شېرکۊ بېکەس و نیشتیمانەکەش کە جە هیچ نیشتیمانێ نمەشۊن
هۊرئەوەگېڵنای و ئاماڎەکەرڎەی: #ئەسعەد ڕەشید#
بەشۍ یەکەمە
ڕاو مەحوی پەی یاوانەی جە نیشتیمانەکەو شېرکۊی:
مەحوی
هەر دەم گومانێ بۍ
یەخۍ گەردوونێ گېرۍ.
پەرسێ بۍ
دلۍ پەرسێ تەرېنە
پەرسێ تەرە کەرۍ!
(شېرکۆبێکەس: مێرگی زام مێرگی هەتاو)
(ڕسای دلۍ بووڵېنە -- ڕسکان جە خۆڵەمێشدا)، ئا شېعرۍ شېرکۊ بېکەسینە کە باس ئەچا نیشتمانەیە کەرۊن کە جە هیچ نیشتمانێ تەری نمەشۊن. ئی شېعرۍ پاسە دیارەن کە پەی کارەساتەکەو زانکۊ سلېمانی جە قەڵادزێ نویسیێنە، بەڵام ئانەی شېرکۊ باسش کەرۊن، قەڵادزۍ و زانکۊ سلېمانی نییەن، بەڵکوم بەرکۆتەی بییەی نیشتیمانین دلۍ زانکۊ سلېمانی و قەڵادزېنە. ئینەیچ پەنەمان ماچۊن کە قەڵادزۍ و زانکۊ سلېمانی نە ئینێ دلۍ نیشتیمانەکەو ئاڎینە و نە بەشێنۍ چەنەش، بەڵکوم ئاڎۍ جە ساتێ تاریخینە مەبانې بە دەرەتانێ پەی بەرکۆتەی بییەی نیشتیمانی. شېرکۊ باس جە نیشتیمانێ کەرۊن کە ئېمە نەڎیەن، چوونکوم ئا نیشتیمانە خاکێ نییەن، ناوچێ دیاری کریا نییەن سەرو تۊپەو زەمینیۆ، ناوچەکۍ سەرو تۊپەو زەمینی یاگەفاڕاڵۍ نمەکەران، مەردەی نمەشناساو زیڼەبییەیۆشان نییەن، یانی هەم مەردەی و هەم زیڼەبییەیۆشان نییەن، بەڵام نیشتیمانەکەو شېرکۊی هەر جارێ مەنزڵێنە بەرمەگنۊ و هەرجارێ یاگێنە مەمرۊن. بەڵام ئایا ئا نیشتیمانە ئینا چکۊ و شېرکۊ چەنی تاوانش بۋینۊش؟ پەی جوابو ئی پەرسۍ، مەحوی ڕانماییمان مەکەرۊن و ماچۊن:
بڵا ڕۆحت موقەددەس بێ، ئەم و ئەو کردنت بەس بێ
هەتا ئاخر هەناسە ئەو بناسە، هەر بنازە بەو.
ئەچی بەیتېنە مەحوی باس چانەیە کەرۊن کە ڕۊح چەنی پیرۊز مەبۊن. ڕۊح کاتێ پیرۊز مەبۊن کە جەهانی دلېنەو وېت چانەی کە بەرینەن پاک بکەریوە، تاکو پېسە سەرچەمەو هانێوە لېڵیەکەش نەمەنۊو ئانەی ئەچا جەهانەنە هەن بۋینۊش، پەی ئی دەسکۆتەیچە مەشۊم ئیڎەس و ئۆڎەس وەسۍ بۊن، بگېڵیۆ پەی ئەشناسای ئا ڕۊحەیە دلې جەهانە دلېنەکەو وېتەنە. مەشۊم ئېڎ و ئاڎ کەرڎەیت وەسۍ بۊن و بگېڵیۆ پەی ئەشناسای ئا ڕۊحەیە کە ئینا دلۍ جەهانە زاتیەکەو وېتەنە. ئانەی یاگۍ شانازیتەن، نەک ئانەی کە ئینا جبەرۆ، ئانۍ بەری ئیتر کەسانۍ تەرۍ، یام دەسەڵاتەن، ئەی ماڵ و سامانەن. مەحوی چېگەنە ئانەی باسش چەنەکەرۊن و مەشۊم بشناسمېش، دیارەن کە ڕۊحەن، ڕۊحیچ پەی شاعېرێ پېسە مەحوی، ئا ڕۊحە کورڎییەن کە ڕاو ئی شېعرۍ مەحوییۆ مەچڕۊمان هەکە پەیش بگېڵمېوە و تاکو دما ساتو ژیوایمان هەر سەرقاڵۍ ئەشناسای زېیاتەرو ئاڎی بیمۍ.
دماتەر مەحوی باس جە دنیاو ئا ڕۊحەیە مەکەرۊن و لەیلۍ عامریچ مەکەرۊن بە ڕەمزێ پەی ئا ڕۊحەیە کە مەبۊن بشناسمېش. ئەچېگەنە مەحوی باس جە ساراو وەرمی مەکەرۊن پېسە ئا جەهانەیە کە ڕۊح دلېشەنە فەرمانڕەوان، جەهانەکەیچش درۆشایۆبییەو ئاڎیەن.[1]