هەوا ها جگ جگ تیەریکەو دوی ک ئامووژگار مەدرەسەی پانزەی خورداد گڕێ یەی جار دنووڕسە ساتە و وە وەر خوەێەو دخوتان ک دی کەێ زەنگ دەن. قەیرێ سەر خڕ دا و دوارە وت:
- دە شەڕ ئمڕووژیش خڵاس بووم؛ یەی ڕووژ تریشە کوشتم تا بزانم چەن ڕووژ ترمان ماگە. نە بەڵەێ نیم سات تریشە ماگە! هێمان پەنجە. بزان ئێ کەچەڵ داگەردیاگە دی زەنگە دێ بچیمنە ڕێاو.
نووڕسە یەکێ دە زاڕووەیلە و وت:
- های جەمشیدی بەو؛ وەێ گێەێ دوڕتە و کەپووڵ قەۊنتە منیتە وەرەن بەختیاریێگ، ئەو ڕووژ کردمەتە مۆبسر ئێقە بێ‌خیرەت بۊت نەتۊەنسی بێ‌دەنگێانەو بکەیت. ئێقە قاڵ و قۊ کردن تا یاروو کەچەڵ وەماو ڕەسانیت؛ گوزارشم داگەسە ئدارە کول. نەکەی چگم خوەتیش بێەیتە لووێانەو وە گوورانی چڕین؛ دە جی یە هۊرت وەێان بوو شلخ نەکەن. چۊ ئەوجار گشتێان دە دەور خوەت کوو نەکەیت و بەرزی بەرزی بخوەنیت ها. دەرس خوەن ک نییت، هە بیل وە دەرد کارێگ بخوەیت. خیاڵ نەکەی بچم زاڕووەیلە وەم نیەۊشن کی چە کردگە! موومنییش ئەر هات هواڵم پرسی بۊش هەێمە چگەسە مسراو!
جەمشیدی نووڕسە تەبەقەێ یەکم؛ دەسێ هاوردە بن ملێاو و قەیرێ کلگ شەکان وە یەواش وت:
- گرمەت شوووفاڕ.
مەسعوود ئەزیمی ک زاڕووەیلە دچڕینەێ مەسووت فیسقە، ئەڵسا سەر پا:
- ئاقا ئجازە، جەمشیدی دارە تهدیدم میکنە؛ مگە خود شما بهم نگفتین...
ئاقای نادری گرتە گووش جەمشیدی کیشاگەێ:
- خودا خودامە کلگ بنەیتە قەیێ دە گیانت وە ئازا نیەیلم.
قەیری سەر خڕ دا دەنام هەسارە کەسێ نەی؛ گورج خوەێ کرد و وە تن دەر مەدرسە واز کرد. چەوێ کەفتە بەرپرس مەدرسە:
- یە دەێرە چە کەی موومنی! هەم چۊ شکارچی سەر کەل دەمان گرتیە!
- دەم نەخەو نوا! بۊش تو دەێرە چە کەیت؟! سات چەنە سەر خستیتەسە خوار و ها دچیت؟ وە قەور باوگم سوو دی چمە ئدارە و تەکلیفت ڕووشن کەم. دی ئەخماز نیەکەم؛ یە مرووڤایەتیە؟! وژدانت ها کوو هیلیتەێان و دچیت! سوو یانە نیەخوازێ چشتێ بزانن و بوونە دکتوڕ و مهەندس؟ خوداێگ وتنە، پەێخەمبەرێگ وتنە...
- ئەرێ چمە کوو برا هەم لێوەی خوەت کردیە؟ هە نیەیلی جگێ مێزیش بکەیمن. هاتم نەۊەت، سەر کیشامە دەیشت وتم بزانم تو هایتە کوو.
- ئا تو ڕاس ئۊشیت! دە کوم لاێ دنیا ئەڕای مێز کردن دچنە سەر خیاوان؟! مسراوێ دە نام دە سەرت بڕیاگە؟ ئەگەر ئەڕای مێز کردن هاتیتە ئەنۊ ئێ کتاوەیلە دە دەست چە کەێ؟! دە کەێەو دیتە یاروو کتاو فارسی بنەێگە ژێر هەنگڵ و بچووە مێز کردن!
