میرزا ئۆلقاڎرو پاوەی، چی شېعرېنە کە پەی حەزرەتو شېخ عەلی حیسامەدینیش کیاستېنە، تاریفۍ کامڵی و زانایی و زاهیدیش کەرۊن، دەسگیرو فیرقەو دەسەپاچا، هەژارا، بۍ نەوایا. میرزا ماچۊ: نەسیحەتۍ تۊ تۊشەن پەی دنیا و قیامەتی، من هەرگیز نمەتاوۊ تاریفۍ کامڵۍ پېسە تۊ کەرۊن، حەزرەتێ پېسە تۊ مەر سەعدی شیرازی و فیردەوسی و حافیز بتاوان تاریفت بڎان، وەسفو من جە کۊ، شانو تۊ جە کۊ؟.من وەختێ متاوۊ تاریفۍ تۊ کەروون، دلۍ کوورۍ ئاسن تاۋنی ۋېتەنە بە زوخاڵم کەی، ئەوسا بڕېزنیم نە وار، جە قاڵبو سالیکانو وېتەنە ببون وە شووشەی تېزاب ئاودار، چەودما بە چەکۊشکاری بکەریم سکێوە بە ڕەواجە، پەی ئانەی بتاوۊ حزوورتەنە تاریفېت بڎەو، یانی دمای تەوەللودێ دووبارەی.
شۊڵەی شەمس شەرق، شۊڵەی شەمس شەرق
شیرین‌تەر جە نوور شۊڵەی شەمس شەرق
تورک تیرئەنداز، بووڕاتەر جە بەرق
پەی جوملەی عاڵەم تاج فەوق فەرق
دەس گیر زومرەی، دەسەپاچان گشت
جای ڕجا و کەرەم، فرقەی زیبا و زشت
قیبلەی حەقیقی جەرگەی ئەسفیا
پیر تەحقیقی گرۊی ئەولیا
مەوسووف بە ئەوساف وەسفە حەمیدە
فەنای زات حەق دانای نەدیدە
عاشق وە حەزرەت شای بوراق سوار
(حازرالحزور) موستەفای موختار
موشتاق بەهای مەشق مەنسووری
قانوون گیر پیر، هند لاهووری
دەوای دەرد دڵ مەرهەمی زامەت
نەسیحەت تۊشەی دنیا و قیامەت
کان و کۊی گەوهەر ئەسڵ دانەی لاڵ
خازن ئەسرار خەزېنەی خەیاڵ
(عالِمُ‌العُلُوم) جە مەه تا ماهی
(مجمعُ‌البَحرین) (فییچ الهی)
شەمع جەمع پاک ئیخلاس خەلاسان
سەرکەردەی سوپای خوڎا شناسان
شای شیرین قامەت قیامەت خېزەن
وەڵگ باخ ڕۊح ناپاکان ڕېزەن
ئوستاد کامڵ پیر بۍ نەزیر
وە حەڵقەی کەمەند پیر پیران گیر
ئەولیای ئەییام، قوتب زەمانە
مورشد ئیرشاد ئەسڵ کارخانە
دانەندەی خەیاڵ ختوورەی یاران
ئاگا جە ئەحواڵ مەردەی مەزاران
شارەزای ئەوزاع نەوتاق ئەرزەق
ڕەد بەڵایات قەزای موعەلەق
(مأزون) جانب دانای لایەمووت
ئاگای (بروجات، حَمَل) تا وە حووت
بەڵەد وە ڕاهی شەمس و ستارە
موخبر جە گەردش سەبعەی سەیارە
ئاشنای ئەحباب گرۊی بۍ عەیبان
ڕەفیق ڕاگەی (رجال الغیبان)
سەیاح سارای لاهووت و ناسووت
ئامېتەی مەلەک گرۊی مەلەکووت
ڕاوە پای تۊمار (عللیین)بەردە
تەماشای (تَسگیر) خەت لەوح کەردە
موفتی فتوای شەرع خەیر و حەقیقەت
ئەرباب ئایین تەقوای تەریقەت
ساق بەزم ساز بیسات یاران
هەی هەی جام مەی بە واڎە داران
حەکیم حازق ئاگای دەرد دڵ
ئاغەی باش بلوک تەوېڵۍ مەنزڵ
جادار جاگیر شای بەهائەدین
سەرحەڵقەی پیران قوتب سەرزەمین
ئالودەی ئەتباع ئەهل ڕۊحانی
(تایبُ الحِکْمَه)ی غەوس گەیلانی
چېش واچوون یا شېخ کۊی گەوهەر وە کۊ
وەسف من جە کۊ و، شەئن تۊ جە کۊ؟!
سەر موسەنیفان وە خەیاڵ بازی
فیردەوسی و حافز سەعدی شیرازی
مەلای تەفتازان ئەنوەری و جامی
(موتنەبی) و ئیستەخر شېخ نیزامی
ئەحبابان یەکسەر بوانان جە نۊ
دیسان شانامەی وەسف شان تۊ
وەرنە من کەم هۊش کورد کەم هونەر
بېسەواد، بېخەت، بېفام، بېجەوهەر(1)
دایېم هەر خەیاڵ نادانی وېمەن
جە کۊ تەوانای وەسف تۊ پېمەن
دایەی دەهر دوون چن حەمڵش کەردەن
زاتێ وېنەی تۊ هەرگیز ناوەردەن
مەدەد یا عەلی شای تەکیەداران
دین‌داران دینت وە چەم مەژماران
تۊ حەکیم حاڵ من ئەهل دەردم
گۊش بدەر وە عەرز مەزموون فەردم
تۊ پیر و ئوستاد کیمیای سەرمەشق
زەڕاب زەڕگەر، زەڕاب‌خانەی عەشق
من پوڵ مەفرەق ناڕەوای شاران
ڕووکەش وە دەرمان دەوای عەتتاران
عاسی و بەڎکردار وە بەڎ پەروەردەن
گره و جە کردار بەڎکاران بەردەن
ئەر بە مقرازگاز جەستەم وە یەک دەم
بەند بەند عازام جیا کەی جەهەم
بە لووشەی پیک جۊش کورەی سەنگ‌تاون
سەکەرات مەوت وە ئاڎەم یاون
وە ئاو و ئایېر چوون دانەی زوخاڵ
جۊشم دەی وە دەم وە جەزبە و وەحاڵ
تا تەمام یەکسەر وە زووخاڵم کەی
چوون تەڵای دووقاڵ تازە قاڵم کەی
بڕیزیم وە ئاو سەرم بۊ فدېت
نەتەختەی قاڵب سالکان وېت
ببوون وە شووشۍ تېزاب ئابدار
بشوون نە جیلوەی تەڵای دەستەفشار
جه و دما وە دڵ چە کوش کاریم کەی
وە زەرب سککەی وېت دیاریم کەی
مەر ئەوسا جە نۊ ببۊ ڕەواجم
سفیدی یاتاخ زاج وە مەزاجم
وەرنە تا مەحشەر پوڵ مەفرەقم
فریفتەی ئەفسوون دیوی ئەزرەقم
ناڕەوای مەخلووق ئەهل بازاڕم
شەرمەندەی دیوان (دارالقرارم)
دەخیل هیممەتیێ پەی دڵ‌وەشی دڵ
(قاڎر) فیدات بۊ یا پیر کامڵ.[1]