گەرما دابنېشەرە:
گەرما، دا بنیشەرە، یەواش یەواش لوېنۍ ڕارە ڕوەو وەردەگا، قەراخو جادەیۆ بنەو نەرێوەنە لالۊ ڕەحمانم دی سەرەش نیابۍ سەرو خەرارەکەیشۊ (هەکە بڕێ بن خەرمانش چەنەبۍ) ، پرخەش چەنی خشەو گەڵاو نەرەکەی و شەماڵی تېکەڵ بیەبۍ، هەرچڼ من دڵم ناما هایش کەروە، کوچێ چەولاشۆ سەرو تەوەنېوە نیشتانېرە، داڵغێوە قووڵی بەردا پەی سەڎ ساڵا وەڵۍ پېڎابېیەیم، ئاوەختە سنوورو دەگێ تاکۊگە بیەبۊو چڼ یانۍ بیېباو هەریۊشا چکۊوە و چی هورکنیێباو چەنی چېگەنە ئەرە نیشتۍ بیېبا، بڕێ چی پەرسا جەزوانو ئەڎاو تاتەیمۊ پەیم ڕاسۍ بیێ، دلۍ مۆجەو دەلیاو خیاڵاتینە تەکانەو هەرەکەو لالۊ ڕەحمانی هەکە بەستەبېش تەوەنێ وڵینێوە ئاردانېشۆ بنەو نەرەکەی. لالۊ ڕەحمانیچ چڵاکیارە، تومەز هەرەکە وەڵۍ من چوون بۍ داڵغە بۍ، گرمەو ترومبیلەکەو حەمەلاویش ژنیەبېو هەم دیەبېچش، ترومبیل ئاما و بڕێ تۊزەش کەردە گژېمارە و وېیەرد، لالۊ ڕەحمان جگەرێش گیسنانە وەڵۍ مەرحەبایی منەنە، واتش کوچێ چەمېم گەرمۍ بیۍ، واتم نا، زوۆن وتەنی ئەها نیمەو لاشەیت کەوتەن وەروو وەری،
واتش ئای ئای ئیتر ئینە قسمەتاو ژیوایا وەرەتاو نەکەوتەن، خەرمانەو خەرمان گېڵو نزیکەو دە تەنەکېوە گەنمېم جە ماڵو خەیرەومەنڎا کۊ کەردېنێ، وستېنېم دلۍ تراکتۊرەکەو قاڎری، وېرەگا مارۊشاوە، هۊرزە بابلمۍ، واتم تۊ تەشریف بەرە من ڕوەو سەرە چېر ملو، ئاڎ لواو منیچ ڕوەو سەرەچېر دەگام جیا ئاسەتەو تاکو ئیسەیچ مەر بەسەردای بلوە پا هەوېڵەرە، هەواڵو لالۊ ڕەحمانەکایچم زانا، هەریۊ خاک و ئاوێ تەری گېرتۍ وېشوو چەنی وېش هاڕېش.
مەهدی میکە علی.[1]