- برا دی فرەتر دە یەسە ک دەنوو گوزارشم بەیتە ئدارە؛ ئێدامم خوو نەکەن. تخمارەێ ئیوە خوو هە شووفاڕی ها خۊنتان. م خوو ڕەسمیم خودایش نیەتۊەنێ بکەێگەمە دەر. هە گەن خوەت کەی. هەردگێان گڕێ بێ‌دەنگەو بین.
موومنی دەس سیە و تۊسکنێ ناۊگە وەر ڕێ دەرانە و نیەیشت کەسێگ هەت و چوو بکەێگ. جار تر نادری هاتە دەنگ:
- ڕسی حاجی چمان ئەو زەنگە داڵگ کوورش هاتۊە مەدرەسە؛ دە نام هسارە دە لات دیمەێ؛ ژن جوان و فرە فرە ڕەنگینێگە. حاجی وتم تو فرەتر دەێ خەوەر دێریت چمان بیوەسە، ها؟
- م! م دە کوو بناسمەێ؟ هە نیەناسمەێ؛ ئەسڵ کی ئۊشیت؟ کام کوورش؟ مەگەر دە مەسرسەمان کوورش نام دێریمن؟ نیەزانم.
نادری کردە جواو:
- هە ئوو کوورشە ئۊشم ک هەرکەس وەردێ کەێ چیت کوشیتەێ. هاتە هۊرت کی ئۊشم؟ داڵگ کوورش ئێران دووست؛ ئوو ڕووژەین دیم سمارەت دایتەێ...
- ئها، ئەی ئا وتم کی ئۊشیت. ئەی بن‌ئامووزاییگ وەردمان دێرێگ.
- هە بن ئامووزای؟ حاجی پووڕێ دمای چل ساڵ گدایی کردن نەزانم شەو جمعە کەێە! چەن جار شیفت شەوەکیان بۊمن، نیمەروان نیمەروانێگ دە نام ماشینەت دیمەێ. ئەو ڕووژ دە ئدارە هاتمەو خواسم حەجیە خانمت دە ئەو شیفتە بۊنم دەێ بپرسم، بزانم ژن خاسێگە ئەڕای فامیلێ ک ژنەێ مردگە بخوازمەێ. هەرچێ بوو ئیوە ئێقە قەومیتان نزیکە وە یەوا ک حەجیەیش نەیەسەێ هەم هەمیشە دێاێگە ماڵتان.
ئاقای موومنی دەسێ دە وەر دەرانە داگەو لا و دەس ئاقای نادری گرت:
- کورە ول ئێ قسیەیلە بکە؛ من و تو چەن ساڵە هامکاریمن و هەمیش قەوم و هاوڕێ. یەمە ئەڕای نیم سات ئەڕا گەن خوەمان بکەیمن! وە گیان خوەت ئاقای نادری منیش ئێجوور ئایمێ نیم بچم گوزارشت بێمە ئدارە. هە دڵگیر بۊم وتم برا ئەڕا م هە وەڵنگ چنەرم دە ئێرە هەر کەس خوازێ دێاێگ و هەر کەس خوازێ وە کەێف خوەێ دچوو! زەنگ ئاخر یاروو گامە زووڵگ نەیتە بان سەر زاڕووەیلە و چیتە ڕێەو؛ تنیش دە جی م بوویت ناڕهەت دوویت. وە خاس عەلی نیەزانم ئەڕا چنە برایلەم دووست دێرم. ڕزاێ خودا خۊنم دەت جووشێگ. هە ڕووژ یەکم دیمەت زانستم پیاگ خاس درسێگیت. ئەسڵ برا بێا یەێ کار ترەک بکەیمن؛ دە ئمڕووژەو خواسی بچیت، خەوەرم بکە بێامە شوونەت. خوەمیش هە دە نام دەفتەر شەکەت بۊمە. نیم سات ئاخر دی هە نیەچووە سەر؛ هە بایەس چەوم وە ساتەگە بوو کەێ کلگ بنەمە بان زەنگە. هۊچ منەتێ نەێرم؛ ئێجوورە منیش سەرگەرم دووم. چە دێرێ. تەێرە خوو نێاێگ بخوەێگەمان. دەرەیلە بەسیانە. نازمەیش هەسەێ.
