ساوەر کوای جە هۆرامان
هۊرئەوەگېڵنای و ئاماڎەکەرڎەی: #ئەسعەد ڕەشید#

جە هۆرامان، (ساۋەر) یام (پەتڵە)، ڕزقێ گرانبەها بییەن، گرڎ ساڵێ، هەر یانێ بەپاو تەوانا و پېویسی وېش ساۋەرش کەرڎەن پەی زمسانی. گەنمۍ (خەلە)ی پاک و دڼە گۆرۍ، دمای گرینایشان، دلۍ دۊڵۍ تەوەنینېنە مەکواشان، کاتو کواینە پووشۍ تۊکڵەکاشا جیێباوە، دمای جیاکەرڎەیۆ پووشەکاشان، دیسان سەرو بانی، یام دلۍ ساناڵېنە مڎاشان وەرو ۋەرەتاوی تاکو خاس وشکۍ مەباوە، دماتەر بە هارە (دەسهاڕە) مەهاڕاشان، ئیتر ئاماڎېنۍ و مەکەراشان بە چاشتی، شۊرباوی، قبووڵی، یەکاوە.
ساۋەرکوای فرەش پەنەمشۊن، ماڼیایش گەرەکەن، جە هۆرامان ئامرازو کوای تەنها دۊڵەی تەۋەنینە یام دۊڵەی دارینەنە، کە دەسەو دۊڵەکېچ، تەۋەنینە یام دارینەنە.
ساوەر خاستەرین و عالتەرین واردەو هۆرامانین، تینی مڎۊ بەڎەنیشاو پەی سرووشتە سارد و سڕەکەو هۆرامانی گونجیا و سازەن.
ئاماڎەکەرڎەی خەلەی پەی ساوەری:
مەشۊم خەلەی عال و جوان هۊرچنیۊن، گەر پاکیچ نەبۊن، ژەنەو یانەی بە (وېچنە) وېچۊشو پووش و پەڵاش و پیسیەکەیش جیامەکەرۊوە، دماتەر (کەرۊش ۋارە) پەی پاککەرڎەیۆش جە پووشی و تەپ و تۊزی، دماتەر چنیەی (مرۊ)کەو دلېش، بە تەمامی پاک مەبۊوە. ئیتر حازرەن پەی گرینای و کەرڎەیش بە ساوەر یام ۋڵۊشۍ.
نانی هۆرامی:
هەرپېسە هۆرامان بە وەزی نامبانگش لوان، هەرپاسە هۆرامییەکۍ بە (نانی هۆرامی) نامبانگشان بەرکەرڎەن. ژەنۍ هۆرامانی، بە دەسوپلېنۍ، ماوەو یەک کاتژمېرینە، تەشتێ هەمیر پەچان و کەرانەش بە نان.
ژەنەو هۆرامانی چن کەرەسێش پېویسېنۍ پەی نان کەرڎەی، ئاڎیچۍ ئینېنۍ:
-ئاردی بە پېزۍ
-هېڵەکە: پەی وېتەی ئاردەکا.
-تەشت: پەی هەمیر شېلای.
-مەسۍ: پەی پڕچنای هەمیرەکەی و بە گۊنکە کەرڎەیش.
-پنۍ: پارچە تەختێوە قایمی خڕ، سەرو یەرۍ قاچە داریناوە نریۊرە، گونکەکۍ وزیۊ سەرش و بە دەس پانەکریۊوە.
-ماڎۍ:بە پەڕۋۍ وەشەکریۊن، جە قەبارەو نانەکەی گۆرەتەرە، گونکەکۍ پانەکریۊوە سەرشۆ و دریۊ ساجەکەرە.
-سەردۊڵە: پارچە پەڕوێ، یام قوماشێ پانەن، پنەکېش سەرۆ نریۊرە و ئاردی کەرا سەرش، یانی ئاردەکۍ مەگنا چېرو پنەکۍ، جارجار چنگێشا بەرماراو سەرو پنەکېرە شاناشان.
-سفرە: هەمیرە پڕچیێکۍ بە مەسەکۍ، دمای ئانەی سەرو پنەکېوە خڕۍ کریاوە، سەرشۆ ڕیزۍ کریان.
-ئایېری عال: بە دارۍ وشکۍ چېرو ساجەکەینە گڕدریان.
-دېکپا: سەرو ئایېرەکەیۆ منریۊرە.
-ساج: پارچە ئاسنێ خڕی قۆسەن، سەرو دیکپاکەیۆ منریۊرەو دمای گەرم بییەیش، بە ماڎەکۍ هەمیرو نانەکەیش دریۊ پۊرە.
نانی هۆرامی، گەر ژەنەی هۆرامییە کەرۊش و ئاردەکېش چەرمۍ و بە پېزۍ بان، فرە ناڕەحەت نېیەن، بۍ وەرچاییچ مەوریۊنەو چەنی (وەزاو ڕوەنی و قەڼی)، شیرینی و پاقلاوە دروسکریۊن. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]