کورد دلۍ چەرخەکا تاریخینە
بەشۍ: دوەسەڎ و حەفتا و چوارەمە
نویستەی: #هاوڕێ باخەوان#
ساڵەو (1919ز.):
* ئەچی ساڵېوە تاکو ساڵەو (1927ز.) هۊرخېزیای شۊڕشی جە ناوچەکانو سلېمانی بەسەرداری شېخ مەحمووڎی بەرزنجی.
* ئەچی ساڵېنە، مەحمووڎ خانو دزڵیۍ بە وېش و چن سەڎ چەکادارۍ هۆرامیۍ یاوا سلېمانی پەی یاردیدای شۆڕشو شېخ مەحمووڎی بەرزنجی دژ بە ئینگلیزەکا.
* ئەچی ساڵېنە، مێجەر نۆیل کە فەرمانبەرێ ئینگلیزەکا بۍ بە دزییۆ ئاما پەی کوردەسانی.
* ئەچی ساڵېنە، پێمانو (سان ڕیمۆ)ی میانو فەڕەنسای و بەریتانیای بەسیا، دلېشەنە نەخشەو لکنای پانیشتو کوردەسانی بە عێراقیۆ کېشیا.
* ئەچی ساڵېنە (کۊمەڵەو بەرزی ژەنا کوردی) جە ئەستەمبوڵ مەرزیارە.
* ئەچی ساڵېنە، ئینگلیزەکۍ نازنامو خان بەهادووریشان دا بە عادیلە خانمەو جافی.
* ئەچی ساڵېنە، ڕۊنامەو (ژین)ی جە ئەستەمبوڵ بەرشییەن، بە دەسو (مەمدوح سەلیمی و کەمال فەوزی و هەمزە بەگ)ی.
* مکرم ئالملک، جاگیرو ئوستاندارو ئازەربایجانی بە هامکاری ئەرمەنەکا، بۊمبێ سازنۊو دلۍ پاکەتێنە بە پۆست مەکیانۊش پەی ئیسماعیل خانو سمکۆی جە چەهریق، بە نامۍ شیرینیۆ، کە گوایا پەی کناچەزا گولانەکەیش کیاستەنش، بەلام سمکۆ یەکسەر جە پیلانەکۍ مەیاوۊنەو پاڵ منیۊ پاکەتەکېوەو وېش تەختو زەمینی کەرۊن، پا تەرزە جە مەردەی ڕزگارش مەبۊن، دمای ئانەیە ئیتر سمکۆ بە تەمامی قینیش مەگنۊ ئەو فارسەکا.
* هەمزە بەگ، ڕاوەبەرو ڕۊنامەو (ژین)ی بە دەسو تورکەکا گیریا، قەرارو دریای قەنارەیش دریا، چوونکوم دلۍ شارو ماردینی دلۍ کۊنیشتێوەنە وتارێش دێبۍ و واتەبېش؛ کورد مەشۊم وېش ئازاد بکەرۊن.[1]