تو بچوو؛ زانم سرویسێ دێریت بڕەسنی و ئێجا بایەت ئەڵگەردی سرویس کڵاس خوەتیش بەری. زانم ژیان فرە سەختەو بۊە. ئەگەر سرویسەیلە نەون تنیش وە هۊچ نیەڕەسیت. خودا هزار جار شکر من و حەجیە دو گلە حقووقیمن هۊچ گیر و گرفتێگ دە ژیانمان نەیریمن. ساڵ تر بازنشەستە دووم. تونیش خاوارە نییت چوارشەمەی ئەو هەفتە خوازمەنی دۊەتەم بۊ؛ قەوڵێ دامە. فرە کوڕە لاڵکیا وت بیل زۊتر سۊر بکەیمن. ولا م نەیشتم؛ وتم دو سێ هەفتەێ ترەک مەبعەسە. ڕووژ خەێرێگە ئەڕای خوەت دەس ژن خوەت بگر و مزڵ خەێر بکەن. مینێگە بەندەزادەێ نەوکەرت؛ ئەۊ هەم دە تێوڵ پاکت ئاشناێگ دە پترۆشیمی دێریمن قەوڵ داگە تا ئاخر ساڵ بەرێگەێ سەر کار. ئەمان زانم تو گیچەڵ فرە دیری؛ هە یەێ حقووقی؛ زاڕووەیلەت یا دانشجوون یا بێکار. حقووقەتیش خوو هە دە جی قست بەنەێ. هەر کارێ دە دەسم بێاێگ کووتاهی نیەکەم. وە دڵ و گیان هامە خزمەتت. دە وەر دەرانە داگە لا:
- دێرەو بۊ! زۊتر بچوو بڕەسە سرویسەت. منیش چمە بان سەر زاڕووەیلە. هە وەسێە هەم دەنگ جەمشیدی نادرس دیاێگ! بەرزی بەرزی تەمام کرد ها هوورە چڕێگ.
ئاقای نادری قەیرێ دەس هاوردە سێوڵی و سوویچەگەێ دە گیرفان دراورد؛ دەس خستە پووق مل ئاقای موومنی و ماچ تێوڵێ کرد:
- نام خودا چەنێ نوورانییت؛ پرشە پرش نۊرتە؛ خودا خەیرت بەێگ حاجی... خودا وە حەق پەنج تەن ئەوەز خەێر بەێگەت... خودا جار تر ماڵ خودا بکەێگە قسمەتت. حاجی خوەتیش زانی منیش گرفتارم وەنە نیم سات زۊ چگن چە کەێگ ئڕام؟!
ئاقای ئەحمەدی چاودێر، نازم مەدرەسە، چەوێ کەفتەێان هات بزانێ جە بۊە. دەس ناگە کەلەکە و چەم دە ئاقای موومنی نۊقان:
- وە خەێر هەم چەێە نادری هەلە هەلێە دێرێ چووگە کوو؟ بیل پیلێ گری حڵاڵ بوو؛ هەم مەدرەسە هیشتیتە جی؛ چە وەت بکەیم ها؟!
ئاوای موومنی نەیشت دریژە بەێگە قسیەیلێ:
- کورە ولمان بکە؛ چە کردگە ئێ فەقیرە! مەر چەنێ حقووق دێنەمان؟ وە چەمان ڕەسێگ؟ وەێ دو قرووش ئدارە لێوەێ خوەت کردیتە. وەێ وەز حقووقە وە خودا هەرکە دە جی ئیمە بوو هە دەرس نیەێگ. زانی ئامووژگارەیل دە کشوەرەیل ترەک چەنێ حقووق گرن؟ خوەم وەێ وتمە ئمڕووژ زۊتر بچووگ؛ ئەسڵ دە ئمڕووژەو یا نیم سات زۊتر کلێ کەم. خودا خوەیشە دە سوورەی مائدە فەرمایش کردگە موومن بایەس دە کار خەێر یارمیەتی دەر موومن بووگ؛ یەیش خوو گشتام زانیمن گرفتارە. چ کار خەێرێگ دە یە بانتر! سواو دێرێگ.
ئاقای ئەحمەدی قەیرێ دەس هاوردە سەر و چەمێ و خەنست:
- ڕووژێ یەێ قسە کەن؛ وە گیان خوەت گشتمان شێتیمن.
