نامۍ: ناسر
نامۊ تاتەی: موحەمەد
ڕۊ پېڎابېیەی: 1962ز.
ڕۊ مەرڎەی: 2020ز.
یاگۊ پېڎابېیەی: #تەۋېڵۍ#
یاگۊ مەرڎەی: #تەۋېڵۍ#

$ژیۋاینامە$
ناسر موحەمەد کەریم، ساڵەو (1962ز.)
جە شارەکڵەو (تەوېڵۍ) پېڎا بېیەن، هەر ئەچاگە لوانەنە وانگای سەرەتایی و قۊناغەکېش بڕیېنۍ و دماتەر جە ساڵەو (1979ز.) پێمانگاو کشتوکاڵیش جە بەکرەجۊ، شارو سلېمانی تەمامنان. پېسە فەرمانبەرێ بېوېنە و دڵسۊز و خەموەری جە هۊبەو کشتوکاڵو بېیارۍ دەسبەکار بېیەن و یۊ بېیەن چا کەسە ژڵېو و
دڵسۊزا کە تەمەنو فەرمانبەریشەنە یاگە دەسش دیاربییەن. ئی شاعېرە هەس و ناسک و ناخ پەڕ جە واچە مرواریە، دۊسو ژیوگای، یەکەم ڕۊ پاییزی ساڵەو (2020ز.)، بە هۊکارو نەوەشی سڼانی یانەئاوایی یەکجاریش جە دنیێ کەرڎەن.
چن نموونێ جە شېعرەکانو کاک ناسر موحەمەد کەریمی:
خەمەکېم:
ماچا دێڕەکېت چی خەماویێنۍ
یا هاوارەکېت، بەرزتەر جە وېشا
واتم: خامەکەم فێڵاوی نیا
گەر کەرۊ باس و ئی گرڎو ئېشا
ئەر گېڵی دلۍ دېڕەکامەنە
زېیاتەر جە بەشېم، خەمېم کۆتېنۍ.
ئی شېعرۍ ڕېککۆتو (16_04_2020ز.) نویستېنەش.

وەرو چەما:
ڕۆت و لەنجەت چن وەش گنۊ؛
وەرو چەما!!!
زوڵفێ وەشێت ونارێنێ نمارەشا
وەرو چەما!!!
ملەوان و گەردەنیتۆ موورێ کەوېم کۆتە
وەرو چەما!!!
کەم بزیەرە وەرو بەرەی بەخېڵېنێ!
وەرو چەما!!!
مەرحەباکەت ئیشارەبێ دەسێت وستێ
سەرو چەما!!!
جوابم، بې، جېیاتی جارێوی سەد جارێ
سەرو چەما!!
قەسە سەرت گەر کوشتێما، بە مەرحەبا؟
سەرو چەما!!!
داواکەرە، داواتەنە، گرڎ داواکېت
سەرو چەما!!!

کۊ پڕا:
یانەکۆ دڵیم، سەر ڕېژ جە خەما
چن سەردو سڕا
خەڵکی دڵ وەشا، ماچا وەهارا
پێ من کۊ پڕا
با وەهاریچ بۊ، پایین و کەشا
ڕەنگین برمانۆ
تەنها گۆراڵێ، ڕازۆ پەنهانی
وەهاری زانۆ
ئېشېم مانیێنێ دلې دێڕانە
ڕاشا مەباوە
پەنجەکې دەسیم، تەنها پێ جگەرەی
باوشی کەراوە
با بە پێکێو تەر، ئېشەو ئېشەکېم
گرڎ سڕێ بانێ
تەمۆ ماتەمو، ساڵا وېیەردێم
سەرۆ لادانێ
وێچم مەزانۇ، پی گرڎ ئېشاوە
چنی مژیوو؟ چنی مەنەنا؟
تۆ واچی چەمېم، دروێ نەڎانێ، من
شکەم هەنە کە نەمەردەنا
ڕەنگا پەنجەکېم، دامەنو نازو
تۆشا گرتەبۆ
نەرمە نیگاکېت، بەرۆ مەرگیشا
جە من بەستە بۊ.
کۊبەرهەمو شاعېر کاک ناسر موحەمەد کەریمی، جەمکریان و چاپ کریان، بەڵام هەتاکو ئیسە نەلانەنە وەردەسو وانەرا و ڕۊشنویرا.
ئەسعەد ڕەشید.[1]