ئەنجوومەنی ئاسایشی هەرێمی کوردستان بەڵگەی لەبەردەستە، کە ڕێکخراوی تیرۆریستی داعش لە بەرەکانی شەڕ دژی هێزەکانی پێشمەرگه مەوادی کیمیاوی بەکارهێناوە.
پاش ئەوەی ڕۆژی 23ی کانوونی دووەمی ڕابردوو ئۆتۆمبیلێکی بۆمبڕێژکراو خۆی بە هێزەکانی پێشمەرگە تەقاندەوە، هێزەکانی پێشمەرگه بە مەبەستی ئەنجامدانی شیکردنەوە سەمپڵی خۆڵ و پاشماوەی تەقینەوەکەی کۆکردەوە و ڕەوانەی تاقیگەی ولاتێکی بەشدار لە هاوپەیمانی نێودەوڵەتی کرد. شیکردنەوەکە، کە لە تاقیگەیەکی باوەڕپێکراوی یەکێتی ئەوڕووپا ئەنجامدراوە، دەریخستووە سەمپڵەکان ڕێژەیەکی بەرچاو لە ماددەی کلۆریان تێدایه، کە لە دروستکردنی چەکی کیمیاوی بەکاردێت. ئەمەش یەکەم لێکۆڵینەوەی نێودەوڵەتیییە، کە دەیسەلمێنێ داعش لە دروستکردنی چەکدا سوودی لە ماددەی کلۆر وەرگرتووە.
ئەنجوومەنی ئاسایش زۆر بە توندی ئیدانەی بەکارهاتنی ئەم چەکە یا هەر چەکێکی قەدەغەکراوی دیکە دەکات. ڕاستی پشتبەستنی داعش بە تاکتیکی وا بەڵگەی ئەوەیە، کە داعش لە پاشەکشە دایە، بۆیە نا ئومێدانە پەنا بۆ هەر ئامرازێک دەبات.
هێرشەکەی 23ی کانوونی دووەمی ڕابردوو لە شاڕێی 47 ی نێوان مووسڵ و سوریا لە چوارڕیانی کەسکێ ڕوویدا، لە کاتێکدا هێزی پێشمەرگە لە پێگەی بەرگریدابوون لە پاش هێرشێکی دوو ڕۆژە بۆ سەر داعش، کە له و هێرشەدا 200 کیلۆمەتر چوارگۆشە لە داعش پاککرایەوە و زیاتر لە 200 تیرۆریستیشی لێ کوژرا. هەروەها نزیکەی 20 بوتڵە غازی پڕکراو لە ماددەی کلۆر لە لۆریەک بارکرابوو تا لە تەقینەوەکە سوودی لی وەربگرێ.
ماوەیەکی زۆرە بەرپرسانی هەرێمی کوردستان گومانیان هەیە، کە داعش لە شەڕەکانیدا مادەی کیمیاوی بەکاردەهێنێ، تەنانەت لەم شەڕەی دوایی، کە لە دەوروبەری تکریت ڕوویدا، لە هێرشێکی هاوشێوەی تۆمارکراو بە ڤیدیۆدا دوکەڵی پرتەقاڵی بەرز دەبێتەوە، ئەمەش نیشانەی بەکارهێنانی ماددەی کلۆرە. واتە داعش جارێکی دیکە دوای لە دەستدانی شارەکە ئەم چەکەی بەکارهێنایەوە، ئەمەش دەریدەخات هەر کاتێک داعش تووشی شکستی گەورە بێتەوە کلۆر وەک چەک بەکاردەهێنێ. ئەم دوو نموونەیەش نیشانەی ئەوەن داعش لەژێر گوشار دایە و بەردەوام خاک لە دەست دەدات.
ئەنجوومەنی ئاسایشی هەرێمی کوردستان
14ی ئاداری 2015
Ev babet bi zimana (کوردیی ناوەڕاست - Central Kurdish) hatiye nvîsandin, klîk li aykona
![](https://www.kurdipedia.org/images/flags/ku.png)
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست - Central Kurdish) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Ev babet 15,013 car hatiye dîtin
Raya xwe li ser vî babetî binivîsin!