ئاقای نادری نیشتە زەۊ:
- دی باوگم درات؛ دی نیەکیشێگەم. هەر ڕووژ بایەس چەق چناوەم بێاێ؛ دمای یە کڵاس تەمام بووێگ بایەس وەێ پراید چەکە تا دوکوت شەواریش مسافرکیشی بکەم. دی هۊچ ڕووژێگ بێکار نیم. شەو و ڕووژ نیەناسم. گشت ژیانم چۊ گای نام ئاسیا وە هەماڵی بردمە سەر؛ لە وڵات ئیمە مانای ژیان هە یەسە! دە ڕووژێگەو لە ئەقڵ خوەم ڕەسیمەسەو تا یەمە هە هامە هەڵکەدەو؛ تێر زگ خوەمیش نان نەخواردمە. دی نیام چ خەڕگێ بگرمە سەر. شەویش چمە ماڵ شەکەت کەفم نیەزانم دنیا ها دەس کی؛ نە زانم ژن دێرم، نەیش خەوەر دە زاڕووەیلم دێرم؛ دی ئاجزم، ئاجز. دڵمان خوەشە زێنگیم! زێنگ مەنن دە وڵات ئیمە قورپ دێرێ، نە ژیان کردن.
نازم مەدرەسە قەیرێ نچ‌ناچەو نا، چۊ قەرتبارێ ک دە قەرتبارەیل دوای هەتەو دەنگ:
- نادری دی ولمان بکە هەر ڕووژ خەیتە هۊرمان چەنێ بێچارەیم! چشت تر ئەڕای وتن نەیری؟! هە ئایەی یەئس بخوەن! دە جی یەگ وە چشتەیل مەنفی فکر بکەیت بچوو نیمەێ پڕ لیوان بۊن ئمجا ڕەسیتەو چەنێ بەختەوەریمن. چەتە؟ چەت نەکریاگە؟ ناشکری نەکە؛ ئێ ناشکریەسە باوگمان دراوردگە. فرە کەس هەن دە ئیمە چارە ڕەش‌ترن. بەس نیە تو کارمەندێگی و ئاخر مانگ حقووقێگ دیریت. بچوو خودا شکر بکە ئەر یەیشە ناتا چە بکردایمن! یاروو چووهە سەر ئێ مەیدانەیلە دە نامین مانگێ دو ڕووژ کار ئەڕاێ نیە. هەم بەیەس شکرگوزار خودا بوویمن ک وەزمان چۊ وانە نیە!
ئاقای نادری یەێ چەمێ نیقان و دە خوار تا بان نووڕست وەێ:
- ئا فرە خوەشمانە! چوون فرە کەس دە ئیمە هەژارتر هەن. دی تەنگمان نیەو؛ ئێجوورە گشتمان بەختەوەریمن.
ئاقای ئەحمەدی وە دەنگ بەرزەو دخەنست و چەپ دکوتا:
- بەختەوەر، بەختەوەر، بەختەوەر...
ئاقای موومنی هەم دڵ خوەێ گرتۊ و پل دخواردە زەۊ و دخەنست. ئاقای ئەحمەدی هەم هە وەرد خوەێ دوت نادری ڕاس ئۊشێ ولا ئیمە فرە بێچارەیم؛ هە بنووڕە ئێ کەوشمە چەن جارە پینەێ کردمە؛ یە ژیانە ئیمە کەیم! سەگ کاولی ... نامێ. ئەگەر چارەمان کوڵووڵ نەۊاتا ئامووژگارێگیم تامازروو کیلووێ گووشت نەۊمن. ئمرمان چگەو سەر و هۊچ دە ژیانمان نەفامسیمن. وە خودا کەس چنە م چارەڕەش نیە. هە بنووڕە سەر وەزم؛ یە بایەس پرتاڵ وەر یەی ئامووژگار بوو! مینمە تاسووکەرێگ. کی لە کی خەوەر دێرێ هزاە گرفتاری دێرم.
ئاقای نادری چەوێ کەفتە ساتە سیکۆپەنج قەدیمیەگەێ دەسێ و وت کورە خودا بووگەتان گرتنەمە قسیە. ئەڕای ئەو سرویسە کەفتمە دێر؛ ئاقای موومنی زامەت بکیش سرویسەم چۊ کاوڕ عەرەوی دەێ سای دارە بڕمن تا چم ئێ باوگ و داڵگ... ڕەسنم و ئمجا دێامە شوون یان.
