=KTML_Bold=فەلسەفەی یەکڕیزی لەنێوان بەجیهانیکردنی ناسنامە و راسیۆنالیزەکردنی سیاسەت=KTML_End=
#سامان سۆرانی#
ئاشکرایە کەوا ناسنامە شتێکە مرۆڤ بەرهەمی دەهێنێ و بە باشترین شێوە بەکاری دەهێنێ، واتە ئەو شتەی، کە بەدەستی خۆی و لە ڕێگەی جیهانەوە درووستی دەکات.
بێ ئاگایی و خەیاڵ و هەڵخەڵەتاندن ڕۆڵ دەگێڕن لە شێوەدانانی هزر و بڕیارەکانی مێشک و ڕێڕەوی مێژوو.
سیستەمە ئایدیۆلۆژییەکان و فەلسەفەکانی مێژوو دەکرێ سەرچاوەیەک بن بۆ هۆشیاری، یان ئامرازێک بن بۆ پەروەردە و ڕۆشنگەری، لەهەمان کاتدا دەتوانن ببن بە ئامرازێک بۆ ساختەکاری و چەواشەکاری.
یەکگرتوویی کورد و سازانی کورد لە هیچەوە درووست نابێت، ئەو یەکگرتووییە لە بەرهەمێکی بابەتییانەی زەروورەوە سەرچاوە دەگڕی، بە مەبەستی یەکخستنی گەل و دەوڵەت و دامەزراوە یاسایی و شەرعییەکانی، کە ئامانجیان بنیاتنانی ناسنامەی نەتەوەییە و هیچ پەیوەندییەکیان بە گەمەی سازان و گفتوگۆی سیاسییەوە نییە.
بۆیە پێویستە لە پێناو دەستەبەرکردنی ناسنامەی نیشتمانی کار بۆ پرۆژەیەکی نیشتمانی بکرێت بەمەبەستی گەیشتن بە یەکڕیزی و ڕێکەوتن لەسەر گرێبەستێکی کۆمەڵایەتی، کە عەقڵیەتی پارچەپارچەکردن و سایکۆلۆژیەتی تاڵانکاری باوی هەندێ هێزی سیاسی تێپەڕێنێت.
پێویستە پەرە بە ڕەهەندی کەلتوری ئەو ناسنامەیە بدرێت لە بوارەکانی نیشتمانی و نەتەوەیی و ئایین و کۆمەڵایەتی.
لە ڕابردوودا ڕژێمە هەرێمییەکانی ناوچەکە کاریگەری نەرێنییان لەسەر چارەنووس و داهاتووی گەلی کوردستان هەبووە، بەو هۆیەوە گەلی کوردستان کەوتە بەر شاڵاوی توندترین جۆرەکانی هەڵمەتی جینۆساید و کرداری ڕەگەزپەرستی و ستراتیژەکانی دەسەڵاتی پاوانخوازی و ستەمکاری.
گەلی کورد بە شێوەیەکی گشتی ڕووبەڕووی ئالنگاری گەورە بۆوە، بێجگە لە خەباتی چەکداری هیچ بژاردەیەکی تری لەبەردەست نەما بۆ بەدەستهێنانی خواستە ڕەواکانی لە ڕووی نەتەوەیی و مرۆیی.
پێویستە گەلی کوردستان وێنەیەکی نوێی ناسنامە نیشان بدات، لە ڕووی واتا و ژیان، لە ڕووی تیۆری و کردار.
گرینگە کەسانێ لە کێشانی ئەو وێنەیە بەشدار بن، کە باوەڕیان بە یەکگرتوویی خاک و گەلی کوردستان هەبێت و پێکەوەژیان و ئاشتییەکی بەردەوامی نێوان خودی کورد ئامانجیان بێت. پێویستە ئەو کەسانە هێز و کاریگەرییەکی لەڕادەبەدەریان هەبێت و ئەو هێز و کاریگەرییە بۆ بونایدنان و ئافراندن و پەرەپێدان و گەیاندن بخەنە گەڕ و خۆیان بەدووربگرن لەو پەیوەندییانەی، کە لەسەر بنەمای ڕەتکردنەوە، پەراوێزخستن، سووکایەتی پێ کردن و بەرگریکردن لە بۆچوونی ڕەها دامەزراون، کە پڕن لە پارادۆکس.
پێویستە ئەو کەسانە نەڕواننە واقیع وەکو پەیامێکی دووردەست، بەڵکو زمانی دیالۆگ و لێکتێگەیشتن بکەن بە ئامرازێ بۆ ئاڵوگۆڕ و بەیەک گەیشتن، دوور لە پەرستنی ناو و دەق.
پێویستە بژاردەی دیموکراسی و ڕێزگرتن لە ڕێساکانی نیشتمانسازی و دەوڵەتسازی و ئایندەسازی بە گرینگییەوە تەماشابکرێ و بەهایان پێ بدرێ.
بە دڵنیاییەوە گەلی کوردستان لە بواری بەرگری و تا ڕادەیەکیش لە ڕووی سیاسەت ئەزموونی کۆکردۆتەوە، بۆیە ئەگەر مەبەستی بێت و ویستی نیشتمانسازی بەهێزبێت، توانای هاوکێشە هەرێمی و نێودەوڵەتییەکان بخوێنێتەوە و لێیان تێ بگات.
