سەروای چ بکەم؟ عاجز
لە عیشقی چاوی غەممازی غەزەلخوانی نەکەم چ بکەم
لە نازی تاوسی چین، سینە سوزانی نەکەم چ بکەم
عەجائیب مانگی چاردەم دی، دوو مانگی یەک شەوەی پێ بوو
لەگەڵ دوو زەهرە لەم تەرتیبە حەیرانی نەکەم چ بکەم
لە باغی یار کە جاری بووی گوڵێکم کرد فیراقم بوو
ئیتر جانم فیدای خاوەن گوڵستانی نەکەم چ بکەم
شەڕابی لەعلی لێوی گەر بخۆن وەک من دەبن ڕیسوا
مەکەن لۆمەم کە فیکری مەیلی جارانی نەکەم چ بکەم
ڕەقیبی سەگ سیفەت مەنعی ویساڵی یاری لێ کردم
بە ئەفکار خۆم هیلاکی تیری موژگانی نەکەم چ بکەم
لە غەم تازە خەلاس نابی دڵی دێوانە و مەفتوون
نەما سەبرم خەیاڵی خەدد و خاڵانی نەکەم چ بکەم
لە حەسرەت ڕوویی لەیلا عاجزم مەجنوون سیفەت ناچار
وەکو بولبول لە دەوری گوڵ سەحەر خوانی نەکەم چ بکەم [1]
هۆزانەوان: #عاجز#
پەرتووک: #دیوانی عاجز#