سەروای چ بکەم؟ لای میرزای هەورامی
قسەی زل زل
ئەرێ نەمروود! زەححاکی! دەور! دەبیرکوللی فیتنە و فەساد!
بەربەیانیان لە قاپی حەق، مەرگت داوا نەکەم چ بکەم
سازمانی حقووق بەشەر شەرمەندەیە لە عالەمدا
ئەو بەشەرە خەیاڵییە، یادی (عەنقا) نەکەم چ بکەم
ئەی درێغا، شاخەکانی وەڵات هەموو، هەور و تەمە
لەبەر هەور و تەمی شاخان، ڕوو لە سەحرا نەکەم چ بکەم
مێژووی گەلان، سەما ئەکا بۆ گەلی خۆی، کە ئازادە
مێژوونووسی کوردیش ئەڵی (ئەرێ هۆ لەیلا) نەکەم چ بکەم
ئەگەر نەبێ پیاوێکی لە حاڵزانی ژیر و چالاک
قسەی زل زل لەگەڵ تووبا و ڕەعنا و سەلما نەکەم چ بکەم
ڕەهبەرێکی گەل و ئایین نەبێ بۆ من، ناعەلاجم
ئەحە و جەلە و مچە و عەزه، سەرۆک مەولا نەکەم چ بکەم
لۆچی تێکەوت پەنجەکانم، نەیتوانی تێڵا ڕابگرێ
بە تەزبێحی سۆفیانە (سبحان الله) نەکەم چ بکەم
کە (میرزایی) بە حەسرەتی چەرخی فەلەک گیرۆدە بوو
بۆ ئاواتە مەردانەکەی، مەدح و سەنا نەکەم چ بکەم
#دیوانی میرزای هەورامی# [1]