گېجاوەو ژیوای
نویستەی: #ئیبراهیم میکە عەلی#
بوانی وەشەسیا فەرماوە چەنی بەشێوە جە ڕومانەو گیېجاوەو ژیوای:
دمای ماوێوە ماموٙشا زیاتەر باسەکەش پەی ڕوٙشن کەردیٛوە و واتش: بەخوٙڎا ڕوٙڵە گېیان ئیٛنڎە سەختم مێوەنە من ئی باسمە پەی کەردیدیٛ حەز کەریٛنیٛ منیچ پیٛسەو کاکەیم مەردێنیٛ و ئی ڕوٙمە نەوینێ و پی جوٙرە وەرو دەمو شمەنە خەجاڵەت نەبېیێنیٛ.
سەعیدە بە ئیشارەت و سەمیریچ دەمو هەنسکاوە واتش: دوژمنت خەجاڵەت ماموٙ گېیان، شکور پەی خوٙڎای هەکە تویچ مەنەنی، ئەر توٙ نەبېیێنی ئیٛمە ڕوەما ئەو کیٛ کەردێ ئی ڕاسیەما پەی ڕوٙشن کەروٙوە؟
ئا شەوەشا پیٛسەو تازیەباریی بەرد سەر و هەتا دیٛرێ سەمیر و سەعیدە پەرسیٛ پەرسیٛنیٛ و ماموٙشا چڼش چەنە زانیٛ جوابشا دیٛوە و هەرچیچش نەزانێ واچیٛ: سەمیر گېیان توٙ ویٛت فرسەتێوەنە سەردە ئا لادەگایا و پەرسە بزانە کەسوکارتا حەرکام مەنیٛبا مەویٛزیشاوە.
سەوای جمعە بیٛ، هەڵای یانەو ماموٙیش بیٛنیٛ و سەمیر دڵش نیٛ سەعیدەی جیا بازوٙنە، دڵو ویٛشەنە نیاشەرە سەعیدەی بەروٙ چەنی ویٛش پەی موسڵی و ئەر نەلوٙیچ چەنیش شەوۍ تەر لاشۆ مەنوٙوە، ئا تەرسیٛچشە پەی دروسە بیە ئەر ئا باسە ڕاس بوٙ، بیٛگانیٛنیٛ بە یوٙترینی و مەکریوٙ فرە تەنیا پیٛوە مەناوە، وەلێم هەرچی ئاوردش و بەردش دڵش ڕاش نەڎیٛ ئا مەسەلیٛ نامەحرەمیە بڎوٙ گوٙشیٛ سەعیدەیرە.
ماموٙژەنیشا نانو نیمەڕوٙیش ئامادە کەرد و وەڵیٛ ئانەینە بلا سەرو سفرەو نیمەڕوٙی، ماموٙیشا دیسان چڕییٛوە هوٙڎەکەو ویٛش و واتش بە سەعیدەی: لوە ماموٙژەنیٛچت چڕە با ئاڎیچە بێ.
حەرچوار نیشتیٛرە و ماموٙشا بڕێ مەنەرە و قوٙڵپە قوٙڵپ لوشێوە قووڵەش دا قلیانەکەیش و واتش: ڕوٙڵەگېیان دمای ئا باسیە باسێوە چاڎی گرنگ تەر هەن ئەشوٙم ئاڎیچتا پەی باس کەرو.
سەعیدە قیژناش و واتش: ماموٙ گېیان وەسیٛن، چانەی زیاتەر وەرگە مەگیٛرو.
سەمیر بە ئیشارەو چەما ئیشارەتێوەش کەرد ئەو سەعیدەی و یاوناشەنە ویٛش گیٛروٙ.
ماموٙیشا وات: ڕوٙڵەگېیان ئی باسەشا وەشا بەش ئینە خوٙڎان کوچێ بارو سەرو دڵیتا سوک بوٙ.
ماموٙژەنیٛشا وات: دەی پیاکە هەرچی هەن زوو باسش کەرە وەختو نان واردەین با چاشتەکیٛما سەردە نەبوٙوە.
ماموٙشا سەرێوەش تەکنا پەی کەیوانویٛش و ڕوەش کەردە سەعیدەی و سەمیری و واتش: دمای ئا باسیچە هەکە شەویٛ پەیم کەردیدیٛ شمە حەر واڵەو براڵیٛ یوٙترینیندیٛ.
هەردوی هەم دڵشا وەش بی و هەم پەرسایچشا: چەنی ماموٙ گېیان؟
ماموٙیشا وات: مریەمەی براژەنیم بەهەشت یاگیٛش بوٙنە و ڕوٙحش ئارام بوٙ فرە بەسەلیٛقیٛ بیٛ، ئا وەختە هەکە شمەشا ئاردیٛندیٛ لاو ویٛشا تەمەنتا فرەش بەین نەبېیەن و هەردویتا شوٙتەوەریٛ بییٛندیٛ، جەژنېوە ئامێوە و چوار پەنج ڕوٙویٛ یانەو تاتەیم مەنیٛوە، ئا وەختە من هەڵای ژەنیم ناوردیٛبیٛ و خاس ویرما، مریەم خاتونە ڕاو ئەڎێ ڕەحمەتییٛمۆ ئەڎالۍوە عەرەبەش پیٛڎا کەردە و ئەڎام قسیٛش چەنی ژەنە زاڕوٙوەرەکیٛ کەردیٛ چوار ڕوٙویٛ ڕوٙوانە دویٛجار تیٛر شوٙتیٛتا کەریٛ.
سەعیدە خوەی گیٛرتە و پەرساش: دەی ماموٙ ئی هەواڵە چیٛشش چەنەن ئیٛمە دڵش پەنە وەش کەرمیٛ؟
لوشێوە تەرەش داوە قلیانەکەیش و بزېوەش کەرد و بە دەس ئیشارەتێوەش کەرد ئەو سەعیدەی و حاڵیەش کەردە هەکە پەلە نەکەروٙ.
دمای ئانەی هەناسەش نیشتۆ واتش: ڕوٙڵە گېیان جە ڕاو ئا شوٙت واردەیۆ هەردویتا بېیەیدیٛ واڵە و براڵەی شوٙتییٛ یوٙترینی و ئیٛتر مریەم خاتونەی براژەنیم خیاڵش ئاسودە بی و تەرسەو ئانەیشە نەمەنە هەکە شمە زلیٛ بیدیٛ و نامەحرەمیٛ بیدیٛ بە هەنترینی.
بڕگێوە جە ڕوٙمانەو گیٛجاوەو ژیوای لاپەل (361 - 363).
ئی ڕوٙمانیٛ دما بەر ویرما و (450) پەلێوە بەرمشۊ خجڵەنا ملوشۆ پوٙرە و خوٙڎا یاربوٙ پی نزیکارە وزوش وەرو دەسو وانەراش و پی هەنگامیٛچە ڕوٙمانێوە تەرەی هۆرامیە جە ئەڎێ بوٙ.[1]