شینێ پەی مەسعوود عەباسی
نویستەی: #جەلیل عەباسی#
فەڵەک جەرگش دەن وە مەودای چڵدا
کام خاتر ڕېشیش بی نەتۆی دڵدا
دەورش ئی تەورە ئی جەورە ئاوەرد
من حەسرەتمەند کەرد تۊ بەو دەردە بەرد
واچدێ پا گڵکۆ تازەیە، ئی مێمانوو ناوەختیتە فرە ئازیزا فرە. تۆشێوە جە خەمی و حەسرەتیش بە دیاری چەنی وېش ئاردەن.
واچدێش پەنە، قەدرش گېرە، قەدرێوە شایستەو نازارایەکەیشبۊ.
هۆۆۆۆۆۆ نازارە ئازار چەشتەکەم
ئانە بارو سەفەرو ناوەختیت کۆگە پېتۆ؟
ئینە کەی وەختو وادەو سەفەری بۍ مەسعود گېیانەکەم؟
مەسعود گېیان، نازار گېیان
ئانە چېشت کەرد هەی بۍ بەڵا بای
چیت جیا ئاستا بۍ من کۊ لوای
ئازیز گېیان
خۆ هەڵای بە دەم و لەفزە شیرینەکەیت جوابوو دمایین نامەیت نەدابێنێوە، کۆگە لوای ئی ناوەختە؟
نازار گېیان
ئیسە کێ دڵوەشیم دۆوە بۍ تۆ؟
کێ خەمبەرکەرو دڵی مانیایمبۊ بۍ تۆ
کێ دڵم وەش کەرۊ بە گفتولەفزە شیرینەکەیش؟
ئااااااخ ئازیز گېیان
ونەکێ لاشەی کۆیایت نەشۆریوە تاکو بەریش لاو بەهمەن گېیانی و سەلیم گېیانی. تاکو نیشانەشا دەی و واچی ئەها منیچ پېسە شمە دەسودیمو ونێم گرت و نماو ونێم بەستەرە.
ئاااااخ نازارە ئازار گرفتکەم
ئەجەل چەنی دڵش ئاما پا بێڕەحمیە جە منت بسانۆ؟
ئەی ئێتر کێ واچۆ: مامۊ گېیان ئانا کەوتا ڕا پەی لایت؟
ئاخر، چەنی دڵت ئاما چی غوربەتە تاڵەنە جیام بازی و بلی پەی دلێ بەزمو ئازیزەکا لا وەنا؟
ئەجەل هیچ ویرش جە تەنیایی من نەکەردۆ؟
هیچ بەزەیش ناما چەمەڕوانیی تاسەمەندانەو منەرە؟
نازار گېیان
چەنی دڵت ئاما بەگۊشو ئەجەلی کەری و من تەنیا بازیۆ؟نی تاوات دڵی کەیلاو خەمام پەڕ کەری حەسرەتو نەبېیەیت؟
مەسعوود گېیان، نازارە ئازار چەشتەکەم،
چېش واچوو؟چېش کەروو؟ چەنی چېرو ئی باری قورسو خەمینە بەر بەروو؟کێ دڵوەشیم دۆوە دماو تۆ، کێ؟
ئاااااااخ ئازیز گېیان
هەرسەکێم، چی غوربەتەنە و خەمو بۍ تۆیینە گەردەنو گەردوونی گەورە گەڕیشا فیسنان و مەگەر هەر دڵو وېم و ڕۊحی پاکو تۊ وینۊشا.
ئازیزەکەم مەسعود گېیان
واچە خواڵەی ئاگاش لاشە کۆیاکەیتبۊ..
واچە سەلیم گېیان شانوملت شێلۆ و بەهمەن گېیان ونە سوورەکێت بسەڕۆ.. واچەشا پەنە هەناسەو حەسرەتەکاو جەلیلیم چەنی وېم ور گرتەن.
سەفەری ناوەختت دڵش سۆچنانێ و ڕۊحش زامار کەردا و زوانش جە گۊ وستا
واچە خواڵەی یاگێوە نەرمەت پەی ڕازنۆوە با کۆیایی جەستەی نازاریت سەیۆوە، واچە تند تند فشارۆتەنە باوشێ گەرمەو وېش با زامەکێت ئاودز نەکەرا.
لوای بۍ من و چی قاقڕستانو بێدۆسییەنە تەنیات ئاستانێ، ئیسەولای مەگەر یادەکێت چراوەو دڵیم گیسنانە وەگەر نا، دنیا بۍ تۊ تاریکەنە.
ئیسەولای دووریتەنە هەر ناڵەو شیوەنیم بەرزا:
ناکام ئەییام کامەرانیم ڕۊ
قوربانەو لاشەی کۆیایت بوو نازارە ئازار گرفت.[1]