەی خۆپیشاندان و نارەزایەتی راستەقینەی چینی هەژارو کەمدەرامەته و شارێکی نەوتاوی و خاوەن دەریچەی ئاویی و بەندەری بازرگانی و ستراتیجی گەورەیە، بۆتە تەویله و وێرانە بەدەست ئەم ئەکتەرانەوە، بۆچی دەبێت شارێکی وا ستراتیجی ئاو و کارەبای نەبێت و سوێراو بخۆنەوە؟ بۆچی دەبێت رێژەی %82ی خەڵک بێکاربن و بەدوای کارێکی شایستەدا بگەرێن؟ بۆچی رێژەی %50ی خەڵکەکەی لەژێر هێڵی هەژاریەوە بناڵێنن و دوچاری هەزاران دەردو نەخۆشی و کوێرەوەریی ببنەوه و نەخۆشخانەکانی بێ چارەسەرو دەرمانبن؟ شارێک لەرووی سەرچاوەی مرۆیی و دەرامەت و کانزاو گەشتیاریەوە هیچی کەمتر نیە لە کوەیت و ئەبوزەبی و بەحرەین، چۆن دەکرێت ژیان به و شێوەیە بگوزەرێت لەسایەی حوکمرانیەکی ئاوادا!؟
گەلانی عێراق بە کوردو عەرەب و کەمایەتیەکانیەوە، دوای پانزه ساڵ لە ئاوابوونی خۆری سەددام، سەیرە هێشتا خەریکی خۆپیشاندانی سەرەتایین بۆ ماف و دەستکەوتی کاتی و خزمەتگوزاریی سادە، کارەبا و ئاوی شیرین و هەوای پاک و کارو موچه و گەشت و ئەم شتانە بۆتە داواکاریی، ئیتر عێراق چۆن پێشدەکەوێت و کێ جورئەتی ئەوە دەکات باسی دیموکراسی و ئازادی و مافی مرۆڤ و فەزیلەتی تاک و خۆشگوزەرانی و سیستم و بیمەی بانکی و تەندروستی و شتی لەم بابەتە بکات؟
ڕاستیەکەی ئەوەیە حیزب لە عێراق بە گشتی لە وەزیفەی سیاسی و فیکری و سلوکی خۆی دوورکەوتۆتەوه و بۆتە کۆمپانیای پاراستن و سیکوریتی بۆ بەرژەوەندی هەندێک گروپ و تاقمی بچوک، ئەم تاقمە بچوکانەش لە عێراقدا، پاره و هێزو میدیاو چەکیان لایە، بەشە زۆرەکەی عێراقیش لە دۆخی شکست و هەژاریی و فەرامۆشی سیاسی و کەلتوری و ئابوری و کۆمەڵایەتیدا دەژین، ئەمەیە عێراقی دوچاری پاشاگەردانی و فەسادی ئیداریی و سیاسی کردۆتەوه و لە ئێستادا سەری کێشاوە بۆ خۆپیشاندانی جەماوەریی نارێکخراو، کە خۆشبەختانە هیچ حیزب و تەیارێکی سیاسی خۆی ناکات بە خاوەنی وەک چۆن خۆپیشاندانە میلیۆنیەکانی بەغداد لە رابردودا بۆ چاکسازیی و گۆڕینی دەسەڵات و ریفۆرم، رەوتی سەدر خاوەندارێتی دەکردو هەر خۆشیان کۆتاییان پێدەهێنا بۆ مەبەستی کاتی.
خۆپیشاندانەکانی ئەم مانگە گەرمەی تەمووزی شارەکانی بەسره و نەجەف و کەربەلا، گوزارشت لە رۆحی تورەی تاکی عێراقی دەکات بەرانبەر بە سیستمی شکستخواردوی حوکمرانی عێراق کە نەیانتوانی پاش رژێمی پێشوو ئەزمونێکی تازە تاقی بکەنەوه و تاکی عێراقی بخەنە ناو دۆخێکی باشترەوە، ئەمانە هاتن لەبری ریفۆرمی نەوت و گەشەسەندن بە کەرتی پیشەسازی و بونیادی قوڵی کانزاو نەوتی عێراقەوە، ریفۆرمی ئاوو خوێ و سوێراوی ناو بەلۆعەکان بکەن، عێراقیان وشک کردۆتەوه و تەنانەت ناتوانن قسەیەکی جددی لەگەڵ تورکیاو ئێران بکەن بۆ وشککردنی ئه و هەموو سەرچاوە ئاویانەی عێراق و ئه و هەموو بەنداوانەی کە لەدەرەوەی عێراق دروستکراون.
