پیشەی جۆڵایی لە کوردەواری؛ بەشی 08
لەیلا نوورانی
=KTML_Bold=ئاخشەردان=KTML_End=
بەنی ڕەنگکراو خستنە نێو دەرمانی تایبەت، بۆ ڕەنگ نەدانەوە و نەگۆڕانی ڕەنگ. ئەم دەرمانە تایبەتە لە ڕەنگی جۆراوجۆردا دەتوانێت (ئاو و سوتووی وێنجە)، (میزی گا)، (قوڕی ڕەش)، (ئاوی کوڵیو)، (زاخاو) یا هەر شتێکی تاقیکراوەی تر بێ.
بەنەکەم ڕەنگ کردووە، بەڵام هێشتا ئاخشەرم نەداوە.
=KTML_Bold=بن گرێ=KTML_End=
چەشنێک هەڵبەستنی ڕیشووی بەرماڵ، جاجم یا پۆپەشمینە، کە چەند ڕیشوویەک جیا دەکرێنەوە و بنیان گرێ دەدرێ هەتا پۆیەکان هەڵنەوەشێنەوە. گاوگێرە .
=KTML_Bold=بەرگڕتنەوە=KTML_End=
بڵاوکردنەوەی کلکی ڕایەڵ بەهۆی داری بەرگرتنەوە. جەمسەری دوایی ڕایەڵ، کە لە درێژەی کاردا وێکهاتوون و بە هێچکەوە گرێ دراون، لە سەروبەندی تەواوبوونی کارەکەدا لە گوردەکان نزیک دەبنەوە و ئیدی بە نێوان بەنگورد و شەدا ڕەد نابن، چارەی کار ئەوەیە بەری کرەکە بگیرێتەوە، واتە بەهۆی دارێکی تایبەت بەم کارە، بەرەکە پان بکرێتەوە و لەبەر یەک بڕەوێتەوە، تا بە ئاسانی بە ناو شەو گورددا تێپەڕێ. (بڕوانە وێنەی ژمارە 64 لە فایلی پەیوەندیدار )
=KTML_Bold=بەرە=KTML_End=
مەودای نێوان جۆڵایە تا دەفە، کە وەستا دەستی دەگاتێ و شەپیتە پێوەدەدا و مەکووک تێوەدەدا.
*تێبینی: ئەگەر بەنی ڕایەڵ باش بێ و کاری تەنین بە ڕێکوپێکی بڕواتە پێش، دەڵێن: بەرە دەدا ، ئەگەریش بەن خەراپ و لە کارنەهاتوو بێ، وەک ئەستوور بوون، کوڵکن بوون، خاو بوون، زۆر گشت بوون، پسۆک بوون و ... دەڵێن: بەرە نادا .
=KTML_Bold=بەرەدان=KTML_End=
لێک ئاوەڵابوونەوەی ڕایەڵەکان بەهۆی هەڵکشان و داکشانی گورد، هاتوچۆ کردنی مەکووک بە مابەینی ڕایەڵەکەندا، بە ئاسانی.
هەندێک جار کە بەنی ئەستوور و کوڵکن وەسەر دەزگا دەخرێ و ڕایەڵ دەکرێ، گوردەکان بە ڕەوانی کار ناکەن و بەتەواوی هەڵکێش و داکێشیان نابێ، لەو کاتانەدا تێوەدانی مەکووک، بەهۆی مەودای کەمی دوو دەستە ڕایەڵ، سەخت دەبێت و دەڵێن: ئەو بەنە بەرە نادا ، واتا بەنەکە لەبەر کوڵکنی و نائەمواری، تەواو لەبەریەک ئاوەڵا نابێتەوە تا مەکووک بە نێو ڕایەڵەکاندا خۆش هاتوچۆ بکا. (بڕوانە وێنەی ژمارە 65 لە فایلی پەیوەندیدار ).
