ناونیشانی بابەت: شوێنەوار و مێژووی ئاشی هاودیان لە ئیدارەی سۆران
ئامادەکردنی: #محەمەد هەسنانی#
گوندی هاودیان سەر بە ناحیەی دیانا، دەکەوێتە سنووری ئیدارەی #سۆران#، لە خوار زنجیرەچیای برادۆست، جگە لە موسڵمان، ژمارەیەک خێزانی کرستیان لە گوندەکەدا نیشتەجێن، کە ساڵەهایە بەیەکەوە ژیان بەڕێ دەکەن، هەروەک مەسیحییەکانی گوندەکە ڕۆڵیان هەبووە لە دروستکردن و نۆژەنکردنەوەی ئاشی گوندکە.
لەمبارەیەوە فازڵ هاودیانی، نووسەر و لێکۆلەر، بە (باسکورد)ی ڕاگەیاند: مێژووی گوندی هاودیان لە سنووری ئیدارەی سۆران، بۆ سەردەمێکی زۆر کۆن دەگەڕێتەوە، بەڵگەش ئەوەیە، کە چەندین شوێن قەڵا و شوورا و بناغەی جۆراوجۆری شوێنەواری لە سنووری گوندەکە هەن، یەکێک لە شوێنەوارە مێژووییەکانیش بریتی بووە لە ئاشی گوندەکە، کە دوای نزیکەی 100 ساڵ تائێستا شوێنەواری ئاشەکە ماوە و پارێزگاریی لێ دەکرێت.
گوتیشی: مێژووی ئاشەکە دەگەڕێتەوە بۆ ساڵی 1932، کە لەسەر دەستی وەستا (ڕەیحانا شێخۆ) دروست کراوە، کە لە نەتەوەی ئاشووری بووە و دانیشتووی گوندی هاودیان بووە، خاوەنی ئاشەکە حاجی فەرهاد شاوراوەی بووە، ئاشەکە بە ئاو کاری کردووە، کە دوای ئەم هەموو ساڵە تا ئێستا قۆتەر و شوێنەوارەکەی ماوە، کە لە مەودایەک ئاوی بۆ هاتووە بۆ بەگەڕخستنی، وەک باسیشی لێوەدەکرێت، هەم ئارد و هەم تەحین لەم ئاشکە دروست کراوە.
فازڵ هاودیانی دەشڵێت: ئەم ئاشە زیاتر لە وەرزی بارانبارین کاری پێ کراوە، چونکە وەرزی هاوین زیاتر ئاوەکەیان بۆ بەروبوومی کشتوکاڵی بەکار هێناوە و بەشی کارپێکردنی ئاشەکە نەبووە، دوای ڕاپەڕینی 1991 لە کاتی دروستبوونی ئابلووقەی ئابووری، جارێکی دیکە ئەم ئاشە لەلایەن (وەستا فیۆدەر و وەستا شمۆ)، نۆژەن کراەوەتەوە و کاری پێ کراوە، هەروەک ئەو پشەوەرانەی کاریان لە دروستکردن و نۆژەنکردنەوەی ئاشەکە کردووە، ناویان لەسەر پەنتاییەکی ئاشەکە تۆمار کراوە.
گوندی هاودیان سەر بە ناحیەی #دیانا#، دەکەوێتە سنووری قەزای ناوەندی سۆران، لە خوار زنجیرەچیای برادۆست، واتە کۆتا گوندی سۆرانە، کە هاوسنوورە لەگەڵ سنووری قەزای #مێرگەسۆر#، ناوچەیەکی شاخاوییە و لەدەوروبەریدا چەند ئەشکەوت و ناوچەی شوێنەواری هەن، لەناو گوندەکەشدا زۆر بایەخ بە سەوزاری و دارودرەخت دراوە، ئەمەش ژینگەیەکی جوان و سەرنجڕاکێشی بە گوندەکە بەخشیوە، جگە لە موسڵمان، ژمارەیەک خێزانی مەسیحی و کرستیان لە گوندی هاودیان نیشتەجێن، کە ساڵەهایە بەیەکەوە ژیان بەڕێ دەکەن و لە خۆشی و ناخۆشیی یەکتریدا بەشدارن. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=