ناڤ: فەوزیا
ناڤێ بابی: ئەمین
ساڵا ژ دایکبوونێ: 2003
ڕوژا دزین و بێسەر و شوینکرنێ: #03-08-2014#
ڕوژا ڕزگارکرنێ: #01-10-2024#
جهێ ژ دایکبوونێ: کومەڵگەها #گر زەرک# / #شنگال#
$ژیاننامە$
فەوزیا ئەمین سەیدۆ قاسم خەلکا کومەڵگەها گر زەرک یا سەر ب باژێرۆکێ شنگال یا باشوورێ کوردستانێ یە، ل ڕێکەفتا 03-08-2014 ژ لایێ هێزێن دەولەتا ئیسلامی یا داعش ڤە هاتییە دزین و بێسەر و شوینکرن و ل ڕێکەفتا 01-10-2024 هاتیە ڕزگار کرن. [1]
چیڕۆکا فەوزیا ئەمین سەیدۆ قاسم
وەزارەتا دەرڤەیا ئەمریکا ئەڤرۆ راگەهاند، سەرکەفتیانە ژنەکا ئێزدى ل کەرتێ غەززە ل فلستینێ هاتیە رزگارکرن کو ئێک ژ قوربانیێن دەستێ داعشێ یە و خەلکا شگالێ یە.
دەنگێ ئەمریکا بەلاڤکر، نێزیکى هەیڤەکێ چاڤدێرییا پرۆسەیا رزگارکرنا وێ ژنێ دهێتە کرن کو ژ بەر نەبوونا پەیوەندیێن دپلۆماسى دناڤبەرا ئسرائیلێ و ئیراقێ دا کێشە هەبوون، لێ ل داویێ وەزارەتا دەرڤەیا ئەمریکا و نوینەراتیێن دپلۆماسى یێن ئەمریکا ل دەڤەرێ سەرپەرشتییا ڤەگوهاستنا وێ کرینە د ناڤبەرا ئسرائیل، ئوردن و ئیراقێ دا و ب هاریکارییا نەتەوەیێن ئێکگرتى هاتیە رزگارکرن و پشتى 11 ساڵانن گەهشتیە ناڤ کەسوکارێن خوە.
پەیڤدارێ وەزارەتا دەرڤەیا ئەمریکا دا زانین چیرۆکا وێ ژنێ گەلەک دلتەزینە و ئەو خۆشحالن کو ب خێزانا خوە شاد بووى، خواست ژى خەلک رێزێ ل ژیانا تایبەت یا وێ ژنێ بگرن کو ب خۆشتڤیێن خۆ شاد بوویە.
رەڤاندنا فەوزیایا زارۆک
فەوزیا ئەمین سەیدۆ کو ژیێ وێ 10 سال بوون دەمێ داعش ل هەیڤا 8 یا سالا 2014ێ هێرش کرییە سەر شنگالێ و وەکو کولەیەکا سکسى (سەبییە) دگەل هزاران کچ و ژنێن ئێزدى رەڤاندى.
فەوزیا ل دەمێ هێرشا داعشێ دگەل دوو برایێن خوە یێن 7 سالى و 10سالى، سەرەدانا مامێ خۆ ل شنگالێ کربوون و ئه و ژى دکەڤنە دەستێ داعشێ.
پشتى چەند هەیڤان، برایێن فەوزیایێ شیان ژ دەستێ داعشێ رزگار ببن، لێ داعشێ فەوزیا برە باژێرێ رەقایێ ل سووریێ و د زیندانێڤە روى ب روى ئەشکەنجە و دەستدرێژیێ دبیت.