=KTML_Bold=بەستە=KTML_End=
ئاڵقە بەنێکی ئەستوور، یان چەند لۆیە، کە لەسەر نەزمێکی تایبەت لە تروندە دەخرێ، بۆ ئەوەی ڕایەڵەکان نەکەونە سەر یەک و ئاڵۆز نەبن و بەتایبەت هەودا ڕەش و سپییەکانیش لە شوێنی خۆیان نەترازێن، لە کاتی دامەزراندنی تروندە لەسەر دەزگای جۆڵایی، بەستە دەکرێتەوە و لادەبرێ. (بڕوانە وێنەی ژمارە 66 لە فایلی پەیوەندیدار )
هەروەها بەو کوتە بەنەش دەڵێن کە لە ئاڵقەی ماشەر گرێ دەدرێ تا نەکرێتەوە و ئاڵۆز نەبێ. (بڕوانە وێنەی ژمارە 67 لە فایلی پەیوەندیدار )
=KTML_Bold=بەن=KTML_End=
خوری یا مووی ڕێسراو. (بڕوانە وێنەی ژمارە 68 لە فایلی پەیوەندیدار )
=KTML_Bold=بەنی خاو=KTML_End=
بەنێکە دوای ڕستنی هێشتا با نەدراوە، یا لە بادان دا بە ڕادەی پێویست کرژ نەکراوەتەوە. بەنی خاو بۆ تەنین یا چنین ناشێ و دەکار ناکرێ، چونکە خۆڕاگریی کەمە و لە کارکردندا لێک هەڵدەوەشێ و دەبێتەوە بە خوری. (بڕوانە وێنەی ژمارە 69 لە فایلی پەیوەندیدار)
=KTML_Bold=بەنی کرژ=KTML_End=
بەنێکە لە باداندا پتر لە ڕادەی پێویست کرژ کرابێتەوە، ئەو کرژییە دەبێتە هۆی ئەوەی زووزوو وێک بێ و گرفنچکی لێ ساز بێ. (بڕوانە وێنەی ژمارە 70 لە فایلی پەیوەندیدار )، تەشیڕێس لە کاتی بادانی بەندا، هەر وەخت دیتی تەشییەکەی پتر لە ڕادەی پێویست سووڕاوە و بەنەکەی لێ کرژ بووە، بەر لەوەی بەنە بادراوەکە لەسەرتەشی هەڵبکات، هەندێکی لە بەنەخاو و بانەدراوەکە وەبەر دەدا تا لە کرژیی بادراوەکە کەم بکاتەوە.
=KTML_Bold=پشت‌ماسیلکە/ مام شەبەقە=KTML_End=
پێکەوەدانی دوو تەختەی کر، بە شێوەیەکی تایبەت. لەم شێوەیەدا هەر تەختەی تەقەڵێکی لێ دەدرێ و پاشان دەرزی لە مابەینی هەر دوو تەقەڵەکان دێتەوە دەر. (بڕوانە وێنەی ژمارە 71 لە فایلی پەیوەندیدار ).
پشت ماسیلکە کردن لەسەر بەرماڵی مەرەز و بەنرخ دەکرێت و لە سەردروو کردن پەسندترە.
=KTML_Bold=پۆ=KTML_End=
داوی پاناییی کرە، کە جۆڵا لە ڕاست و چەپڕا، بەهۆی مەکووکەوە لە تانی هەڵدەکێشێ و کری پێ دەتەنێ. تێوەدان.
