گېڵناوە وەختو وېش کابرێوە ملۊنە خزمەت و شېخێ جە بیارۍ ، وەختێنە کابرا نزیک مەبۊوە حەوشۍ خانەقای داوا کەرۊن جە سۊفیێوە کە ڕاش بڎۊ بلۊنە خزمەتو شېخی، کابرا هەرچن پاگېرۊرە سۊفی ڕانمەڎۊ ، کابرا ماچۊ پەی خاترۆ خۊڎای ڕاگیری نمەکەرە با بلو خزمەت و شېخۍ، هەر فایدەش نیەن، کابرا ماچۊن سوفی گیان تۊ سەرو شېخی ڕاگیریم چەنە نمەکەرە، سوفیچ کە نامۍ شېخی مژنەوۊ هېزش نمەمەنۊو ڕاش مڎۊ پەنە. کابرا ملۊن پەی زیارەت و شېخی، بەڵام پاسەدیارەن جەنابو شېخی هاگاڎارو گفتوگۊو میانو مېمانەکەی و سۊفی بیەن، پەوکەی سۊفیەکەی چڕۊو تەقۊش چۊری و مۊچیاریێ خاسش مەکەرۊنو ماچۊ: (وەختێنە کابرای مېمان نامۍ خۊڎایش بەردە ڕاگیریت چەنە کەردو کەنامۍ منش ئاوەردە ڕات پەنەدا! )
شېخەکۍ هۆرامانی چەمو یاگۍ و مەکانەتیشان کە ڕابەری تەمامو تەریقەت و نەقشبەندی مەکەران سەراسەرو دنیێنە، خزمەتێ فرە گۆرەشان بە خەڵکو هۆرامانی بە تایبەت کەردەن. بیارۍ و تەوېڵۍ پەی نمونەی بە قەسرۆ عارېفان ئەشناسیێنۍ، سەڎەها عالمۍ دینیۍ و شاعرۍ و زانێشا یاونێنۍ پەنە کە دماتەر یاگە دەسشان تەمامو دنیاو ئەدەبی و فەرهەنگی و پېوەڼییە کۊمەڵایەتیەکانە دیارەن.
شېخەکۍ هۆرامانی دایېم پرۊسەو دینێ هەقیقی و ڕاسشان پیاڎە کەردەن دوور جە گرد خۊرافەو ئەفسانێوە. جە بواری پزیشکینە دەورێ بۍ هامتاشان دیەن، وەختێنە کابرا بە وایەو چارەسەری پەناش بەردېنە پەی لاو شېخی بە چارێوە مادی و دەرمانێ وېمانەی گژوو گیواو چارەشان دان نەک بە چېوهایێ خۊرافی و ئەفسانەیی.
شېخەکۍ هۆرامانی کاسپیشان بە دینیۆ نەکەردەن، چڼەها باخ و مڵکۍ جە هۆرامانەنە بەخشیێنۍ بە شېخەکاو بە خانەقای، بەڵام تەنیا پەی خزمەت و خانەقایی و مەدرەسە دینییەکا سودشان چەنە وەرگېریان، باخەکۍ بیارۍ و تەوېڵۍ و یاگەکان و تەری تەنیا وەقفۍ خانەقاینۍ و ماڵ و شېخان نیەنۍ کە جە وەختێنە تەواناشان بیەن کەراشان بە نامۍ وېشان.
حەیفەن ئېمە ڕاسیەکان نمەوینمېن، سیاوو چەرمە جە یۊی جیانمەکەرمێ، خاسو خراب. گەر شېخانێ بە نامۍ دینیۆ ئەفسانەو خۊرافە وەڵاکەراوە، گەر بە نامۍ دینیۆ ئاوەزو خەڵکی بەنج کەران، گەر بە نامۍ دینیۆ سوکایەتی بە سۊفی و موریدان و وېشان مەکەران، گەر بەنامۍ دینیۆ سەروەتو سامان جەمکەران، ئەشۊ تەعمیم (گردین) نەکریۊن.
گېڵناوە تۊبەکارێ یۊ جە شېخەکان و بەرو هۆرامانی جە وڵاتو ئېرانیۆ ئامان پەی خزمەت و شېخەکەیش، هەرچی خوڎای دان جە دیاری و ماسو دۊی و هەنگوینی بە سەوقاتی مارۊش پەی شېخەکەیش، وەختێنە ملۊنە خزمەتش حەماوەش بەرزمەبۊوەو هەرچی زەڕیچش پەنەن منیۊشەرە پەیش.
کابرا شەوۍ تەکیەو شېخینە ڕۊ کەرۊوە و ساعبێ ئیتر نیازشەن بگېڵۊوە، وەختێ دەسکەرۊن کیسەشەرە هیچش نیەن پەنە، ناچار ملۊوە خزمەت و شېخی و ماچۊ قۊربان نیازمەن بگېڵوە پەی ئېرانی و پۊڵم نیەن ، جەنابو شېخیچ ماچۊن خاستەرەن بە پێ بلیۆ چونکم هەر هەنگامێو کە منیەیش خوڎای گەورە ئەجرو پاداشتێت پەی منویسۊن !!!!![1]