نامۍ: سیروان
نازنام: هۆرامانی
نامۊ تاتەی: مامۊسا کەریم
نامۊ ئەڎێ: مەهدیە
ساڵۊ پېڎابییەی: 1966ز.
یاگۊ پېڎابییەی: #بیارۍ_هۆرامان#
$ژیۋاینامە$
مامۊسا سیروان هۆرامانی؛ نامۍ یەرەییەش؛ سیروان کەریم عەبدوڵڵا، نازنامش (مامۊسا سیروان هۆرامانی)، ساڵەو (1966ز.) دلۍ شارەکڵەو بېیارۍ، سەر بە هۆرامانو پانیشتی ئامان دنیا، کوڕی گۆرەو بنەیانەکەیشانەن. تاتەی ڕەحمەتیش مامۊسا کەریم عەبدوڵڵا، ئەشناسا بە (کەریم شەعبی)، ساڵەکانو شەسسەکا ڕاوەبەرو وانگاو بېیارۍ و کەسێ کۊششکارو بوارو ئازادیە فەردیەکا بېیەن، جمنەرێ مێڎانو کېشمەکېشە چینایەتییەکا بېیەن، هۆڵۍ سەرەمڕېش دێنۍ پەی نەمەنەی جیاوازی میانو چینەکا کۊمەڵی، دلۍ ناڕەزابییەیە جەماوەریەکانە بەشداریش کەرڎەن، بەڵام چەنی داخۍ، کۊتاو ساڵەو شەسسەکا، بە گرۊڵیێ وېڵە دلۍ قۊمیێوە تەماویېنە تاریخو (#18-12-1969#ز.) گېیانش ئەسپاران. مامۊسا سیروان چەنی تاقە براکەیش (سامان) دوور جە سایەو تاتەیشا، بە ئازایی و چەنەوېیەردەی و گۆرەیی ئەڎێشا قۊناغەکۍ ژیوایشا گوزەرنێنۍ و فرە هەسشا ئەپا بۍ تاتەییە نەکەرڎەن.
سیروان هۆرامانی قۊناغەکانو وانای سەرەتاییش جە ماواو وېش تەمامنان، چەنی خېزیای جەنگی یانەۋېرانکەری مییانو (ئێراق_ئێران) و ئاوارە بییەی خەڵکو بییارۍ، ئاڎیچۍ پېسە فرەو خەڵکی دلۍ شارو هەڵەبجەی نیشەجایۍ بییۍ، ئیتر ئەچاگە وانای میانیش تەمامنان و دمای کیمیاۋارانو هەڵەبجەی جە شارو سلېمانی قۊناغەکۍ ئاماڎەییش تەمامنێنۍ. مامۊسا سیروان هەر جە دەمو زاروڵەییشۆ خولیاو هونەرەجوانەکاش دڵەنە بۍ، ئاڎ فرە حەزش بە هونەرو نمانای و شانۊی بۍ، چڼەها جارۍ دلۍ وەربەرەو وېشانەو چەنی زاروڵا گەڕەکۍ سەرو سەکۊڵەو وەربەرەکەیشانە کوڵە شانۊگەریۍ نماییش کەرېنۍ، هەر پۆکەی دمای تەمامنای قۊناغەکا ئاماڎەیی، ساڵەو (1986ز.) پېوەڼیش کەرد بە کۊلیژو هونەرە جوانەکا زانکۊ بەغڎای، بەشو شانۊی، دمای چوار ساڵا وانای، بەسەرکۆتەیی ساڵەو وانای (1989_ 1990ز.) زانکۊش تەمامنان. باری نالەبارو دمای جەنگو هەشت ساڵەی و سەرجەنۊ خېزیای جەنگێ تەری یانە کاولکەری بە داگیرکەرڎەی وڵاتو کوێتی، کۆتەرەی گرانی و نەبییەی پەنەوازییەکا ژیوای و خزمەتی سەربازی دلۍ بەرەگا جەنگینە، دەرەتانێ گونجیاشا پەی مامۊسا سیروانی نەڕەخسنا کە دلۍ مێڎانو وېشەنە خزمەتێ قابیل بە میللەتەکەیش بکەرۊن، چەنی ئا گرڎ ڕاگیریا، بەڵام سیروان هۆرامانی کۊڵش نەڎا جە وەرجەسەکەرڎەی هونەرەکەیش و بە نویستەی بابەتە شانۊییەکاش و بەستەی ئەرەنیشتە جەماوەریەکا پېخامو وېش یاونا خەڵکی، پەنەش واتۍ کە شانۊ چەکێ کاریگەرەن پەی هۊشیارکەرڎەیۆ خەڵکی و چەکدارکەرڎەیشان بە گېیانو وەرگیری جە دژمەنی و ڕزگارکەرڎەیشان چېرو زوڵم و ناڕەحەتینە. سەرەڕاو ئا گرڎو نەهامەتی و دەربەدەری و ئاوارەیی، مامۊسا سیروان سەمەری هونەریش پېشکەشو خەرمانو هونەرو میللەتەکەیمان کەرڎەن، ئی بەرهەمە هونەریېشە چاپ و وەڵێ کەردېنێ:
1. هەندێ بابەتی شانۆیی 1993ز.
2. شانۆی ڕامیاری 1995ز.
3. بنەماکانی دەقی شانۆیی 2003ز.
4. زانستی شانۆی جەهانی 2023ز.
ئەسعەد ڕەشید.[1]