=KTML_Bold=پەشم / خوری/فا=KTML_End=
تووکی مەڕ و وشتر، کە بە نەڕێسراوی بۆ نێو دۆشەگ و دۆشەگەڵە و لێفە کەڵکی لێ وەردەگیرێت و بە ڕێسراویش دەتەنرێ یا دەچندرێ. (بڕوانە وێنەی ژمارە 72 لە فایلی پەیوەندیدار )
=KTML_Bold=پێ=KTML_End=
ئەندازەیەکی درێژایییە بە مەودای بیست گرێی بەنگورد لەسەر دارگورد. (بڕوانە وێنەی ژمارە 73 لە فایلی پەیوەندیدار )
*تێبینی: هەر گوردێک بریتییە لە دوو دار کە مەودای ئەو دوو دارە بە بەنێکی قایم بە ناوی بەنگورد، لەسەر نەزمێکی تایبەت هەڵبەستراوە. لەسەر هەر دارەی هەشتا گرێ لێ دەدرێ و بە بنی هەر گرێیەکیشەوە ئاڵقەبەنێکی کەمتر لە دە سانتی شۆڕبووەتەوە، ئەو دوو ئاڵقەیە وەکی زنجیر تێکخراون. کە وایە هەر دوو داری یەک گورد، هەشتا جووت گرێی لەسەرە، لە یەکەم گرێی جەمسەری دارەوە تا بیست گرێ، دەبێتە یەک پێ (بڕوانە وێنەی ژمارە 74 لە فایلی پەیوەندیدار ).
ئەگەر گرێکانی بەرانبەریشی لەسەر دارگوردەکەی ڕووبەڕووی حیساب بکەین دەبێتە بیست جووت لەسەر یەک گورد یا بیست گرێ لەسەر یەک دار. کە وایە گوردێکی هەشتا جووت گرێیی دەبێتە چوار پێ، کە پانایی بەری کری پێ دیاری دەکرێ. دەڵێن: (ئەو بەرماڵە بەری چوارپێیە).
=KTML_Bold=پێچاڵ=KTML_End=
لە کاری جۆڵاییدا دوو مانای هەیە، یەکەم لاق پێدادانی جۆڵایە بە پێتاتەکانی بەرپێی، کە بەم کارە دەڵێن پێچاڵ کردن، دووەم قوڵکەی بەرپێی جۆڵایە کە پێتاتەکان تێیدا دامەزراون. هەڵبەت ئێستا ئەم شوێنە قوڵکە نییە و هەر گۆڕایییە و پێتاتەکانی لەسەر دانراوە، چونکە کارخانەی جۆڵایی هەندی ئەوەندەی وەستا لەسەری دانیشێ و لاقی بگاتە زەوی، بڵند کراوە، لە ڕابردوودا کاریتەکانی کارخانە هەندی ئەوەندەی گوردەکان زەوی نەگرن، نەوی بوون، بۆیە جۆڵا ناچار بوو چاڵێک هەڵکەنێ و پێتاتەکانی تێدا دامەزرێنێ و لاق دە چاڵەکە کێشێ.
=KTML_Bold=پێکەوەدان/ لێک دروون / نوێردە کردن=KTML_End=
لێک دروونی تەختەکانی کری جۆڵایی، تەختەی کرەکانی جۆڵایی، لە دوای تەواو بوونیان دەبێت لێک بدوورێن. پێکەوەدانی ئەو تەختانە بە دەرزی و بەنی هاوڕەنگی کرەکە ئەنجام دەدرێ. ئەو کارە سەرنج و وردبوونەوەی پێویستە، چونکە نەخشی سەر کرەکە لە تەنیندا سەرجەم دوونیوە دەبێت و هەر لەتکەی دەکەوێتە تەختەیەکەوە. ئەو کەسەی دوو تەختەکە لێک دەدروێ، دەبێت بتوانێت نەخشەکان بەجوانی ساغ کاتەوە.
*تێبینی: لێکنەدوورانی کر، نیشانەی نوێ بوونێتی، کەوایە پەسند نییە لە لای جۆڵا لێک بدوورێ و بچێتە بازاڕ، بەڵکوو کڕیار بە نەدروای دەیکڕێ و خۆی لە ماڵ لێکی دەدروێ. پێکەوەدانی تەختەکانی کر، کارێکی ژنانەیە و بە شێوەگەلی سەردروو، مام‌شەبەقە یا پشت ماسیلکە، گاگێڕە یا بن‌گرێ و شەش‌تەقەڵ ئەنجام دەدرێ.[1]