کەس نمەتاۊو ویروباوەڕو جەمعێ یام گرڎو خەڵکی فاڕۊن.
بەڵام من ماچو فاڕای ویرو باوەڕو جەمعێ ئیمکانش هەن و ئاسانەن، بەڵام فاڕای ویروباوەڕو گرڎو مەردومی زەحمەت و نەکەرڎەن.
گېڵناوە حاکمیە ساحێب دەسەڵات گیرۆد٘ەو نەوەشی چەما بۊ و هیچ حەکیمێ نمەتاۋۊ عەلاجەو دەردەکېش بکەرۊن، ئاخرش یۊ ماچۊ: عابدێ هەن متاوۆ چارەو دەردەکېت بکەرۊن، حاکمەکە ملۊ پەی لاو عابێدەی و دەردەکېش ماچۊ پەیش، ئاد٘یچ ماچۊ: چارەت ئانەنە دەور و بەرت گرڎ سەوز بۊ و هەر یاگێوەرە بد٘یەی ڕەنگەی سەوزە بۊ. ئەر ئی هەرمانێ کەری حەتم وەش بییەو. حاکم ملۊ زەڕ مد٘ۆ دەسو قەوم و کەس و‌کاریش و ماچۊ: تاکو متاودێ ڕەنگی سەوز بساندێ و هەرچی ئینا دەور و بەرمەنە سەوزش کەرڎې. زەڕێوی فرە خەرج کریۆ تاکو ئەمرەو حاکمی بە یاگې مەی. دماو ماوێوە حاکم نەوەشیەکەش مل گنۊ و جە وەڵێ خاستەر وەش مەبۊوە و هەر پی بۊنۆ جەژنێوە گۆرێ گېرۆ و عابێدەکەیچ خوڵکە کەرۊ.
کاتێ عابێدەکە نزیکوو یانەو حاکمی بۊوە، تەماشە کەرۊ هەرچی هەن و نییا گرڎ ڕەنگەش سەوزەنە، ئاد٘یچ جل و بەرگەکەش کە ڕەنگیەتەرە بۊ واڕۆش و سەوز کەرۊنە و ملۊ لاو دەسو حاکمیەنە منیشۆرە و چنەش پەرسۆ: دەردەکېت مل کەوتە؟ ئاد٘یچ دماو دەس وەشی، ماچۊ: ئەرۍ وەڵڵا جە وەڵێ خاستەرەنا، بەڵام گرانتەرین نوسخەت پەی نویسەبېنې!
عابێدەکەیچ ماچۊ: بە چەپەوانە، هەرزانتەرین نوسخەم پەی ئەرمانابێنی، وېت خراب یاوانیەنە گران کەوتەن پەیت، تۊ تاوێنی جیاتی ئانەیە ئی گرڎو ڕەنگە سەوزەیە بسانی و زەحمەت دەی وەرو خەڵکی هەرچی چېوا سەوزش کەرا، هیتێو عەینەکې سەوزێت ئەسایانې و کەردایانېت چەمېت و تاکو هەرچی چېوا سەوز وینایات!
کەس نمەتاۋۊ ویر و باوەڕو دنیای یا جەمعێوە واڕۆ، بەڵام متاوۆ دیدو وېش واڕۆ.
هۆرگېڵنایوە: فەتحوڵڵا ڕەزایی.[1]