کۆی خۆپیشاندانەکان راستە بۆ خزمەتگوزاریی سەرەتایی و ئاوی شیرین و کارەباو دابینکردنی ژیانێکی شایستەیە، بەڵام گوزارشت لە نەبوونی ئینتیماو خواستی تاکی عێراقی دەکات بۆ شوناسی عێراقی بوون، شتێک نەماوە بەناوی عێراقی بوون، سروودی مەوتنی ئێستا لای تاکی عێراقی وەهمێکی گەورەیه و مەرکانەیەک ئاوی شیرین و تاکێک پێڵاو ناهێنێت، ئەم گروپگەلەی کە ئێستا عێراق بەرێوە دەبەن و خەریکی گفتوگۆن بۆ پێکهێنانی کابینەی نوێ، گوتارو ئەجێنداو مامەڵه و میسداقیەت و بەرنامەکەیان خاڵی بۆتەوە لە بنەماکانی دەوڵەتداری مۆدێرن و توانستی ئەوەشیان نەماوە حوکمرانی عێراق بکەن، موعجیزەیە عێراق هێشتا بە پێوە وەستاوە پاش ئه و هەموو نارەزایەتی و گەندەڵی و قەیرانە زۆرانەی تێیکەوتووه و وەزیرێک دەستلەکارناکێشێتەوە، لەکاتێکدا پەرلەمان و دادگای باڵای فیدراڵی، ئەنجومەنی دادروەری و سەرۆکایەتی کۆمارو وەزیرەکان هەموو بێدەنگن و توانای چارەسەرکردنیان نەماوە.
ئەم تایپە لە حوکمرانی عێراق، لەبری ئەوەی کە خەریکی پینه و پەرۆبن بۆ وەستانی نارەزایەتیەکانی شەقام و توڕەیی خەڵکی بە دابینکردنی 3.5 تریلیۆن دینار بۆ ریفۆرمی ئاوی سوێراوو خوێی ناو بەلۆعەکانی بەسرە، پێویستە خەریکی هێنانه پێشەوەی ئەڵتەرناتیڤ بن بۆ حوکمرانیەکی باش و تەندروست، ئەگەرچی ئەمەش ئەگەرێکی دوورە رووبدات، دەکرێت لەبری ئەم چارەسەرە کاتیانه و پاککردنەوەی بەلۆعەکان لە خوێ، لە پێشدا عێراق پاک بکەنەوە لە خۆیان و دەوروبەریان و له و دۆگما عەقڵی و سیاسیە، پاکی بکەنەوە لە گروپگەلی مافیایی و گەندەڵ و میلیشیاتی سەربازی کە عێراقیان کردۆتە سەربازگەیەکی مەزهەبی تاریک، پێویستە چیتر دەستبەرداری عێراق بن، عێراق هی حیزبێک و دوان و سەرکردەیەک و خێزانێک و ئایدۆلۆژیایەک نییە، کاتیەتی ئەم موزائیکە سودی لێ وەرگیرێت بەره و عێراقێکی دادپەروەر کە هەمووان لە سایەیدا هەست بە ئارامی و ئۆقرەیی بکەن.
دواجار مەبدەئی ئیشکردن و بەڵانسی حوکمرانی تێکچووە، خۆپیشاندانەکانیش عێراق دەباتە قۆناغێکی نوێی چاوەرواننەکراو بۆ سەرلەنوێ دروستکردنەوەی عێراق، بەره و قۆناغی دەستکاریی و ریفۆرمی ئیداری و ئابوری و چاککردنی گوزەرانی هاوڵاتیان و تێگەیشتنی کۆی لایەن و نەتەوه و گروپە جیاوازەکان، رەنگە گفتوگۆی پێکهێنانی حکومەتیش خێراتربکات و حکومەتی ئایندە بخاتە بەردەم بەرپرسیاریەتی مێژوییەوە، چیتر دۆخەکە بەرگەی مامەڵەی سیاسی و دیبلۆماسی نهێنی و سەفەقاتی ژێربەژێر و موغامەرات و مانۆڕی مەزهەبی ناگرێت، گرنگە کوردیش خاوەن گوتارو مامەڵەی دروستی خۆی بێت بەره و بە سیستمکردن و بە یاساییکردنی فیداڵیزمی هەرێم و یەکلاییکردنەوەی کۆی دۆسیە ئابووری و دەستورییەکانی نەک داواکاری پۆست و دەستکەوتی حیزبی! [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=