Mezlûm Ebdî: Êdî kefa mêzînê li aliyê me ye.
rojnameya welat، 06.12.2022.
Fermandarê Giştî yê HSD´ê Mezlûm Ebdî, dibêje wan rexneyên lazim li xwe girtine, nuqteyên xwe yên lawaz xurt kirine û bi amadekariyên mezin, artêşa tirk xurt be jî êdî avantaj li aliyê wan e.
Dewleta tirk ji 19´ê mijdarê ve li dijî rojavayê Kurdistanê û Bakur û Rojhilatê Sûriyeyê pêleke nû ya êrîşan da destpêkirin. Di van êrîşan de rojane carinan bi sedan êrîş li dijî deverên şên, binezasiya xizmetguzariyê, heps û kampên DAIŞ´î lê girtî û baregehên hêzên cihê yên Rêveberiya Xweser hatin kirin. Ev êrîş hîna jî dewam dikin. Pê re jî gefa dewleta tirk a êrîşeke dagirkeriyê li dijî seranserê erdên Rêveberiya Xweser a dewleta tirk heye.
Li ser asta êrîşan, amadekariyên beramberî êrîşeke muhtemel a bejahî yên li dijî Rojava ji Yenî Ozgur Polîtîkayê Erkan Gulbahçe bi fermandarê giştî yê Hêzên Sûriyeya Demokratîk (HSD) Mezlûm Ebdî re axivî.
Fermandarê giştî yê Hêzên Sûriyeya Demokratîk (HSD) Mezlûm Ebdî bi bîr xist ku artêşa tirk hêza duyemîn a NATO´yê ye û ev tişt anî ziman: (Helbet her kes bi vê dizane; dema mesele gelê kurd e, ew tevahiya karîn, teknîk û hêza xwe, heta bi çekên qedexekirî bi awakî wehşî bi kar tîne. Jixwe, ji bo tunekirina hebûna kurdî, ew tu cudahiyê naxin navbera sivîl û leşkeran. Terorkirina civaka kurdî, bûye konsepteke di alfabeya siyaseta dewleta tirk de. Lê belê, dagirkirina bajarên Efrîn, Serêkaniyê û Girê Spî (Til Ebyedê ) ne tenê bi hêza dewleta tirk pêk hatin. Li wir hevkariyeke cîhanî jî hebû. Rûsya û Amerîkayê destûr da û di encama lihevkirinên di asta serok-dewletên van welatan de, Tirkiyeyê cesareta zêdegaviyeke wiha kir. Ango di dagirkirina van bajaran de, ev welat jî berpirsyar in. Van salên bihurî, nirxandin û rexnedayîneke baş hat kirin. Di vê navberê de em gihiştin gelek encaman û me nuqteyên lawaziya xwe nirxandin. Di roja îroyîn de, em bawer dikin her çiqasî artêşa tirk xurt be jî, me amadekariyên mezin kirin û aliyên xwe yên xurt derxistin pêş. Êdî wê kefa mêzînê li aliyê me be.)
$Tirkiye hewl dide xaka Sûriyeyê dagir bike$
Mezlûm Ebdî di berdewamiy axaftina xwe de ev tişt anî ziman: (Sûriye veguheriye qada şerekî navneteweyî. Li vir welatên navneteweyî û herêmî ji bo berjewendiyên xwe biparêzin, di şer de ne. Dagirkirina bajarên me jî di encama lihevhatina berjewendiyên van welatan li ser hesabê gelê kurd, pêk hat. Lewra dagirkerî nekete ber lêpirsînê. Jixwe, heger heta niha ew bajar nehatine rizgarkirin jî, sedema wê jî ev lehevhatina aliyên navneteweyî herêmî ye. Ango sedemên hiştin ku ev bajar dagir bibin, hîna ji holê ranebûne. Lê belê, her diçe ew hevsengî xira dibin. Dagirkirina xaka Sûriyeyê bi destê Tirkiyeyê, bicihkirina komên îslama tundraw di wan bajaran de û polîtîkaya faşîst a guherîna demografîk, êdî tu alî qebûl nake. Ev yek jî dihêle zemînê rizgarkirina van herêman ava bibe.)
Ebdî diyar kir ku hêza wan hêzeke ku welatên cîran tehdîd bike nîne û wiha pê de çû: (Berovajî vê, me sînorê van welatan ji DAIŞ rizgar kirin û xetereke mezin li ser van welatan û cîhanê bi tevahî ji holê rakir. Lê çavên dewleta tirk bi vê rastiyê bar nebûn. Erdogan di civîneke Neteweyên Yekbûyî (NY) de, li pêşiya cîhanê plana dagirkirina herêmên me aşkera kir û ji wir êrîş birin ser Serêkaniyê û Til Ebyedê. Jixwe, me dizanibû ku ew plan wê bidome. Lewra di van 3 salên bihurî de, ji bo parastina ax û civaka xwe, me amadekariyên xweparastinê xurt kirin. Her wiha gelê xwe bi pêkhateyan hemûyan li gorî vê yekê bi rêxistin û amade kir. Ango me hêza xwe ya cewherî derxist holê û bi hêz kir. Li aliyê din, rewşa siyasî jî êdî ne weke berê ye. Di van salên bihurî de gelek guherîn pêk hatin. Êdî ne tenê em; gelê Sûriyê û welatên destekê didin me jî dagirkeriyê qebûl nakin. Ev 3 sal in, bênavber tirkiye dixwaze êrîşeke nû bîne ser herêmê. Erdogan gelek caran operesyona dagirkirina Kobanê, Minbic û Til Rifetê îlan kir, lê nedikaribûn gavekê jî biavêje.)
