خوڎا تا کۋۍ نەوینۊ، ۋەرۋەشا نمەوارنۊ ملەرە
خوڎای گۆرە خالقو بنیاڎەمی و گردو مەخلووقەکان، هەر وېش نەخشەش کېشتېنۍ و وېچش مشناسۊشان. هەرچی قەرار مڎۊو هەرچۍ کەرو ئیللا حیکمەتێش چەنەن، بۍ هونەر نېیەن. پېسە واتەنشا هەرمانۍ خوڎای زەریفېنۍ، بۍ عەیبېنۍ.
هەر کەسېوو هەرچیش وەنەقۊمیۊ، هەرچیش مەی ملەرە شایانشەن، چوونکوم خوڎای قەرار دان، مەبەسمان ئا هەرمانۍ نېیەنۍهەکە خەڵک بە ئارەزو وېش کەرۊشاو ویرو قەبرو قیامەتی نمەکەرۊ، مەبسمان جە قسمەت و نسیبېیەن، بارو ژیوای خەڵکیەن. پەی نمونەی کابرێوە هامسەرگیری کەرۊن، بەڵام قۆم و قیلە ڕازیۍ نېیەنۍ، ئاڎ هەر سوورا سەرش، دمای زەمەنێ بەرمەگنۊ هەکە هەردۋۍ هامشانۍ یۊینۍ، خوڎای خاس ئەشناسێنۍ، خوڎای وینان و ئەشناسان پەوکەی ژەنێ پېسە وېش پەی کیاستەن، خوڎا هەرگیز غەدر نمەکەرۊ هیچ کەسێ.
یام کابرێوە فەقیر و بۍ دەسەڵات خەڵک خێرەش پەنەکەرۊن، بەڵام پڕێنە بە گېڵای چەرخی مەیاوۊ بە زەڕی و دەسەڵاتی، تەبېعەتش فاڕیۊ، وۍ زلی مرمانۊ، مەرحەبای کەسی نمەکەرۊ، ئیتر خەڵکی یەکسەر ئی پەندېشا ویرە مەگنۊوەو ماچاش، خوڎای خاس ئەشناسابۍ.[1]