جەمال غەمبار هۆنراوەنووسی باشووری کوردستان ساڵی 1962 لە گەڕەکی مەڵکەندی لە شاری #سلێمانی# لەدایک بووە. بە هۆی کاری باوکییەوە خێزانەکەیان بۆ ماوەیەک نیشتەجێی گەڕەکی ئیمام قاسمی شاری #کەرکووک# بوون و تاوەکو پۆلی دووەمی سەرەتایی لە کەرکووک خوێندوویەتی و پاشان گەڕاونەتەوە سلێمانی و قۆناغەکانی تری خوێندن هەتا ئامادەیی لە شاری سلێمانی تەواو کردووە.
لە ساڵی 1984 کۆلێژی یاسای لە زانکۆی بەغدا تەواوکردووە و ساڵی 1989 بووەتە پارێزەر لە سلێمانی. خولیای نووسین و خوێندنەوە لای جەمال غەمبار لە ناوەڕاستی حەفتاکانەوە سەری هەڵداوە و لە ڕێی چالاکی خوێندنگەکانەوە تێکەڵاوی کار شانۆ بووە. دواتر لە بواری هۆنراوەنووسیندا گیرساوەتەوە. یەکەم هۆنراوەی لە ساڵی 1976 لە ڕۆژنامەی هاوکاری بڵاوکردۆتەوە.
لە ساڵی 2000 ەوە کوردستانی بەجێ هێشتووە و ماوەی دوو ساڵ لە دیمەشق ماوەتەوە. پاشان لە ساڵی 2004 ەوە لە وڵاتی ئوستڕاڵیا لەگەڵ خێزانەکەیدا نیشتەجێن و ڕەگەزنامەی ئوستڕاڵیایان پێ بەخشراوە.
ئەندامی ڕێکخراوی ئەمنێستی ئینتەرناشناڵی ئوستڕاڵی و ئەندامی کۆمەڵەی نووسەرانی فرەڕەگەزی باشوری ئوستڕاڵیایە
لەپاڵ نووسینی هۆنراوەدا کاری وەرگێڕانی چەندین لێکۆڵینەوەی وێژەیی و ڕووناکبیری و فیکری ئەنجام داوە. سێ دیوانی کوردی و دیوانێکیشی بە زمانی عەرەبی بڵاوکردۆتەوە سەرەڕای ئەوەش چوار پەڕتووکی وەرگێڕاوە.