بە پێی ئەو خوێندنەوە و تێگەیشتنانە پلان و ستراتیژی خۆی بە هۆشیاری و هەستیارییەوە دابڕێژێ، هەڵبەتە پاش هەڵسەنگاندنی واقیعی ئێستا و دۆخی زاتی و بابەتییانەی خۆی، بۆ ئەوەی بتوانێ دەسکەوت و خەباتی چەندین دەیەی بە پارێزراوی بهێڵێتەوە.
بێ هەبوونی زانیاری و فاکتەرە زانستییەکان بەجیهانیکردنی ناسنامە ڕوونادات. ئەمڕۆ دەبینین، کەوا کاروباری گشتی چیتر مۆنۆپۆلی سیستەمێکی تایبەت یان نوخبەیەکی سیاسی نییە، بەڵکو بوارێکی بیرکردنەوەیە، لە جیهانی مۆدێرندا هەموو ئەکتەرێکی کۆمەڵایەتی دەتوانێت بەشدار بێت لە شێوەدان یان لە فراوانکردنی و بەرگری کردن لە بەهاکانی نیشتمان.
ئەکتەری کۆمەڵایەتی دەتوانێ لە ڕێگەی گفتوگۆی گشتی و تیشکخستنە سەر بابەتە هەنووکەییەکان، یان لەڕێگەی پێشکەشکردنی دەستپێشخەریی داهێنەرانە بۆ چارەسەرکردنی کێشەکان و چارەسەرکردنی قەیرانەکان، ڕۆڵی ناوازە و دیار بگێڕێ.
بە کورتی دەتوانین بڵێین، حزبە سیاسییەکان لە خەڵکانی تر لەپێشتر نین سەبارەت بە ڕێکخستنی کۆمەڵگە و هاندانی ناسنامەی کۆمەڵگەیی.
پاش بەراسیۆنالیزەکردنی سیاسەت، دەکرێ تاکەکەس بەرپرسیارێتی خۆی هەڵبگرێت و بە پەرۆش بێت بۆ سەربەخۆیی خۆی، بە شێوەیەک خۆی لە ڕێگەی بەشداریکردن لە چارەسەرکردنی کێشەکانی درووست بکات.
ئەو تاکەکەسە ڕازی نابێت پارتێکی سیاسی دەم ڕاستی بێت و لە بری ئەو بەناوی بەها باڵاکان و پێویستییە مێژوویییەکان بڕیار بدات.
بە لۆژیککردنی سیاسەت واتە پێدانی دەرفەت بە سیاسەتوانان، تا کێشەکانی خۆیان لە ڕێگەی عەقلانییەتێکی ئاشتیانەی دانوستانئامێزی بەرهەمداری دوور لە بەکارهێنانی زمانی شمشێر و زبر و ورووژێنەر، چارەسەر بکەن.
پێویستە کورد بەیەکەوە داوای یەک ئامانجی دیاریکراو بکات بۆ ئەوەی سەربەخۆ بێت دەبێ سەربەخۆی بێت.
ئەو کەسەی ناسنامەی بوونی خۆی، چ سیاسی بێت یان کولتووری، نەخاتە ژێر ڕەخنە و شیتەڵکردن، ناتوانێ لە قەیرانی بوونگەری دەربازی بێت، ناتوانێ ئیمکانیاتێکی بوونگەرایی دابهێنێ، تا لە ڕێگەیەوە خۆی بگۆڕی، یان ڕێساکانی گەمەی نێوان خۆی و کەسانی تر بگۆڕێ.
گۆڕانکارییەکان لە سەردەمی ئێمەدا زۆر گەورە و ڕیشەیی و گشتگیر و خێرا بەڕێوەدەچن، تۆڕە کۆمەڵایەتییەکان و بازاڕی ئازاد و کۆچبەری خۆبەخش ناسنامە و کۆمەڵگا و وڵاتانبەرەو بەجیهانیبوون دەبەن، لەم دەیەیەی دوایی ئەم بابەتە زۆر بەرجەستە بووە، بە تایبەتی کاتێ ئێمە شایەتحاڵی شۆڕشی تەکنەلۆژیای زانیاری و مرۆڤی ژمارەیی و زیرەکی دەستکرد و ئینتەرنێتی شتەکان دەبین، کە بەهێزترن لە باوەڕ و ئایدیۆلۆژییەکان. بەو شێوەیە ئێمە خۆمان لەبەردەم واقیعێ دەبینینەوە، کە بێ سنوور و بێ ناسنامەیەکی تایبەتە.
لە کۆتاییدا دەڵێین:
خۆشەویستی کوردستان زۆر پیرۆزە، ئەو کەسەی یەکڕیزی کورد و چەسپاندنی پێکەوەژیان و ئاشتی کۆمەڵگەیی نێوان کوردستانیانی ئامانج بێت، پێویستە بێ وچان کار بکات بۆ یەکگوتاری و بەهێزکردنی حکومەتێکی پۆڵایین و خاوەند باوەڕ بە ئایندە و یەکڕیزی نیشتمانی، پاش تێپەڕاندنی شتە بچووکەکان، بۆ گەیشتن بە تێگەیشتنێکی شارستانیانە و هاوچەرخ.
یەک هەڵوێستی و یەکڕیزی و پابەندبوون بە یەکبوونی کوردستانی پێویستییەکە، زۆر پێویستە پابەندی بین، بۆ ئەوەی ئاسایشمان بپارێزین و ڕووبەڕووی ئالنگارییەکانی ئایندە بین.
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End= [1]