ناو: محەمەد
نازناو: هەژار دێدەوانی
ناوی باوک: حەسەن عومەر
ناوی دایک: فاتمە سەلیم
ساڵی لەدایکبوون: 1958
ڕۆژی شەهیدبوون: #29-05-1987#
شوێنی لەدایکبوون: #هەولێر#
شوێنی شەهیدبوون: شیف چنارک
$ژیاننامە$
محەمەد حەسەن عومەر ناسراو بە (هەژار دێدەوانی) خانەوادەیان لە هۆزی مەنتکن، لە بناری دێدەوان ژیاون و دوایی هاتوونەتە هەولێر. هەژار لە ساڵی 1958 لە گەڕەکی #سەیداوە#ی شاری هەولێر لە دایک بووە، باوکی لە ساڵی 1963کۆچی دوایی دەکات، دایکی (فاتمە سەلیم) سەرپەرشتی هەرسێک ڕۆڵەکانی (فارس و هەژار و عوسمان) دەکات و دەگەڕێنەوە بۆ گوندی (#کانی بزرە#) ، ساڵی 1965 بۆ خوێندن هاتوچۆی گوندی (#کەردز#) ی کردووە لەگەڵ (فارس) ی برایی و چەند منداڵێکی گوندەکەیان، لەوێ تا پۆڵی دووی سەرەتایی خوێندووە، لەبەر نەداری و هەژاری جارێکی تریش دێنەوە هەولێر و هەژار دەنێرنە (خانەی نەوجەوانان) و هەر لە هەولێر خوێندنی سەرەتایی و دواناوەندی و ئامادەیی کشتوکاڵ لەئاسکی کەلەک ساڵی 1980 تەواو دەکات، پەیوەندییەکی پتەوی لەگەڵ مامۆستا و قوتابییەکان هەبووە، بۆ بژێوی ژیانی خۆیی و خانەوادەکەی کرێکاری کردووە و بۆ ماوەیەکیش سەرپەرشتی کرێکارەکانی کردووە لە پڕۆژەی دارستانی #بێستانە# لە کانوونی یەکەمی 1979.
ئاشنایی ژیانی دێهاتی بوو، وێنەی تاوان و گڕدانی دێیەکانی لە مێشک دەرنەدەچوو. لە ساڵی (1977) ەوە پەیوەندی بە ڕێکخستنە نهێنییەکانی بزووتنەوەی سۆسیالیستی کوردستانی کردووە و هەر لە دوای دەرچوونی لە ئامادەیی کشتوکال ساڵی 1980 پەیوەندی بە هێزی پێشمەرگەی حزبی سۆسیالیستی کوردستانی کردووە و بووەتە پێشمەرگە و لەبەر زیرەکی و لێهاتوویی چەندین پلەی حزبی و فەرماندەی پێشمەرگایەتی بڕیووە، لە ساڵی 1982 کراوە بە ڕابەر سیاسی کەرتی دوو لە هەرێمی 8ی دەشتی هەولێر کە فەرماندەی کەرت مامەند مەنتک بوو، لە ساڵی 1983 کرا بەکادیر و پاشان ئەندامی ناوچەی دەشتی هەولێر کە بەرپرسی ناوچە شەهید سەلاح بوو، لە ساڵی 1985 کاتێ لەنێو حزبی سۆسیالیستی کوردستان هەڵوێست وەرگیرا شەهید هەژار یەکێک بوو لە کادیرە دیار و پێشەنگەکان، لە دامەزراندنی حزبی زەحمەتکێشانی کوردستان 12-12-1985 ڕۆڵی هەبوو، لە ڕێکخستنەوەی هێزی پێشمەرگە ڕۆڵی ڕابەر سیاسی هێزی (قوە) وەرگرت و دواتر بوو بە فەرماندەی (قەوەی سەفین) لەنێو هێزی پێشمەگەی حزبی زەحمەتکێشانی کوردستان، لە چەند ناوچەیەک کاری کردووە، بەشداری چەند داستانێکی کردووە، وەک داستانی سێکانیان (شەڕی خەبیران) و شەڕی بەردە سپی لە ساڵی 1982، شەڕی #قەرەچوغ# و بێستانەی گچکە لە ساڵی 1983، داستانی ترپە سپیان لە 27-10-1986 چەندین شەڕ و نەبەردی تر، شەهید هەژار خۆشەویستی هەڤاڵانی بوو، وەکوو فەرماندەیەکی سیاسی و پێشمەرگایەتی کارەکانی زۆر بەدڵسۆزی و بەرپرسانە هەڵسوڕاندوە، لەتەک ئەرکی پێشمەرگایەتی شیعری نووسیوە و کاری ڕۆژنامەنووسی کردووە، نووسەر و قەڵەم بە دەستێکی لێهاتوو بوو، بەشدارییەکی بەرچاوی هەبوو لەنێو بزاڤی ئەدەب و ڕۆشنبیری شۆڕش و پێشمەرگایەتی، بابەتەکانی وەک (شیعر و وتار و چیڕۆک) لە گۆڤار و ڕۆژنامە و بڵاوکراوەکان و ئێزگەی شۆڕش بڵاو دەکرانەوە، هاوکارێکی باشی ڕاگەیاندنی (حزبی زەحمەتکێشانی کوردستان) بوو، چەندین بەرهەمی نووسینی لە بڵاوکراوەکانی ئەم حزبە بڵاو بوونەتەوە، هەروا کاتێک کە خوێندکار بووە خوڵیای کۆکردنەوەی تێکستە فۆلکلۆریەکانی هەبووە و چەندین تێکستی لەم بوارەدا کۆکردوونەتەوە و تۆماری کردوون.
کاتێک ڕژێمی داگیرکەری بەعس بە نیازی سووتاندن و وێرانکردن و ئەنفالکردنی دانیشتووانەکانی گوندە ئازادکراوەکانی دەشتا زێیێ و دەڤەری شیلادزێ هێرش و پەلاماری دەهێنا، هێزێکی پێشمەرگەکانی حزبی زەحمەتکێشانی کوردستان لەتەک هێزەکانی تری لایەنەکان (پارتی دیموکراتی کوردستان و حزبی شیوعی ئێراق) بە فەرماندەیی شەهید هەژار دێدەوانی لە بەرگریدابوون، مەخابن لە ئێوارەی 29-05-1987 لە داستانی #شیلادزێ# لە گوندی (شیف چنارک) لە کاتی هەڵمەت بردن بۆ سەر مۆڵگەکانی خائین و داگیرکەران شەهید دەبێت.
لە دوای ڕاپەڕین لە 28-11-1991 بە ڕێوسمێکی شایستە هاوڕێیان و هاوسەنگەرانی ڕووفاتی شەهید هەژار لە بناری چیای مەتین دەهێننەوە زێدی خۆی لە گۆڕستانی گوندی کانی بزرە بەخاک سپێردرایەوە. [1]