حەمە ڕەزا بەهمەنی
ئازیزا، دڵسۆزا زوانی هۆرامی:
من ماوێوی درێژا کە خەریکو نویسەی ڕۆمانێویەنا بە زوانی هۆرامی، بە ڕاسی مەشێێ زوتەر جێ واذەیە تەمامنێم بەڵام وەزعەو ژیوای جە ئۆروپانە و هەر پاسە کاری ڕوانە چی وەڵاتانە، ئاندە وەخت پەی یوی نمازۆوە.
وەشبەختانە ئیسە چاپ کریان وئۆمێذم ئانەنە کە هەرچی زووتەر گنۆنە دلێ کتێبخانەکا، تا بەڵکو بۆ بە قەترە وارانێو و تکۆنە دلێ دەریاو پان و بەرینو فەرهەگو هۆرامانی.
نوسەی ئی ڕۆمانیە جە ڕاسیەنە بەشێوش جواب دایا بە هەس وسۆزو وێم، وەراوەر پی زوانیە.
هەسیار و هاندەرو من چی ڕێنە تەنیا عێشق و وەشەویسیا پی فەرهەنگیە.
هەر پاسە وێتا مزاندێ، هیچ زوانێو جە دنیانە نەتاوانش بەبێ نوویسەی و گۆفتوگۆ کەردەی، بلۆ وەرۆ و گەشە کەرۆ.
نوویسەی ڕۆمانی، چ درێژ، چ کۆڵ، هەمیشە گۆرەتەرین دەسەوام بیەن پەی وەرکۆتەی گردو زوانەکا دنیای.
دیارا زوانێو کە فرەتەر پەنەش نوویسیان، خاستەر تاوانش جە بازنەو جۆغرافیاو وێشەنە بلۆ بەر و بە دنیای بژناسیۆ.
داستان و ڕۆمان نوویسی، تەنیا زوانی دۆڵەمەند مەکەرۆ، بەڵکو مڵۆنە دلێ ڕێخەو فەرهەنگو کۆمەڵگای و چا ڕێوە مژناسنۆش بە دنیاو دۆروبەریش. ئی داستانێ کە ئارۆ گنا سەرو کاغەزی و منویسیا، وەختو وێش دەمبەدەم دلێ خەڵکیەنە باس کریێنێ و واچیێنێوە.
فرە جارێ داستان نوویس، داستانەکەش پیچیۆ بە بارودۆخێوێو کە وێش چەنەش ژیوان و بەسەرئاماو خەڵکیوی گێڵنۆوە، کە چەنیشا گۆرە بیەن.
ڕۆمانو سیاوڕێحانەی، چانەیە جیاواز نیا و گێڵۆوە پەی 40 ساڵێ چیوەڵتەرو ژیوای خەڵکو هۆرامانی و هەر پاسە ملۆنە دلێ کرۆکو سەختی و تاڵیەکا ڕۆزگارێوی، کە ئا خەڵکشە چەنە ژیوان و وێپایی و بەربەرەکانێشا پەی وەشکەردەو کۆمەڵگێوی کە شیاوو ئینسانو ئا سەردەمیە بیەبۆ.
ئا خەڵکە چا زەمانەنە، سەرەڕاو گردو موسیبەتەکاشا، بە کەمتەرین کەلوپەل و کەرەسەو ژیوای، تاوانشا هەمیشە شاذی و زۆق کەرا بە مێمانو یانەکاشا.
رۆمانو سیاورێحانەی دلێ ئا خەڵکیەنە خۆڵقیان و هەر چاگەیچ گۆرە بیەنو یاوان پەنە.
سیاوڕێحانە، بەسەرئاماو دووێ دڵداران کە داستانو شیرین و فەرهادی جە بیستوونەنە و مەم و زینی جە کۆردەواریەنە، مارۆوە یاذ و گیانێوی تازەشا کەرۆنە.
سیاوڕێحانە، بۆپڕوزو سۆتەو دووێ دڵان، کە جە کەپرەو هەوارو یارێنە مژنەویۆ.
با چەنی سیاوڕێحانەی، بلمێنە دلێ سۆرۆشتە سێحرئەنگیزەکەو هۆرامانی، تا بەرۆما پەی تەوافو سوورەهەراڵەی و جە دەشتەو سۆزەڵانی (لۆیەنە)، ڕەذێما کەرۆ تا بیاونۆما بە هەرزەڵەو بەرزەڵنگی. چاگە، لا چنووری وێپایەنە، بسیەیمێوە و دوورۆ تەماشێوو هەوارگەو یارێ کەرمێ.
ئۆمێدوارەنا کە ڕۆمانو سیاوڕێحانە، بۆ بە ئۆمێذێو دلێ دڵیمانە کە چەنی ئەهورامەزداو ئێشقی پەیمان بینمێ، کە هەرگیز پاساوەو قینێ جە دڵمانە وەشە نەکەرمێ.
سیاوڕێحانە، تامەزرۆ ئاواتێویا کە ئێشقی کەرۆ بە ئامیانو وەشگرسای ژیوای، پەی نەوەکا ئایەندەو هۆرامانی.
ئی ڕۆمانە ئیسە بە چاپ یاویان، ئۆمێدوارەنا هەرچی زووتەر بیاوۆ دەسم، بە دڵنیایۆ ئا ئازیزێ کە گەرەکشا بۆ بواناشۆ، من بە شێوێو میانوش دەسشا.
چێگەیچەنە, بە لازمش مزانو کە سپاس و پەنەزانای وێم پێشکەشو ئا ئازیزا کەرو کە چی ڕێنە یاردیدەرێم بیێنێ.
یۆ چا کەسا، برای وەشەویسم کاک موقەدەم لەهونیا، کە وەختێو داواو هەمکاریم وەنە کەرد، هەم ئۆستادانە و هەم دڵسۆزانە ئامانە مێذان و بە ئۆپەڕو تواناییشۆ چەنی دانە بە دانەو واچەکا، جە ئەوەڵ تا ئاخرو ڕۆمانەکەی، شەریک و هامرام بیەن.
کەسێوتەر چا ئازیزا کاکە (گۆران هوشمەندا) کە وێش هەم دەسوقەڵمدارا و هەمیچ وەش ویر و فەرهەنگ دۆسا، کاکە گۆران، کارو ڕێکوسەی و مۆعەرەفی کەردەی ڕۆمانەکێش، تا یاونایش بە چاپخانەی جە ئەستۆوە بیەن.
هەر پاسە سپاس و حۆرمەتم هەن پەی باخان خانمێ (باخان ئەحمەد) کە کارو ویرایشو ڕۆمانەکەیش بە ئۆپرو دڵسۆزیۆ تەمامنا، هەر چن چیلاو چۆلاوە هۆڵ دریا کە شەمشەلەکۆرێ وزیانە دلێ کارەکەی، بەڵام باخان خانمە کە وێش ڕۆحو ئازادیوازی و پارێزنای زوانی (ئەذاییش) چەنەن، چا بوارۆ سەرکۆتێ بیە.
جە ئاخریچۆ سپاسی فراوانم هەن پەی چاپخانەو (ناوەندی ڕێنما)ی جە سلێمانی کە سەنگ تەماشا نیا و سەرەڕاو گیرو گرفتەکاشا، کارو چاپکەردەی ڕۆمانەکەێشا بەرد وەرۆ. ئارەزو سەرکۆتەیم هەن پەیشا.
حەمەرەزا بەهمەنی، یۆتۆبۆری #12-04-2018# [1]