باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و نۊهەمە

قافڵەکە یاوا بە نزیکو ڕاهیبەکەی(بەخېرا)، ئاڎ گردو نەفەرۍ قافڵەکەیش وەزنێرەو چڕیېش پەی دلۍ کەژاوەکېش(سیایانە)کەیش، چاگە دمای سەرنجدایێ فرەی محەمەدی، ئیتر یاوانە کە ئانە وېشەن.
قافڵەی قوڕەیش، بە چن غەرائیب
تا، یاوان، وە پای سەومەعەی ڕاهیب
جە کەفری مەنزڵ، پەی سەر ئەفرازی
یەکسەر، مەشغووڵ بین، وە بار ئەندازی
حەزرەت، چەنی، عەم، چەودەم وە جەختێ
فەڕی قدووم بەرد، وە پای درەختێ
درەخت، کام درەخت، خوشکی هەزار ساڵ
سەبز و خوڕەم بیی، شانا، پەڕ و باڵ
بەخېرا)، ڕاهیب، خېزا، بۍ ئەندېش)
سەومەعەی خاس، تەرتیب دا، پەی وېش
شیی نە تۊی خەڵوەت، سەومەعەی پەڕ عەیش
تەڵەب کەرد، تەمام، قافڵەی قوڕەیش
واتش: حازربان، ئەهلی کاروان
خواجە، تا غوڵام، پیر، هەتا جەوان
تەشریفی ئەو شای، مەلایەک قەدەم
هەر نەوجا، بەند بیی، بە ئیشارەی عەم
قیبلەی قوڕەیش، حازر، تا غائیب
یەکسەر، شین وەتۊی سەومەعەی ڕاهیب
بەخېرا)، یەکیەک، نەزەر کەرد لېشان)
دیش، نېیەن، مەتڵەب ئەو جە دلېشان
ڕاهیب، جە مەجلیس فەوری ئاخېز کەرد
تەشریف هەم وە بان، سەومەعەی وېش بەرد
دیا، ئەو شەخسە، هەر ها نەجای وېش
هانە خیاڵدا، سەر ۋستەن، وە پېش
سەحاب، جە باڵاش، هېمای هەر بەندەن
سایەش، چوون سەیوان، پەرېش ئەفکەندەن
ڕاهیب حاڵی بیی، هەم ئاما، بە وار
ڕوو کەرد، وە یاران، ئاما، بە گوفتار
واتش: من واتم، ئېوە یەکسەر گشت
خواجە تا غوڵام، زیبا، تا وە زشت
چەنی ساربان، تا مەردی کیبار
یەکسەر، حازربان، پەی ئەکلی نەهار
ئېوە چەنی من، تەخەلف، کەردەن
چن کەس، وە یاران، تەشریف ناوەردەن
واتشان: بە غەیر، یەک خوردە ساڵ
نەمەندەن، وە جا، غەیر، جە منداڵ
ڕاهیب، سەوگەند وەرد، بە لات و مەنات
مەبۊ، هەم ئەویچ، بەیۊ، وەی بیسات
حارس چوون شنەفت، تەعەهود کەردش
حەزرەت چەنی ئەو، تەشریف ئاوەردش
سەرچەشمەی دەریای دین و مەزاهیب
داخڵ بیی وە جەمع، سەومەعەی ڕاهیب
بەر ئاما، وە کەل، چوون بەدری کامڵ
شوعلەی جەماڵش، ڕەنگین کەرد مەنزڵ
جە فەڕڕی قدووم، پاکی پېغەمبەر
ڕاهیب سەر ئەفراز، مەنزڵ، مونەوەر
ئەترافی قەریە، کەفەر، جە پەڕتەو
جە دیباجی تەڵعەت، هەمایون، ئەو
گرد بیی بە ڕەوزە، بەهەشتی باقی
بەخېرا)، زاناش، یەقین، بە تاقی)
محەمەد، خاتەم، ئەنبیاهانەن
شەرەف بەخشی تاج گردین شاهانەن
خاس کەرد، تەماشای دییەن، دیدارش
حەیران، بیی جە نوور، بەدری ڕوخسارش
ئەوسافی مەکتووب، نیشانەی خاتەم
موشاهیدەش کەرد، یەکسەر، دی وە چەم.[1]