زیندان و بێهۆشکرن و دەستدرێژى
پاشى ب زۆرى دهێتە رادەستکرن بۆ داعشەکێ فلستینى کو ژیێ وى 24 سال بوون و دکەتە هەڤژینا خوە. ئه و داعشێ فلستینى بزاڤێ دکەت دگەل وێ زارۆکا ئێزدى بنڤیت، لێ فەوزیا رێکێ نادەتێ، پشتى 3 رۆژان دچیتە دەرمانخانەیەکێ دەرمانەکێ خەوێ دئینیت ب زۆرى د دەتێ و دگەل گری و بێهۆشبوونێ هەر تشتەکێ دگەل دکەت.
ئەو داعش وێ کچا ئێزدى یا بێ رێک و بێخودان وەکى هەڤژینا خوە سەرەدەریێ دگەل دکەت تا فەوزیایێ زارۆکەک ژێ دبیت، و هێشتا ژیێ وى زارۆکى 2 هەیڤ جارەکا دى ب دوو گیان دبیت. ئێدى فەوزیا دهێتە نەچارکرن دگەل وان زارۆیان بژیت سەربارى وێ توندوتیژییا بەردەوام ژ لایێ وى داعشیڤە دگەل دهاتە کرن ب تایبەتى پشتى ژنەکا عەرەب بۆ خوە ئیناى.
ل داویا سالا 2018ێ کو هێزێن هەسەدێ ل رۆژئاڤایێ کوردستانێ داعش ب دویماهى ئینا، وى دەمى ژیێ فەوزیایێ 15 سال بوون و پەیوەندییا وێ دگەل وى داعشى هاتە بڕین، ئەو نزانیت کیڤە بچیت و بویەران تێناگەهیت ژبەر وێ ئێکێ وەکى هەمى ژن و زارۆکێن داعشێ ئەو ژى بەرێ خۆ ددەتە پارێزگەها ئەدلبێ.
زارۆکبوون د ترۆمبێلێ دا
ل دەستپێکا سالا 2019ێ ل دەمێ فەوزیا دگەل 4 زەلام و ژنەکێ برێڤە بوون بەرەڤ ئەدلبێ د ترۆمبێلێ دا زارۆکا دووى دبیت. پشتى گەهشتیە ئەدلبێ داعشێ ئەو کریە کوێلە دهێتە کوشتن.
فەوزیا ژ ئەدلبێ بۆ ترکیا و مسرێ و پاشى بۆ غەززە
ئێدى فەوزیا کو نزانیت ل کیڤەیە و کیڤە بچیت، ژ لایێ هندەک داعشێن فلستینى رێکێ نیشان ددەن بچیتە دەڤ کەسوکارێن وى داعشێ ئەو کرییە کوێلە کو خەلکێ باژێری غەززە یێ فلستینێ بوو، پشتى 8 هەیڤان مایە ترکیا ل سالا 2020ێ ب رێکا مسرێ دگەهیتە غەززە.
دەربازبوون ژ غەززە ( ئێک ژ ئالۆزترین پرۆسەیێن رزگارکرنێ)
چالاکێن مافێ مرۆڤى یێن کار لسەر وێ دۆسیەێ کرى ب دەنگێ ئەمریکا راگەهاندیه ،د وى ماوەی دا کو فەوزیا ل غەززە بووو، ژ نوى دشێت هزر د ژیانا خۆ دا بکەت، کى یە؟ و بۆچى ئەڤە ب سەرێ وێ هاتییە؟ بەردەوام د ناڤبەرا دوو بژاردەیان و دوو دلیێ دا دژیت، بەردەوامیێ بدەتە ژیانا خوە دگەل وان دوو زارۆیان یان ڤەگەڕیتە ناڤ کەسوکارێن خوە؟. لێ ل داویێ بڕیارا ڤەگەرێ د دەت.
ستیڤ مامان کو بازرگانەکێ جوهى یێ کەنەدى یە و چەندین سالە ب رزگارکرنا کچ و ژنێن ئێزدى و مەسیحى یێن د دەستێ داعشێ دا رادبیت، ب رێکا هژمارەکا چالاکێن شنگالێ و هەرێما کوردستانێ فەوزیایێ ژى رزگار دکەت.
