شەونشینیێوە تایبەت
بە هێمەتوو یانەو فەرهەنگ و ئەدەبوو بېسارانیو هۆرامانی، ڕۊدیار شەونشینیێوە تاییبەتتو خاتو (ژوان ڕەحیمی) یانەو هەساراو شارو هۆرامانوو تەختینە لوا ڕاوە.
وەڵین بەشو بەرنامەینە کە مونیب بەهرامی بە دەنگی وەشش قورئانش وەناوە.
خاتوو ڕۊژین ڕەحیمی یوە جە پېشکەشکارەکا شەونشینەکەش دەس پەنە کەرڎ و دماو خێرئامای و وەش ئامای کەرڎەی جە سەرجەمو مێمانەکا داواش کەرڎە جە خاتو ژوان ڕەحیمی کە بەحس و سوقاتیو وېش پېشکەشو مێمانەکاش کەرۊنە.
دماتەر کاکە هادی ڕەحمانی، کاکە مەجید مورادی و کاکە پەرویز ڕۊستەمی بە بەحسانێوە وەش و ئاڕۆیانە و بە شێعرە، شەونشینەکاشا وەشتەر و زەریفتەر کەرڎ.
دماین بەشو، یوەمین بەشو شەونشینەکەینە، تەرەفیو یانەو بېسارانیو هۆرامانیوە، خەڵاتیېوە پېشکەشو کاکە بەهمەن شەریفی، وەرو خاترەو گرڎو زەحمەتەکاش کە پی کریایوەو یانەو هەسارا کېشتێ بېنېش؛ کریەیا و وەڵین بەشو شەونشینیەکەی کۆتایش ئاما.
خاتوو تەرانە نافێعی، یوەتەر جە پېشکەشارەکا، دوەمین بەشش دەس پەنە کەرڎ و مامۊسا حامێڎ مەردۊخیش خۆڵکە کەرڎ و دماتەر کاکە فەرشید ڕۊستەمی، کاکە عەودڵڵا ڕۊستەمی، خاتوو گەلاوێژ فریادی و کاکە دانش عەبدۆڵڵاهی هەر کام بە شێعر و بەحسێوە وەش شەونشینەکەشا ڕازناوە.
گرڎماین بەشیچنە، دیسان تەرەفیو یانەو بېسارانیو هۆرامانیوە حورمەتېوە هەر چن مچکلە نیەیارە پەی خاتوو ژوان ڕەحیمی و قەڵەمیش و تەندیسېوەش بە دەسو ئەڎایش پېشکەش کریەیا.
ئی شەونشینی سەعات (7) دەسش پەنە کریا و سەرو سەعات (10)ی کۆتایش ئاما.
سپاس و حورمەتوو وېما ماچمې بە یانەو هەسارا، کاکە بەهمەن شەریفی، یانەو کاکە فێرۆز غوڵامی و کاکە مەجید مورادی، خاتوو ژوان ڕەحیمی، خاتوو تەرانە نافێعی، خاتوو ڕۊژین ڕەحیمی، خاتوو نادیا غوڵامی و هەرپاسە سەرجەموو ئا ئازیزا کە بە بەحسە وەشەکاشا شەونشینەکاما دلېنە دار و وەششا کەرڎ.
یانەو فەرهەنگ و ئەدەبوو بېسارانیو هۆرامانی.[1]