قاعدیٛ ڕازوانی چکوٙوە مەیانیٛ؟
نویستەی: #ناجح گوڵپی#
وەڵتەر باسما کەردەن کە ئانزان جەڎەیی، ناهاگایانە، نا هوٙشیارانە بڕێ زانیارییٛش هەنیٛ سەرو ڕازوانی و واتچنو زوانەکەو ویٛش، وەلێم نەڎانما وەرو ئەقڵو ویٛما چەنی و چکوٙوە ئی زانیارییٛما پەیدا کەردیٛنیٛ. ئینە لایێن جە گیروٙدەیەکەی. ئەگەر ویریٛ بکەرمیٛوە بزانمیٛ زاڕوٙڵە چەنی زوان مەگیٛروٙ و چەنی یاساکاو زوانی مسوٙنە، ئاوەختە وەرچەمما ڕوٙشنەن و زانیارییٛ فریٛما گنا چیٛرو دەسی. زاڕوٙڵە زوان مسوٙنە جە وەرو پەشتیش، جە ئەداو تاتەیش، واڵە وبرایش، جە بەرو هامسایش، جە وانگانە...ئینە بەشیٛوی گرنگەن جە زانشتو مەعرفەی Cognitive Science کە ڕازوانی بەرهەمئاوەریچ بەشیٛن ئەچی زانشتیە. پاسەبی یاساکیٛ ڕازوانی کەم تا فرە جە وەرو پەشتیماوە جە ئەڎاو تاتەی و برا و واڵەیماوە مسمیٛشا، ویٛکەرد مسمیٛشا، دماتەریچ بڕێ تەریٛشا فیٛر مەبیمیٛ. خوٙ جەڎەیی گردو قاعدەکاو زوانی نمەمسمیٛ، ڕەنگا بڕێوە ئاسانیٛشا بزانمیٛ، وەلێم وردەکاری زیاتەر دمایی ڕاو فیٛربیەیوە پەیما بەرمەگنانیٛ کە زانایانو زوانی میٛزاشاوە.[1]