وە هەر گیان کەنینێ بۊ هەردگ سرویسەگە ڕەسان و سەرەو خاونێان کرد؛ ئمجا دوارە وەرد خوەێ وت گیرام زۊتر چگم ئڕای ماڵ وە جەڕ کیشان؛ وڵم بکە هە چم دوان مسافر سوار کەم.
یەکم مسافرێ مەشەی ڕووسەم، بەنای هەفتاساڵەێگ بۊ. بێچارە تا چەواریش نەچگۊ ئەمان مەردم وەێ دوتن مەشەی. وە زوور ڕێ دکرد. شەوەکی شەفەق هاتۊگە سەعەدی یەکێ بەزەیێ وە حاڵێ باێگ و بوەێگەێ و قرووشێ بەێگەێ. گوڕان دە ژێر لچەو دخوتان:
- دی کی م بەێگە سەر کار. ئەگەر سوو شانس بارم کار ئەڕام بوو هەڵەبیێگ ڕۊن سینم.
دەنوو گڕێ یەێ جار دێا مل هێژدگ خوەێ:
- ئاخ خودا دی تا ئێ جوانەیلە وسانە کی کار دەێگە م؟ دە ئەو سەر شار بایەس بێامە ئێ سەرێ و کاریش نیە. هە پۊل تاکسیەیش نەێرم؛ بایە نان هەفت هۊها بێم. خوەزەو دۊەتە گەوراگە ناتامە شۊ؛ دخواسم نان خوەرێگ کەمەو بکەم، سێ گلە تیکەهاریش هاتە ملم.
دۊای ئەۊ جوان جل قووزێگ سوار بۊ. ماقێەو بردۊە مل جادە و هۊچ نەوت. ئاقای نادری هە چگ و چگ، تاگەر ڕەسیە ئاخر ڕێگە ئەمان پاپیا نەۊ.
- ڕووڵە یە ئاخر مەسیرمانە بایەس سەرتا بکەم؛ توای بچیتە کوو؟ دە کوو پاپێا دویت؟
- ئەێ ئێرە کووە؟! م بایەس دە پەیام نوور بێاتامە خوار. ئێقەرە فکر کەم، نیەزانم هامە کوو و چە کەم. دۊای ئمرێگ دەرس خوەنین بایەس خڕ وڵ بخەوم و تانەێ یا و ئەۊ بژنەوم.
هالیمان ئەۊ پاپێا نەۊ ک چەن کەس ترەکیش سوار بۊن؛ یەکێ دەێان وەرجە گشتێ هاتە دەنگ:
- بڵانسبەت ئیوە گووش تەکنن، م چ نەفامیێگ کردم ژن خوازیم؛ شرکەتەمان وەرشکەست بۊە، یەمە بچمە کوو؟ ئمجا ئۊشن ئەو کەسە دنان بەێ نانیش دەێ! هە خوەم بۊاتام چۊ خاسۊ؛ دەین و گوناێ سێ کەس ترەکیش هاوردمە مل خوەم.
یەک ترەک لە مسافرەیلە پەڕیە نام قسیەو وە دەنگ کزێگەو:
- کەم وڕینە بکە. م دە گشتتان گرفتارترم. نەنووڕە ئێ کوت شاەڵوار وەرمە؛ وام فرەێگ سەنمە و دە سەد کەسیش قەرت کردمە خستمەسە نام بوورس؛ گشتێ دانام و تەنیا ڕێگ ئەڕام ماگە... ڕووژێ چەن جار دچنە سەر ماڵ باوگم و پۊلێان خوازن! تفە تێوڵم یەمە چە بکەم؟ دیتە چۊ بێچارەێ خوەم کردم.
ئاقای نادری وە شنەفتن ئێ قسیەیلە زامەیلێ تازەو بۊن. دی ئاز کار کردن نێاشت. وەختێ ها دچگە ماڵ، دۊەت لچ قرمزێگ نواێ گرت و وە کلگ ئاماژە کرد، دەربەس. سارتێگ وەێ چگ تا سوار بۊ و گووشی وە بن گووشێ گرتۊ و هەیتاهەیت دوت:
- عزیزم خیلی دوست دارم. بە خدا تو تنها کسی هستی کە تو زندگیم دوسش داشتەم. خواستگار برام اومدە زودتر بیا خواستگاریم وگرنە مجبورم میکنن بهش شوهر کنم. عزیزم یە دیقە گوشیو قطع کن مامانم پشت خطیمە.
