‍ هەمان نامیٛ، هامنامیٛ
نویستەی: #ناجح گوڵپی#
کاتیٛ یەک ساختار جە نویستەی یام دوای دویٛ مانای یام زیاتەریٛش هەنیٛ، پیٛسەو (قەراخ)ی، قەراخو دەرەی، قەراخو ئاویٛ، قەراخو نانی. یانی قەراخ یەک ساختارەن و چندە مانایێ جیای مەبەخشوٙ بە پاو یاگیٛ بەکار ئاوردەیش. پسەبی هامنامیٛ تاریخ و ماناشان جیان جە یوٙی. نمونی هامنامیٛ: تەنک: ئاوەکیٛ تەنکەنە، گجیەکەش تەنکەن، شەتڵەکیٛ تەنکەنە. دویٛ واتیٛ یام زیاتەریٛ، درکنای و سپێڵ و ئیملا و دەنگشان پیٛسەو یوٙی بان. وەلێم ماناشان جیاوازە و تاریخو پێدابیەیشان جیاواز بوٙنە، زەمانە پاسەشە کەردەن کەهەمان ماناش ببوٙنە، پەنەش مەواچان هەمان نامیٛ. ئی واتیٛ جە دویٛ وەچان دروسە بیێنە، وەڵوەچو Homo ی یانی هەمان، دما وەچو nym یانی نامیٛ، منیچ بەهەورامی نامێش منیەو هەمان نامیٛ (words with the same spelling and pronunciation, but different meanings and separate history). نمونیٛ چی بارەوە (قیٛڕە: یەکدەنگ و یەک ئیملاو یەک درکنایش هەن، وەلێم چوار مانای جیاوازیٛش هەنیٛ، قیٛڕە: یانی قیٛڕە و قڕەو دەمەقاڵیٛ. قیٛڕە: یانی گونش وەستەنرە وارو قوٙڕبیەن کە جوٙریٛن جەنەوەشی فتقی. قیٛڕە: نەمام، شەتڵە، درخت گەشەنە بمدروٙ و گەورە نەبوٙ مەواچان قیٛڕە بیەن. قیٛڕە: یانی دەنگو پیای کە ناڵەو هاوار مکەروٙ، چەپەوانەو دەنگو ژەنیٛ کە قیژەن یام چیقەن. (برک: ئیٛشو دڵی. مازی. برک: دەسەک، تیٛڵا، برکێم پێچناچۆ. بوٙ: بوٙپەی ئیٛگەی، بوٙ: بوە، عەتر)، کەڵبە: کەڵبە هەنجیر، هەنجیری نەیاوا، کەڵبەو بایجانە سورلا کە هەڵای کاڵەن، کەڵبە: دڎانیٛ توتەی و وەرگی و چەقەڵی. ماش: ماشە سیاوە، ماشەچەرمە، پەی واردەی، ماش: گلێرئەوەبیەی زوێڵو خاشاکی سەرو ئاوەو دەرەی، جویٛ، یام وێت وەشش بکەری پەی ئەوەگیٛرتەی میوەجاتی کە مەڕیٛزوٙنە دەرە. بەر: بەرو درختی، سەمەر. بەر: جبەر. بەر: بەرهەم: نەتیجە، بەروجوانیت نەوەری. پەڕ: یانی کاسە پەڕبی چەنەش مجیوٙ. یانەشە کەوتەن پەڕو دەگایوە. گجیەکەش پەڕشەن. پەڕانپەڕ ئی باخە هنو منەن، پیٛشە: پیٛشەو خورماویٛ. شیٛڵانیٛ، پیٛشەو لاشەو گیانەوەری. بەنڎ: بەنڎو دڵی، بەنڎو کەشی، پشک یەک واتەن و دویٛ مانێش هەنیٛ، پشکو گوشتی کاتو قوربانینە بەش بەشش مەکەری، پشکو کونەو هەڵیزی، لتە چوٙڵکێوە کەری وەڵەکیٛرە کە هەنە پۆ کونەو هەڵیزەکەیوە، پەی ئانەی ئاویش چەنە نەشوٙ. سەرنجە ئی دووە مانای بدە چندە دوریٛنیٛ جەیوٙی. ئی هەمان مانا زوانو ئیٛمەنە پەی فرە مانایچ مەگونجیش، چون یەک واتەن، یەک فۆرمەن وەلێم چندە مانێوەش هەنیٛ.[1]