چناری هەوڵی
بەشۊ دەهەمۍ

چنارو هەوڵی، درېژەو گېڵنایۆ ۋیەردەینە، درېژەو باسکەردەو ئا کەس و سەردەما کە دیېنېش، شاعېرە نامڎارەکا مارۊوە وە یاڎ، بېسارانی، مەعدوومی، خانای قوبادی، میرزا شەفیع.
چنارو هەوڵی باس جە دوۍ زاما کەرۊن پەی میرزا ئۆلقاڎری کە هەرگیز ساڕېژۍ نمەبان، یۊشان کۊچکەردەو خېڵخانەو یوزباشی، ئەوی تەرشان فەرەنگی جە خوڎا دووری، کە بە تېخ نیشتەن کژ و پۊپش، فەرەنگی بۍ دین، بۍ نوور، زامانش ۋستەن نە جەرگش.
مەبەسو چنارو هەوڵی جە (فەرەنگی) سوپاو کافراو داگیرکەران، دیارەن بە داگیرکەردەی پاوەشاری دەسشان کەردەن بە تاڵانی و بڕیەی، پەوکەی داخۍ ئا غەدرەیە دلۍ دڵو چنارو هەوڵینە هەڵای مەنېنۍ.
میرزام جەو بۊنە دەروون داخ داخم
دایېم پەشېوحاڵ دڵ بېدەماخم
زەنجیر مەینەت شیەن نە پامان
پای والی زادان بڕیان جە لامان
ئاخم پەی دەوران قەڎییم ۋیەردە
پەی ئەو شاڎیی و زەوق جەی وەرتەر کەردە
قوڵەی میرجاف جوانڕۊم دیەن
وەکېڵ وەکېڵان حاتەم خۊم دیەن
سەی ئەحمەدم دی بەو کەماڵەوە
خاڵۊ ئاغەم دی بەو جەماڵەوە
مەحموود ئاغەم دی بەو گشت زاتەوە
ئېناخم دیەن بەو سیفاتەوە
موسەفا ئاغەم دی بەو لیقاقەوە
وەڵەدبەگ بەو زۊر تەمتراقەوە
ئیستە موحەممەد پادشای شارەزوور
بی بە جانشین خاقان و فەغفوور
ئای من چن نەمام نەو توڵم دیەن
زەمزەمەی میرزا ڕەسوڵم دیەن
چن سوپای بېحەد، بېسامانم دی
چن سوڵتان خاس، هەورامانم دی
چن بەگ، چن بېگلەر، چن میرم دیەن
چن شېخ، چن مەڵڵا، چن پیرم دیەن
چن غەواسی دوڕ، بەحری نیلم دی
موحکەمەی قازی جوبرەئیلم دی
تەهلیلەی سەیید مەحموودم دیەن
مەدرەسەی مەڵڵا مەسعوودم دیەن
پیر تاڵەبان ڕەویەڵەم دیەن
قوتب ڕووی جەهان تەوېڵەم دیەن
میرزا چن شوعرای تەڕ پۊشم دیەن
چن بازار گەرم خامۊشم دیەن
زەمزەمەی میرزا سیافم دیەن
میرزای بەینەتی دڵ سافم دیەن
مەڵڵای بېساران کۊگای گەنجم دی
ئاغەی داخ نە دڵ سوخەن سەنجم دی
یۊسف باسەکەی خاتر تەڕم دی
نیم نیگای دیڎەی کڵاوزەڕم دی
چن وەشی و چن شەوق، چن شاڎییم دیەن
خانای خاس خەیاڵ، قوبادیم دیەن
شەفیع بەو خەیاڵ، بەو گشت فەردەوە
موڵکە بەو هیجران ئاهی سەردەوە
مەعدوومی بەو کوڵ، بەو عیلم و شېوە
خەستە بەو بەینەت دڵەی پەشېوە
نە سۊزن، نە ساز، نە سۊسەن خاڵەن
نە بەبینەت، نە چېخ، نە سیاماڵەن
هەر دام وە سەردا پەی بەڎبەختی وېم
پەی تاڵەی پەشېو سیای سەختی وېم
ئاخ ئاخ پەی دەوران قەدیم ۋیەردە
پەی ئەو شاڎیی و زەوق جەی وەرتەر کەردە
حاجی حاجیان ڕای کاوەم دیەن
