گرد مەلێ هەنجیر وەر بۊ، هەنجیر مەمەنۊ دارۊ
هەنجیر یۊن جە میوە فرە وەش و خاسەکا، تامێ وەشش هەن، چن جۊرېش هەن، هەر جە زەردە هەنجیرۆ گېرە تاکو کۊچە کاوۍ، فەسڵوگەرماینە مەیاوۊ پەنە، واردەو مرۊڤی و هەم باڵداریەن.
فەسڵو هەنجیر یاوای فرە وەش هەن، کە ماچان گەرمەشانە، ئیتر ساعبەنە زوو خەڵک ملا دەرەرە پەی هەنجیر واردەی، ژەمێ فرە وەشو ساعبېیەن.
بڕێ هەنجیرۍ وەختێ کەناشاوە نیمەشا وریان، پەنەشان ماچان (مریچڵا واردۍ) ، ئانۍ ساعبەنە زوو، وەڵۍ ئانەی دەسو بنیاڎمیشا پەنە یاوۊ، مریچڵۍ ملا تەڵەبشاو وەراشان. بڕێ جە باڵدارەکا هەنجیری موەران، بەڵام نەک گردشان.
ئیدیۆمەکۍ چانەیۊ وەرگیریێنە، گەر گرد مەلێ پېسە مریچڵۍ هەنجیر وەر بیێ، ئانە پۆ داریۆ هەنجیر نەمەنۍ.
ئی یاسا سەپیۊ ملوو گردو چېوەکا ئی دنیێرە، خوڎای گۆرە پاسە یاساکېش نیێنېرەو جاگیرېش کەردېنۍ کە هامسەنگی دنیێ تېک نەشۊن، ناعمەتەکېش دابەشۍ مەخلووقەکاش کەردېنۍ، هەر بڕێشا جۊرە واردێوە موەران، پەی ئانەی نەبېیەی توشو گېیانەوەرەکا نێ.[1]