چی مەشۊم ڕۊمانەو (چنارە) ی بوانمېوە؟
بەشۍ: یەکەمە
ئی وتارمە چی نویست؟
چن ڕوێو چېوەڵتەر وتارێوەم نویست سەرو ڕۊمانەو چنارەی، نویستەو م. ڕەزا بەهمەنی، ئەپی تیترە: (چن وەڵامێ کوڵێ پەی ئی پەرسێ: چی ڕۊمانەو چنارەی ڕۊمانێوە زەعیفەنە؟) شۆنوو ئانەیرە وتارەکە بە دەسو وانەرا جم و جووڵش پەنە کریا و فرە شەیر کریا، بڕېو جە وانەرە ئازیزا و بەشێوە فرە جە وانەراو ڕۊمانەو چنارەی، بەهەڵە یاوێبێنێنە ئەسڵوو مەتڵەبی، ئینەیچ هەر بۊنەو ئانەیوەن کە بە داخ و نیگرانیېوە فرەوە، فەزاو هۆرامانینە و بە تایبەت‌تەر، فەزاو ڕەخنەینە، پا جۊرە کە مشۊ و مەبۊ_ن هەڵای مەزانمێ ڕەخنە چېشا و زاتوو ئی چەمکی، ڕەسالەتی سەرەکەیش چە چیوانێ گېرۆوە. ڕەخنەگرە وەڵینەکێ دد٘انشا نیان پینەیرە وەختێوە ڕەخنە مێ و سەرو بەرهەمێوە قسێ کەرۊ و ئەوەوانایش کەرۊ، دیارا ئی دەقە پتانسیێلوو ئانەیشە بېیەن کە سەرش قسێ کریا. بە مانایېوە تەر؛ ئی بەرهەمە ئاننە خاسیش هەن کە ڕەخنە بەش بە حاڵوو وېش لایېوە کەرۊوە پەی بەشێوە جە لایەنە لاوازەکاش و هەوڵ مدۆ ئەر خەسارێوەش چەم پەنە گنۆ، حەتمەن نیشانوو وانەری و نویسەریش بدۆ. من بە ماوەو ئی چن ساڵەی هەرچی وتارم نویستەبۆ سەرو دەقە هۆرامیەکا، دیارا بە گرد٘ی سەرو شیعرێ نویستەنم و حەزم نەکەردەن بلوونە بەشەکای تەری، بە تایبەت ئەدەبېیاتی داستانی. وەلێ بە سەرنج دای پەی موتالاو وېم کە ساڵانێوە فرەن ڕۊمان وەنېوە عالنا و بە تازەییچ ڕۊمانەو چنارەیم وەناوە، بە حەیفم زانا سەرو ئا بەشا کە بەحسم کەردێبێنێ وتاری وەڵیننە، قسێ نەکەروو. لایېوە تەرەو هەر چی ڕوانە پی دەسکۆتی یاوانی کە بە ڕاسی هۆراماننە وانەری تێژ و ورد٘وینما فرە فرە کەما. شۆنوو وەڵا بېیەیوەو وتارەکەی (هەر ئانە کە سەرۆ ئیشارەم پەنە کەرد) سەرنجەو بەشێوە جە کامێنتوو ویر و ڕاکام دا و بەعزێ جە وانەرا شکایەتوو ئینەی کەرېنێ کە مەبۊ جارێ بەحس کریۆ سەرو ڕۊمانەو چنارەی، پینەی داستانەکێ لۊ نەدریۆ و ئا کەسا کە هەڵای نەوەنێنەشاوە یا هەڵای ڕۊمانەکېشا نەتەمامنێنە، با خەبەرداروو عاقیبەتوو داستانەکێ نەبا و جە زوانی یۊ تەریوە نەیاوا پینەی کە عاقیبەت و ڕۊزگاروو کەسایەتیەکا چېشش سەر مێ و وېشا ڕۊتوو وەنایوەنە یاواش پەنە! یانی تاکو ئی حەننا ئاماتۆر! یانی وانەر تەنیا ئامان بزانۆ ڕیک پېسەو حەکیەتێوە کۆتاییو ئی چیرۆکێ چېشا! باعیسێ تەر پەی ئی بابەتی ئانەن کە بەشە پۆزەتیف وئەرۍنیەکاو ئی ڕۊمانێ فرێشا هەنێ وەروو چەماوەو و وانەر ئیتر مەگەر فرە گېلبۊ نەوینۊشا؛ کە پاسەن وەختێ من مەو سەرو لاوازی ئی ڕۊمانێ باس کەروو، ئەپی مەعنانە کە بە خاسم زانێنە و تەنیا ئامانا ئا لاوازیا کە لەتمەشا دێنە خاسیەکاش واچووشا، چوون باری خاسیش گرد وانەرێ فامۆش و یاڤۆشنە، وەلێ پاسە دیارا کوتوو فرەو وانەرەکا مەزانا خاسیش کامەن و هەر پی بۊنەوە ئامانی چی وتارنە بە کوڵی باسوو بەشێوە جە خاسیەکاو ڕۊمانوو چنارەی کەروو پەی ئا وانەرا کە مەزانا ئی ڕۊمانێ چی خاسەنە! ڕەنگا ئەر یاگێوە تەر و دۊخێوە تەرنە ژیوێنمێ، لازم بە نویستەی وتاری چینەی نەبېیایا وەلێ ماچوو: هەر ئینەی مەجبوور کەردا ئی وتاری سەرو خاسیەکاو ئی ڕۊمانێ بنوېسو.
فەرشید ڕۆستەمی.[1]
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ 470 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!