سەیید سالار، سەیید سالار
یا ڕەسوولەڵڵا، سەیید سالار
سپەهدار تیپ، ڕۆی «يوم القرار»
پەنای عاسییان، بەندەی شەرمەسار
پاسەبان جێش پەیغەمبەران گشت
باعس ئیجاد کولل زیبا و زشت!
حەیی بێهەمتا، تۆ کەرد جە خاسی
شفاخوای هەفتاد دو گرۆی عاسی!
جە ئەو ڕۆ سانیع دێبای کۆن بافتەن
مەتایێ چون تۆ هیچکەس نەبافتەن
«لم يزل» بە سونع وێش فەخر ئاوەردەن
موختاری و چون تۆش«منخلق» کەردەن
پەی تەسهیل ئەمر تۆ شای بێسیفات
«سَيَجعل الله بَعد عُسر»ش وات
پایەی میعراجت عاری جە مەرئە
«سبحانَ الذي أسري بِعبِده»
شەرح داوەریت نە عاڵەم ڕەوان
مەزموون ئایەی «شَدِيدُ القوي»ن
«وحي منيف»ت بەحر فتووحەن
شەرح «أوحينا إليکَ ڕوح»ەن
ئەنبیا و ئادەم گشت خاک پاتەن
«ومن دونِهِ»، تەحت لواتەن
بەقیەی عەسکەرت «رباط الخليل»ەن
«أمَّن قانتٌ آناءَ اليّل»ەن
توڕڕەی نەوازش تۆ کە ئەشهەرەن
«فَأما اليتيم، فَلا تَقهَر»ەن
«کُنتُ نبياً» هەرجا کە واتەن
«سَنُقرِئُکَ ، فلا تَنسي»تەن
پایەیی «فاصبِر صبراً جميلاً»
ئایەی «قُم اللَيلَ إلا قليلاً»
تەوسیف نوتقت عاری جە ئەغوان
«وَما يَنطِقُ» هەم «عَن الهَوي»ن
بەندەی ئاستانەت گەردوون سروشتەن
«والسابقونَ الأولون» گشتەن
شەمع مونیرە «الي مَعَ الله» نی
شای «قابَ قَوسَين أو أدني»نی
«ألم نَشرح» شەرح، سینەی سافتەن
«والليل» وەسف زوڵف سیابافتەن
سیراج کەونەین، شەمع مونیری
هەم «نَذيرُ الخلق»، هەم موبەششیری
نییەن وێنەی تۆ سەیید «لولاک»
شای «لَعَمرُکَ» تەخت «وما أرسلناک»
زەڕڕەی فەیز لوتف تۆ پەنەش یاوان
عاسای موسەوی دەریا شکاوان
یاوان بە خەلیل سەرگەشتەی مەحزوون
جە فەیزت سەدای «قُل يا نارُ کُون»
جە لوتف تۆ بی سەیید خاتەم!
بە ساحێب ئیعجاز، عیسای بن مەریەم
غەرەز شیس و نوح، شوعەیب و ئیدریس
ئیسحاق و ئەیووب، یەعقووب و جەرجیس
گشت فایز بە فەیز لاتەناهیتەن
غوبار پای تەخت پادشاهیتەن
نییەن وێنەی تۆ، سەیید پاکدین
تۆی شەفاعەتخوای زومرەی موزنیبین
تۆ بە وێت واتەن شای عالی مەقام!
«بُعثِتُ الي کافة الأنام»
نەدارۆ خانا ئومێدێ بە کەس
خەتاش «لايحصي»، بە فریادش ڕەس!
عەتای عامت کەر، شامیل بە حاڵش
جە سەیل عیسیان وێرانەن ماڵش!
#خانای قوبادی# [1]