ئمجا ئەۊ قەت کرد و هاتەو جواو:
- ها هەم چەتە لمتی نادرس؟ تو خوو قرار بۊ بێایتە خوازمەنیم. درووزن یە دو ساڵە وە سەر خڕم دەیت. درووزن بێ‌شەرەف دی کەم دروو بەێ؛ تو ئەگەر بخوازم بیاتای ئەو ڕووژەین ڕەفیقەیلەتیش نێاوردی وەرد و... دە باوەت م چە فکر کردیتە؟! م خوازمەنیکەر ئەڕام هاتگە تا هەفتەێ تر هاتی هاتی، ناتی دی شۊ کەم.
ئاقای نادری دەنگ ڕادیوە داگە بان. ئەمان هەم شنەفت:
- قەڵبەگەم خودا وەکیلی ئشتبا کەیت. ناڕهەت خوەت نەکە؛ ها دەێ ڕووژەیلە داڵگم دێارمە ماڵتان.
دەنگ نزم ترەک دێات:
- ڕزا بۊشە ندا حەمید ئۊشێ ئەوجار سەنگ تەمام ناگە. گووشت نەوگ، ئەر ڕزا نەخواسەت خوەم هەتمەن خوازمەت!
دامی قەیرێ جەڕکیشان، دۊەت وت ڕزا ئاخر جارە کەفمە شوونتان ها و گووشیە قەت کرد. دوارە زەنگ دا:
- عشقم بوەخشی داڵگم بۊ؛ پەنج دەقە دە ماڵ درام سەد دا هزار جار چکم کەێگ بزانێ هامە کوو. بنەماڵەی سۆنەتی خوو هە ئێ جوورەس. عەزیزم م دی هامە نزیک ماڵ؛ شەو زەنگ دێمەت.
دجارە زەنگ دا:
- دیامە 22 بەهمەن وسمە نام پۆستە بێا شوونم.
ئاقای نادری ک چۊ بووق سوورەو بۊ هاتەو دەنگ:
- مەگەر دەربەس نەگرتیت؟ دی ئڕا دە نیمەێ ڕێ پاپێا دوویت؟ خەێرە؟
جواوێ نەشنەفت. وە مشت کوتا مل داشبۆرد ماشینە و وە دەنگ بەرز قاڵ کرد:
- وەرد تنم، خجاڵەت نیەکیشیت؟ ئڕا دروو دەیت؟! دیمنە یەێ کوڕ و دە دۊەت؛ نەیمنە یەێ دۊەت و سەد کوڕ.
دۊەت ماتیکێ دراورد و وە ژێر چەم نووڕسە ئاقای نادری و بزەخەنگێ کرد و دەنوو نووڕسە شیشەی مۆبایلەگەی و لچێ سوورترەو کرد. هەردگێان بێ‌دەنگەو بۊن. ئاقای نادری دەنگ ڕادیوە بەرزەو کرد. دمای ئەزان بڕێ کارشناس هاتن و دە مەورد گرانی و بێکاری و هەژاری دە ئامریکا قسە دکردن. خستەێ مل مەوج ترەک؛ دەورەیش چەن ئاقا دۆکتۆڕ دە مەورد داڕەمیان ئەخڵاق و خیزان لە وڵاتەیل ڕووژئاوا قسیە دکردن. دۊەت هاتەو دەنگ:
- ڕەسیمنە 22 بەهمەن دە دەر ئدارە پۆستە بنەمە زەمین.
گڕێ وسا دوارە وت:
- خاڵوو ئێ دەور زەمانە بایەس وەل بیس نەفەر بوویت گاهەس یەکێ دەێان خەڵەتیا هاتە خوازمەنیت. گشت کوڕەیلە ک بێکارن و بەتاڵ. دی کی تۊەنێ ژن بخوازێ! چۊ خوەیشکە گەپگەم بکەم دڵێ خوەشە دورس دە ماڵ نیشتگە. دی کی خوازێگەێ پەنجا ساڵێە؟ منیش کوچگێگە دە تیەریکی خەمەێ؛ هەرچێ هات خوەش هات... دی چە دێریمن دە دەس بەیمن. ڕەسیمن خاڵوو پاپێا دوم.
