ناونیشانی بابەت: گەرماوە کەلەپوورییەکەی موفتی، بەشێکی زیندوو لە یادەوەریی شارێک
ئامادەکردنی: #ڕۆیا سەردار#
گەرماوی موفتی، یەکێکە لەو گەرماوە دەگمەنانەی #سلێمانی# کە تا ئێستاش خانمان بۆی دەچن. ئەم گەرماوە لە سەردەمی درووستکردنی سلێمانی درووستکراوە و پێکهاتەی بیناسازییەکەی هەمووی قسڵ و قوڕ و خشتی سوورە.
#گەرماوی موفتی# لە سلێمانی تەمەنی لە دوو سەدە و نیو نزیک دەبێتەوە و ئێستا وەک گەرماوی ئافرەتان بەکاردەهێنرێت، کە لەلایەن ئافرەتێکەوە سەرپەرشتی دەکرێت.
ئەم گەرماوە دەکەوێتە گەڕەکی (#سابوونکەران#)ی شاری سلێمانی و لەلایەن بنەماڵەی (بابان)ەکانەوە لە کۆتایی ساڵی 1788 درووستکراوە، هەرچەندە گەرماوەکە تەمەنێکی زۆری بەڕێکردووە، بەڵام هێشتا دیوارەکانی کە بە بەردی مەڵکەندی درووستکراوە بە قایمی ماونەتەوە. [1]