ماقووڵ ماقووڵان جە پاوەم دیەن
عولەما و قازی دین پاکم دیەن
چن شوعرای ساحیب ئەدراکم دیەن
چن هەزار نازک خەیاڵم دیەن
چن شەخس شیرین ئەحواڵم دیەن
چن مەلەک مەنزەر عولیان جاهم‌دی
چن حۆری تەلعەت خۊر لەقاهم دی
چەنە نۊجوانان نەوڕەسم دیەن
چن یانەی ئاباد دەربەسم دیەن
ئەی هوو، ها چن ساڵ من هام جە پاوە
چوون یەک دەقیقەن وەلای خوڎاوە
ئیسە ها دوو زام کاریم ئاوردەن
سارېژ نمەوان تا وە ڕۊی مەردەن
یەکێ خېڵخانەی یوزباشی بار کەرد
من مەندم پەی ئېش هەناسان سەرد
یەکێ فەرەنگی جە خوڎا دووری
مەردوودی کافری سیای بینووری
ئاما و نشت مدەی سەیر باڵام کەرد
دەس بەر ئەو عەسای سېخش بەر ئاوەرد
چوون گوناکاران پېکا نە جەرگم
گوڵگوون کەرد وە هون سەرتاپای بەرگم
ئیسە وەی دووزام گرفتارەنان
تەمام دڵ حەزین خاتر خارەنان
گەردونای گەردوون بکەردا کارێ
زوو باما پەیمان ئېساڵ وەهارێ
تا خېڵ خاسان دیسان هەم جە نۊ
باماوە پەی پورت هەرد شاهۊ کۊ
بۋینام بەینەت قەتارەی ڕاشان
چەم شاڎ بکەردام وە تۊز پاشان
سا با من وە سۊز دوعایێ کەروون
ئیلتجا وە ڕای لوتف حەق بەروون
تاکە ڕیشەی من نە خاک تاقی بۊ
تا چەشمەی هەوڵی منش باقی بۊ
بقەی موستەفا هەر پایەدار بۊ
عومر دەوڵەتش هەر بەرقەرار بۊ
تا زەمین و کوَڵ پشت ماهی بۊ
پەردەی بارەگەی لاتەناهی بۊ
دەک وە خەیر ئامای هامڕاز دەردم
بەخوڎا جە خەمان دڵ‌خاڵی کەردم
ڕۊیی هەزار کەس ئامان ۋیەردەن
هیچ‌کەس چەنی من دەنگش نەکەردەن
ئارۊ تۊ وېنەی حاڵزان حاڵان
جە ڕووی دانایی پەرسات هەواڵان
یە شەرح مەینەت یە حاڵات من
یە سفرەی بوخچەی عەجەب جات من
یە وەزع دەوران عومر تاڵ من
یە سەرگوزەشتەی ماه و ساڵ من
باقی وەسەلام موشەرەف کەردی
وەش ئامای وە خەیر قەدەم ئاوەردی
ئەهل دنیای دوون دەس دەس گشت ۋیەرد
پەی پورت عەدەم یەکسەر تەشریف بەرد
هەر کەسێ عەمەڵ وېش زاد وېشەن
ئەی خاکت وە سەر تۊ زادت چېشەن
(قادر) سا وەسېن هەنی گفتوگۊ
کافیەن ڕازان چەنی دار و چۊ
ئەسپ خەیاڵت هەر نە سەر کەشەن
بزان نە عاڵەم موختەسەر وەشەن
ئەرسەد کەلامت شیرین و ڕەندەن
چوون مەتولەن هەر نا پەسەندەن
بەڵام پەی تاریخ فەریدەی فەردم
سەنەی ماه و ساڵ ها بەیان کەردم
نە عەهد ئەیام پادشای نیک ئەوساف
یانی موحەممەد میر ماڵە جاف
ئبتدای نیەت جە ئینتهای یەوم
ماه موبارەک غوڕەی شەهر سوەم
هەزار و دووسەد نەوەد چەنی دوو
وە خامە مشکین باریکتەر جە موو
تەحریر بی تەرتیب نەزم ئەی نامە
بمانۊ تا ڕۊی یەوم ‌القیامە.[1]