مەنسوور یاقووتی
مەنسوور یاقووتی چیرۆکنووسی بەناوبانگی کوردە و یەکێکە لە ڕواڵەتە دیارەکانی دەیەی 60 و 70ی ئەدەبیاتی فارسی. ئەم نووسەرە ساڵی 1948 لە یەکێک لە گوندەکانی شاری سونقوڕی سەر بە پارێزگای کرماشان لەدایک بووە. قۆناغەکانی خوێندنی لە کرماشان تێپەڕ کردووە و لە سەرەتای دەیەی 70دا بووەتە مامۆستا. مەنسوور یاقووتی ساڵی 1980 و لە دوای شۆڕشی گەلانی ئێران بە بێ ئەوەی هیچ سکاڵایەک لە دژی تۆمار کرابێت لەسەر کارەکەی لابرا و لەمەودوا پیشەی جۆراوجۆری هەبوو و لە لەگەڵ کاری نووسین کرێکاریشی دەکرد.
نووسراوەکانی یاقووتی بەهۆی ڕستەی کوورت و سەربەخۆ و بەبێ ئەوەی لاسایی کەس بکاتەوە دەکرێ پێی بڵێین چخۆفی ئێران؛ ئەم ڕستەیە هی نووسەری ناوداری ئێرانی عەباس مەعرووفییە لە وەسفی مەنسوور یاقووتیدا. ئەم نووسەرە بەهۆی وەسفی فەزای گوند و ژیانی گوندنشینان و چینی چەوساوە و هەروەها بەدەستەوەدانی وێنەیەکی ڕیاڵیستی و ڕەخنەگرانە لە کۆمەڵگەی گوندیی ڕۆژهەڵاتی کوردستان پێگەیەکی بەهێزی لە ئەدەبیاتی گوندی و هەروەها ئەدەبیاتی هەرێمیی ناوچەکانی باشووری ڕۆژهەڵاتی کوردستاندا هەیە. ئەم نووسەرە لە هەندێک بواری دیکەشدا چالاک بووە بۆ نموونە کۆکردنەوەی ئەفسانەکان، توێژینەوە سەبارەت بە ئەدەبی فۆلکلۆر و شانامەی کوردی.
خاک _ پشکۆ کامەران [1]