داستانو حەیاتۍ و قاسمی
بەشۊ: نۊهەمۍ
قاسم زەماوندە کەرۊ!
ئازیزا فرە سپاس پەی گردیتا کە تاکو ئاخروو داستانەکەی هامڕام بېیەیدێ. چی بەشەنە، لکەی ئەسڵیەو داستانەکەی کریۊوە و گرد چېو ڕۊشن بۊوە.
پەی هاگاڎاریتا ئی داستانە بە ڕەوایەتوو هەقێقەتێوی کە بېیەن نویسیانۆ، بەڵام بە جۊرێوتەر. گردو کەسایەتیەکا نامۍ ڕەمزیێنێ هیچ بېیەی واقێعیشا نیا.
ئاندەش نەبەرد سەرو قەراروو هەر دوەلای زەماوەندەکێ ڕېکە وزیا. خەڵک چیلا و چۆلاوە خۆڵکە کریابێ و زەماوەندە گەرمە کریا.
دوەم ڕۊ زەماوندەکێبێ، وەیوەشا ئاردە پەی یانەو قاسمی، وەروو بەرەکەو یانەو قاسمی چەنیت وسێرە نەگنېرە زەمین.
لالۊ نالە بە دڵ و گېیان هۆرپڕێ و سەمای کەرۍ. دەنگو وەیوەی باڵابەرزی یاوێ تاکو نسارەی وارین. ئەداو قاسمی بە دوە فەقیانەکەیش ئاندە سەمایش کەردەبۍ ، ئارەق جە دەم و چەمشەنە پېسە وارانی تکێرە وار.
وەیوەشا سوارەو هەسەرێوێ کەردێبێ. مەوجێوە سوورەشا دابێ سەرو کۆپانەو هەسەرەکێرە و تۆڕێوە ڕەنگاورەنگەشا دا بۍ سەرەو وەیوېرە. چا وەختەنە، سەرو هەسەرەکێوە وزناشارە، لالۊ نالە و مسەفای تاتەش، ئی لا و ئۆ لاشا گرتێبێ.
قاسم چۆخوڕانەکێوی ژەرەژی کە ئەدایش ڕېستە بێ، کەردەبېشەنە. سەرەش ڕوەنش دابێ وەنە و برێقە دېوە. حەیاتە وەختێو نزیکش کۆتۆ، چیرو تۊڕەکێنە دیا سەرتاپایشەرە.
چۆخەوڕانکەکەش فرە بە دڵ بێ، پسەکېش لارە نەبۍ. دیاربێ ئی جارە ئەداش خاسش ڕازنابێوە. قاسم وەختێو حەیاتەش دیە تەماشەو جۆخ و ڕانکەکەیش کەرۊ، زوو زوو دەس بەرێ و دیێ پەی پسێ ڕانکەکاش بزانۆ لارە نەبېیېنە!
چا وەختەنە قاسم و حەیاتە دەسشا نیابێنە دلێ دەسا یەکتری، ئەداو قاسمی جامۆڵێو چکلیتیش کەردێ سەرەو هەر دوەیەرە. خەڵک بەشێوش هۆرپڕێ و بەشێویچش سەمای کەرۍ و گرد کەس وەشیش پۆوە دیار بێ. سەرو بانو قەراخو مەیدانوو هۆڕپڕاکەیۆ جەمېو ڕیش چەرمێ، چەنی سەعەی نیشتێ بێنېرە و تەماشەو زەماوندەکێ کەرېنێ.
چېوێو کە پەی خەڵکی یاگێ سەرنجی بێ، سەعە جە نیمەرۆوە دیار نەمەن.
وەیوە و زەما جە دەربازەکەو یانەو زەمایەنە لوێ سەر. نانوو زەماوەندێشا نېیا وەروو دەمیشا و قاسم و حەیاتە ئەوەڵین خوانەو نانیشا پێوەرە واردە.
دێرش کەردەبۍ و دۆروو مەغریبی بێ. مێمانەکێ گرد خوڎا حافێزیشا کەرد و لوێوە. ئیسە ئیتر تەنیا قاسم و حیاتە و ئەدا و تاتەو قاسمی و دوە واڵەکەش مەنێبێنێوە. ئۆ یەرە واڵەکەیچش تاکو دێرێوۆ چا بێنێ و ئاڎیچێ لوێوە پەی یانەکاو وېشا.
چا وەختەنە وەیوە و زەما لوێ دلێ ئا هۆدەیە کە پەیشا حازر کریابێ، دلێ داڵانەکەو واریەنە دەنگە دەنگېو پەیدا بی. سەعە مامۊ حەیاتێ، چەنی کابرێوی ڕیش چەرمەی کە ساکێوی سووری دەسی دەسشۆ بێ، وېشا کەرد بەرەرە.
ڕەزا بەهمەنی.[1]