دەرەگە وە تون کوتاگە نام یەک:
- خاڵوو کەس تر ڕەسانی دی کەم فزووڵی بکە؛ پۊلەت بگر و بچوو. خاونمانی؟! ئەسڵ گشتمان... وە تو چە کی چە کەێگ؟!
قسەیل دۊەت جوور گورز دریا ناو سەر پیاگ؛ کەفتە هۊر دۊەتەیل خوەێ یەک لیسانسێ گرتنە و هانە بن ماڵ. کوژەک قەو کراسەگەێ واز کرد؛ وە زوور هناس دکیشا. دۊای ڕەدکردن چەن کۊچەێ تەنگ و تیەریک ڕەسیە ماڵ. لە دەر ژنەگەێ وە شەلەشەل هاتە پیریێەو:
- ها، ئمڕووژ دێر هاتی خەوەرێگە؟ کی ڕەسانیت؟ هەم ئی ژن و ئەو ژن نایتە وەر ماشینە؟
ئاقای نادری چشتێ نەوەت. دوارە ژن دەنگێ بەرزترەو کرد:
- ئەی عاشق مردگ... خیاڵ کەیت خەریمن هە جواومانیش نیەیت. خیاڵ کەیت هایمنە بن ماڵ نیەزانیمن چ کسافەت کاریێگ دە دەیشت کەیت؟ هە یەسە ویر دە ژن و زاڕوو خوەت بڕیتە؟ خیاڵ کەیت زەنگ نیەنەم بۊشن دیریچ خەڵەتێگ کەیت؟ وەم وتنە ئمڕووژ دۊەتێگ نایتەسە سەندەلی نواینگە و هە خڕێ دایتە و وەردێ جەڕ کیشایتە. مردگت بنەمە نام ... چەتانۊ؟ دە سەر قیمەت نەکەفتن ئەڵ یەک؟ هەرچێ داشتی بێایتەێ، ئەو دمایشێ بیشتایە سەر یارانە! وەردێیش جەڕ نەکیشیایت دە یە فرەتر سەرم نەخسایتە خوار. ئەسڵ خجاڵەت نیەکیشیت لف دۊەتەتە؟! بێخود نەوتنە دڵێ پیر مەیوو، بەتر هار مەیوو، کەلگە خراوە پڕ دە مار مەیوو. تو بەغداد دە نام ...ت دیارە؛ تو وە ئێ قسەیلە چە! دە جی یە پۊلەت دەیتە ئێ دۊەت و ئەو دۊەت، خودا بکوشێگەت، کووێ بکە نوای حەساو زامنەت ئازاد بکە. خودا کوشتگ عاشق!
لە ئێ لاوە دۊەتەگەێ چگە نام ئتاقەێ و دەرە کوتاگە نام یەک:
- تن خودا دی بەس بکەن. لێوەمان کردینە. ئێ قرم قاڵ ئیوە دی تەمام نەۊ. چەنێ نامجیتان بکەم؟
ئاقای نادری یەواش وە ژێر لچەو وەرد خوەێ وت:
- هەم دیتە ئمڕووژ دەفتەرچە قستە لە هۊرم چگ!
دەفتەرچە ئەڕای سوو نا ژێر باڵشتەێ و خەفت. شەوەکی سات 10 تاووس ژنێ قاڵ کرد:
- لەیلا بەو ئەڵسنەێ. دی چەنێ خەفێگ! ئەنۊ وت شەوەکی زۊ چم قستەیلە دێم. م وە دەرەک، چۊ تواێگ ئێ مانگە قستەیلە بورژێگ و خەرج زانستگەێ زاڕووەیل بەێگ؟ تا دوکوت شەوار ها وەرد ئێ ژن و ئەو ژن وە عاشقی؛ ئمجا سەرژان و نەخوەشیەێ هن ئیمەس. خوەشی دە ژێر سایەت نەکردم؛ خودا عەففت نەکەێگ. هە وە زێنگ فەلەجت بکەێگ تا بڕینی دە ژێر خوەت.
پیاگ هۊچ دەنگێ دەێ نەڵسیا. پەتوو هێا دان دین قەپ کوتاگەسە دەفتەرچە و پایلێ جەم کردگەسە نام زگێ و...
گشتێ دان ئەڵ قیژە...[1]