ستیڤ مامان دبێژیت، تا نها ئەڤە ئالۆزترین حالەت بوویە کو وى کار لسەر کرى و چەندین هەیڤان ڤەکێشایە و ژناوچەیەکا شەڕى ژ ناڤ دەستێن کەسوکارێن داعشەکى هاتیە دەرخستن و قورتالکرن.
نێزیکى دوو هەیڤان بەرى نها، فەوزیا ب هاریکاریا هندەک کەسان شییا ژ مالا کەسوکارێن وى تیرۆرستێ داعشێ ل غەززە برەڤیت یێ بەرى 11سالان وەکو سەبایا ئەو بۆ خوە برى. فەوزیا خوە دگەهینتە خانییەکى 2 کیلۆمەتران بتنێ نێزیکى سنورێ ئسرائیلێ، لێ ژیانا وێ نابیتە تشتەکێ گرنگ بۆ سوپایێ ئسرائیلێ ژبەر کو ئەو ب د شەڕێ دگەل حەماسێ دانە.
ستیڤ مامان دیار دکەت ئەوا بوویە ئەگەر کو ئەمریکى پتر گرنگیێ بدەنە رزگارکرنا وێ ژنا ئێزدى و لەزێ بکەن، بوویەرەکا بێوژدانانە بوو، کو هژمارەکا زەلامان دەمێ فەوزیا بتنێ ل نێزیک وى خانى دیتى ئازار دایە.
ئەوبوو ل سپێدەهیا دوهى رۆژا سێشەمبێ 1ى هەیڤا چریا ئێکێ یا ئەڤ سالە 2024ێ ب رێکا ئەمبۆلانسەکا نەتەوەیێن ئێکگرتى فەوزیا ژ غەززە ب رێکا دەرگەهێ کەرەم شەلۆم بۆ ناڤ ئسرائیلێ دهێتە ڤەگوهاستن و ل هەمان رۆژ بۆ بالیۆزخانەیا ئەمریکا ل ئسرائیلێ دهێتە برن و پاشى ب رێکا دەرگەهێ ئالنبى دەربازى ئوردنێ دبیت.
سەلوان شنگالی، بەرپرسێ راسپاردى یێ وەزارەتا دەرڤەیا ئەمریکا بۆ ڤێ دۆسیەیێ دبێژیت، بالیۆزخانەیا ئیراقێ ل عەمانێ پیشەوازییا فەوزیایێ کر و ب رێکا فرۆکەیەکێ بۆ بەغدایێ هاتیە ڤەگوهاستن.
گۆت ژى رزگارکرنا ژبەر رێکارێن یاسای و نەبوونا پەیوندییان دناڤبەرا ئیراقێ و ئسرائیلێ دا ب زەحمەت بوویە لێ سەرەنجام ب رێکا کەس و وەلات و ئالێن خەمخۆر فەوزیا ل رۆژا چارشەمبا بۆرى ژ بەغدایێ دهێتە ڤەگوهاستن بۆ ناڤ کەسوکارێن وێ ل شنگالێ، هەرچەندە بابێ وێ هەردەم چاڤێ وى ل ڤەگەڕا کچا وى بوو لێ ب وان حەسرەتان و بەرى دوو هەیڤان بەرى ب دیتنا کچا خوە شاد ببیت وەغەر کر.
فەوزیا کو بەرى 11 سالان و دەمێ ژیێ وى 10 سال ژ وێرێ هاتبو رەڤاندن و ئەو بسەرى هات یا د 11 سالێن بۆرى دا ئاماژە پێ هاتییە دان و هیشتا سەدان کچ و ژنێن دى یێن ئێزدى چارەنڤیسێ وان نە دیارە و بەس خودێ دزانیت ل کیڤەنە و کا وەکى فەوزیایێ چ بسەرێ وان هاتییه. [2]