هۆرامان جە کېشمەکېشی سیاسیۆ تاکو نافەرمانی مەدەنی
چل ساڵێ وېیەرد. چل ساڵێ، ڕەنج و ئازار، جەنگ و ئاوارەیی و بۍ دەرەتانی و لەم ئاورایی وېیەرد.
چل ساڵێ دەسەڵاتو سېیاو و جمهوری ئیسلامی کە بەرەکەتەکەش بېژگەم، ئێعدام، ئێعتیاد و وێ ورەتەی ژەن و کناچە کەم تەمەنەکا، جە سەراسەرو وەڵاتینە هیچیتەر نەبی.
چل ساڵێ، وەڵا کەردەی و پەرەپنەدای بە فەرهەنگو درۆزنی و دوەبەرەیی و خەڵەتنای خەڵکی و مۆقەدەس کەردەی خۆرافاتی ، پەی یاگەگیر کەردەی فەرهەنگو شادی و مەدەنی خەڵکی، وېیەرد.
بەڵۍ چل ساڵێ پا جۊرە وېیەرد، بەڵام پەرسەکێ چېشەنە؟
ئایا ئی چل ساڵەو وېیەردەیە، هۆرس و کۆتو خەڵکی پەی وەراوەری کەردەی چەنی ئا بەرەکەتیە چېش بېیەن؟ ئایا خەڵک چی ماوەنە، دەسش نیان سەرو دەسیشۆ و ڕوەش کەردێنە ئاسمانی و شۆکرانەو بەشێش کەردەن؟
بێ گۆمان نا پاسە نەبېیەن.
جە تولو تاریخیەنە هیچ سیستم یا ڕژیمېوی فاسد و دیکتاتەور پێڎا مەکەری کە ڕاش ئۆ خەڵکی کەردێبۆە تاکو خەڵک بە ئاواتەکاش بېیاوۆ، بەڵکو ئانە خەڵک بېیەن بە وێ بەخشی و بڕېو جارێچ جە گېیان وېیەردەی وېش، جە دەسشۆ ئەسانش.
ئەر تۆزێو مۆنسێفانە ویر کەرمېوە، مېیاومێ پانەیە کە هۆرامان جە فرەو بوارەکانە هەمیشە هەنگامێوە وەڵێ دۆرو بەرەکەیش بېیەن. بە هەزاران ساڵێن، هیچ دەسەڵاتێو و هیچ تیر و تایفێو نەتاوانش شاڎی وەشی جە هۆرامان بڕۊ و لاش بەرۆ.
خەڵکو هۆرامانی سەرەڕاو کەم دەسی و نەبېیەی تەمامو کەرەسەو ژیوای، هەمیشە جە شاڎیی و زەماوەڼەکا یەکتریەنە شەریکێ یۆی بېیېنۍ و هۆرپڕای و ڕەشبەڵەک جە وچکلەتەرین دەگایشنە باو بېیەن. هەمیشە پەی هەر جەمۆبیێوی بەهانېوەشا ئێستێنۆ تاکو بە شاڎیی و شۆق، ڕوەکېشا تەمامنا. تەنانەت چی دەسەڵاتیچەنە بە دەیان جارێ هۆرپڕە و شاڎی و زەماوەڼۍ خەڵکیشا تێکێ دێنێ، بەڵام ئانە خەڵک بېیەن بە حۆرمەت گرتەی جە فەرهەنگی وېیەردەیش کە بەشێوی فرەش یاگێ شانازی گرد هۆرامیویەنە، تاوانش بە مدرامان و نافەرمانی مەدەنی، بازۆشۆ و پەرەش پەنە بڎۊ.
نمونێ فرێما هەنێ. تێکەڵ بېیەی ژەن و پیای جە نۆرۆزەکا هۆرامانو تەختیەنە و پاڵنگانەنە و هەرپاسە هۆرپڕای ژەن و پیای جە بازی نمەڎو شۆشمێنە.
ئی دەسکۆتێ هەرچن دەردەو خەلکی دەوا مەکەرا، بەڵام تیشکو شۆڵەو ڕۊجیارێویا کە جە دەلاقەو یانېوی تاریکیەنە مەێ چوەر. ئینە خەڵکی بە هێمەتو وېش بە پېچەوانەو ئیدئۆلۆژی و کردارو دەسەڵاتیۆ بە دەس ئاوردێنێ.
وەش بېیەی، یانەو سیاچەمانەو نۆسوذێ و ئا جۊرە جەمێ، گۊشێوی گۆلانێنێ چی دەسکۆتا. من قسێم سەرو کەم و کۆڕیشا و نۆقسانیشا نېیەنە و خاسیچ مزانو کە هیچ جەمۆبیێو چا وەڵاتەنە مەکریۆ تاکو جە فیلترو اطلاعاتیەنە ڕەڎ نەبۊ، بەڵام ئی کارە بە هێمەت و دڵسۊزی جەمېو جە جوانا شارەکەی کریان، کە یاگێ دەسوەشیەنە پەی گردیشا. دیارا ئی کارە فەرهەنگیێ و ئی جۊرە دەسکۆتێ، مەبا بە نان و ئاوی هەمیشەیی پەی خەڵکی. تاکو زەمانێو ئی ڕژیمە فاسدە گېیانش چەنە مەنەبۊ و تاکو زەمانێو سیستەمېوی عادڵانە، سەرو حەقە بنەڕەتیەکا خەڵکی نەنریۆرە، هەر ئا وەزعێ هەنە و ڕۊ بە ڕۊ خرابتەرەیچبۊ.
ڕەزا بەهمەنی.[1]