قەڵای کەرکووک خرایە لیستی شوێنەوارە جیهانییەکان
دەستەی گشتی شوێنەواری عێراق ڕایگەیاند، قەڵای کەرکووک لەلایەن ڕێکخراوی یونسکۆوە خراوەتە لیستی سەرەتایی شوێنەوارە جیهانییەکانەوە.
بەهۆی گرنگی قەڵاکە و ئەو فرە کولتورییەی کە تیایدایە، خرایە لیستی سەرەتایی شوێنەوارەکانی جیهان
ئەحمەد کازم بەڕێوەبەی بەشی ڕێکخراوە نێودەوڵەتییەکان لە دەستەی گشتیی شوێنەوار و کەلەپوری عێراق ڕایگەیاند، ڕێکخراوی یونسکۆ لەم دواییانەدا قەڵای کەرکووکی خستە لیستی سەرەتایی شوێنەوارەکانی جیهان، ئەمەش بەهۆی گرنگی قەڵاکەوەیە لەروی ئەو فرە کولتورییەی کە تیایدایە لەوانە مزگەوتی پێغەمبەر دانیال، مزگەوتی گەورە و مزگەوتی عوریان هەروەها بونی کەنیسەی کلدانی ئوم ئەحزان.
قەڵای کەرکووک بەهایەکی جیهانی گرنگی لە ڕوی ڕۆشنبیرییەوە هەیە
ئاماژەی بەوەشکرد، بڕیارەکەی یونسکۆ لەوەوە سەرچاوەی گرتوە، کە قەڵای کەرکووک بەهایەکی جیهانی گرنگی لە ڕوی ڕۆشنبیرییەوە هەیە، و لەسەر پێوەرەکانی ڕۆشنبیری و دەگمەنی شارستانیەتی زیندو ئەو بڕیارەدراوە چونکە ئەو قەڵایە نمونەی باڵایە لەڕوی جۆری بنیاتنان و ئەندازەیی و دەرخەری قۆناغێکی گرنگە لە مێژوی مرۆڤایەتییدا.
قەڵای کەرکووک چەند یەکەیەک لەخۆ دەگرێت لەوانەی بازاڕی قەیسەری و گومەزی سەوز کە مێژوەکەی دەگەرێتەوە بۆ سەردەمی ئەتابکی ساڵی 752 ی کۆچی لەگەڵ چەند خانویەکی کولتوری.[1]