Ebdî da zanîn ku baweriya wan bi hêza wan ya cewherî heye û wiha got: (Baweiya me bi hêza me û gelê me heye. Teqeze, me ji salên bihûrî dersên pêwîst derxistin û li gorî wê parastina xwe xurt kir. Ev ne tenê di warê leşkerî de pêk hat, hevgirtina civakî û yekitiya pêkhateyên herêmê roleke xwe ya mezin hebû. Di van 12 rojên bihurî de, ev rastî derket holê. Dîsa, êdî ne hêsan e, Tirkiye nikare hema biryarê bide, ber bi herêmên me ve zêdegaviyê bike. Hefteya bihurî me dît ku aktorên sereke li Sûriyeyê (Amerîka û Rûsya) jî vê gavê qebûl nakin. Di kombûna NY´ê ya taybet ji bo Sûriyê de jî welatên endam hemûyan nerazîbûna xwe ji dagirkeriya tirk aşkera kir. Derket holê ku Erdogan û dewleta tirk bi tenê hatine hiştin û tevî hewldan û bazarên xwe hemûyan jî nikaribûn erêkirina welatekî jî wergirin.)
$Erdogan ji bo êrîşan li pey hinceta bû$
Mezlûm Ebdî bal kişand ser êrîşên Tirkiye û wiha axivî: (Piştî hewldanên 3 salan, Erdogan îcar armanc kir ku me bi teqîna Stenbolê sûcdar bike û bi vê hincetê dagirkeriyê rewa bike. Li aliyê din xwest ku sûdê ji rola Tirkiye di şerê Rûsya-Ukraynayê de bigire û cîhanê ibtîzaz bike. Jixwe, bikaranîna karta astengkirina endametiya NATO´yê ya Swêd û Finlandayê jî li holê ye. Tevî hemû bazarên Tirkiyeyê, dîsa helwestên van welatan li dijî operesyoneke bejahî bûn. Helwestên dijber û xurt li ser asta saziyên van welatan hebûn. Lê em hîna jî têrker nabînin. Nexasim, Erdogan ji bo bibe desthilat, wê hewldanên xwe bidomîne, heta mumkin e macereyeke dînane jî bike. Lewra me ji wan welatan doza helwestên xurt û domdar kir. Heta ku Erdogan bigihîje qenaeta ku ziyanên êrîşeke wiha wê ji sûdên wê zêdetir bin.)
Ebdî da zanîn ku rayedar û berpirsên Rêveberiya Xweser, Asayîş û HSD bênavber bi gelê herêmê re objektîf û zelal bûn û ev tişt anî ziman: ( Ji kêliya yekê ya êrîşên hewayî heta vê deqeyê, agahdarî hene. Bersiva gelê me û helwêsta wî jî cihê serbilindiyê bû. Li kîjan welatî hatiye dîtin bajar bên bombebarandin û gelê wî pişta hêzên xwe terk neke! Ev bersiva civakî, hewldana dijmin pûç kir. Her wiha xwedîderketin û baldariyeke cîhanî ji doza vî gelî re jî hat dîtin. Ragihandina Kurdî, Erebî û cîhanî kêlî bi kêlî rewş dişopand û dinirxand. Lê teqeze, ev ne têrker e, divê em van hewldanên xwe motîvekirina gelê xwe û raya gîştî ya cîhanê ranewestînin, heta bigihîjin encama sekinandina van êrîşan.)
Fermandarê giştî yê HSD’ê got ku dewleta tirk û hikûmeta AKP-MHP ya faşîst gihiştine nefesa xwe ya dawî û wiha berdewam kir: (Dizanin ku siyaseta wan ji aliyê gelê Tirkiyeyê ve nayê qebûlkirin. Dîtin ku li Zapê bi ser neketin, lewra ji bo desthilatê bi dest bixin, ew ê bi her tiştî rabin. Lewra em li benda êrîşeke wiha giran bûn. HSD di ber cîhanê de şerê li dijî DAIŞ´ê kir û serketinên mezin bi dest xistin. Dewleta tirk xwest bi êrîşên ku birin ser Holê û Yekîneyên YAT´ê ya ku Koalîsyo wê perwerde dike, vê xebata hevbeş asteng bike. Lê bi vê gavê, ne tenê me, lê cîhanê hemûyî dike bin xetera vegera DAIŞ´ê. 2 armancên van êrîşan hebûn; gelê me bitirsînin û herêmê vala bikin. Her wiha bi operesyona asîmanî re hêzên me şok bikin û piştre operesyona bejahî dest pê bikin.)
Ebdî di dawiya axaftina xwe de ev tişt anî ziman: (Rastiyeke di van rojên dawiyê de derket pêş, gelê me helwêsteke berxwedêr derxist û li hêzên xwe xwedî derket. Ji xwe amadekariyên ku ev 3 sal in hêzên me dikin, pozîsyona wan xurt kir. Dewleta tirk 50 balafirên şer bikar anîn, lê nekaribû li Kobanê û Minbicê şervanekî me şehîd an jî birîdar bike. Li deverên din jî berê xwe dan sivîlan. Balafirên F16 ji tirkiye rabûn û sivîlên me kirin hedef. Hat fêmkirin ku hêzên me ji şerekî wiha re amade ne. Dikarin xwe di bin derbên balafiran de jî biparêzin. Ev jî baweriyê dide, heger şerek rû bide, encamên xwe wê cûda bin û tirkiye wê nikaribe serketinekê bi dest bixe. Rast e, heger israr bike, dewleta tirk wê şer bide destpêkirin, lê bidawîkirina wî şerî wê di destê hêzên me de be.) [1]