بە مەبەستی پێگەیاندنی نەوەیەکی نوێ و درووست بوونەوەی بناغەی بەهێزی یارییەکە لە یانەی وەرزشی پێشمەرگە ، فێرگەی تۆپی سەرمێزی پێشمەرگە لەژێر سەرپەرشتی ڕاهێنەری بە ئەزموون ، هەردی ئەحمەد کە 25 ساڵە لەو بوارەدا برە و بە تواناکانی یاریزانان دەدات ، مەشق و ئامادەکارییەکانی دەست پێدەکات .
سەبارەت بە دەست پێکی مەشق و ئامادەکاری لە فێرگەکەیان و تۆمارکردنی ناوی فێرخوازی نوێ ، ئەو ڕاهێنەرە کە ئاماژە بە ناوەکەی دراوە بە پێشمەرگە سپۆڕتی ڕاگەیاندوو وتی ، یانەی پێشمەرگە لە درووست بوونی تا ئەمڕۆ کە 24 ساڵی تەمەنی بەڕێ کردووە هەمیشە فێرگەکانی لە یاری تۆپی سەرمێزدا یاریزانی بە ئەزموون و مێژووی پێگەیاندووە کە بوونەتە سەرقافڵەی هەڵبژاردەکانی ئێراق .
هەردی وتیشی بۆ ئەو مەبەستە دەمانەوێت لە ڕێگەی ئەم فێرگەیەوە دووبارە نەوەیەکی نوێ لە یاریزانان بۆ داهاتوو بنیات بنێین و بچینەوە نێو کێبڕکێ بەهێزەکان .
سەبارەت بە وەرگرتنی یاریزان و بەهرەمەندی نوێ ناوبراو بە گرنگی زانی تەمەنەکانی 2016 ناویان تۆمار بکرێت و هانی دایکان و باوکانی دا کە کچ و کوڕەکانیان ناونووس بکەن لە فێرگەکەیان تا وەک بەهرەمەندێکی ناودار بۆ داهاتوو مێژوو بنووسنەوە .
[1]