دانیشتووی: #سەردەشت#
بەرپرسایەتی: سەرلک
ساڵی شەهیدبوون: 1363
شۆڕشی پڕشکۆی نەتەوەکانی ئێران بە دژی دیکتاتۆریی پاشایەتی، هەلێکی لەباری بۆ گەیشتنی گەلانی ژێرچەپۆکی ئێران بە مافەکانیان پێک هێنا. گەلی کوردیش یەکێک لەو نەتەوانە بوو کە چاوەڕوان بوو پاش ڕووخانی ڕێژیمی پاشایەتی بە ماف و ئازادییەکانی بگا. بەڵام کاتێک ڕێژیمی ئاخوندی دەسەڵاتی گرتە دەست، نەک هەر دەسکەوتەکانی ڕاپەڕینی نەتەوەکانی ئێرانی خستە ژێرپێ، بەڵکوو بە توندترین شێوە هێرشی کردە سەر مافە ڕەوا و ئینسانییەکانیان. بزووتنەوەی میللی دێموکراتیکی خەڵکی کوردستان لە ڕۆژهەڵاتی کوردستان بە ڕێبەرایەتی حیزبی دێموکرات کە خاوەنی ئەزموونی شۆڕشگێرانە و خەباتگێڕانە بوو، بڕیاری دا دیفاع لە مان و مەوجودییەتی خۆی بکا و بەرەنگاری دیکتاتۆڕی و کۆنەپەرەستی بێتەوە. سات بەساتی ئەو بەشەی مێژووی خەباتی حیزب و نەتەوەکەمان، بە خوێنی باشترین وبە ئەمەگترین ڕۆڵەکانی ئەو نەتەوەیە نووسراوەتەوە.
شەهید حوسێن شەمامی ساڵی 1328ی هەتاوی لە شاری سەردەشت و لە بنەماڵەیەکی مام ناوەندی چاوی بە دنیای ڕوون هەڵێنا. ئەو ئەگەرچی هەتا سێهەمی ناوەندی خوێندبووی، بەڵام بەردەوام خەریکی خوێندنەوە و فێربوون بوو. ئەو لە هەلومەرجی دوای شۆڕشی گەلانی ئێران دا باش دەیزانی نەتەوەکەی لەوپەڕی ژێرچوپۆکی و مەینەتبەشیدا دەژی، بۆیە لە پێناو ڕزگاریی نەتەوەکەیدا پێوەندی بە تەشکیلاتی حیزبەوە گرت ودەستی بە کار و تێکۆشانی شۆڕشگێڕانە کرد.
بە دەست پێکردنی پەلاماری ڕێژیم بۆ سەر کوردستان، حوسێن شەمامی ئەرکی قورستری کەوتە سەر شان و لە بەڕێوەبردنی ئەرکەکانی تەشکیلاتیی نێوشاری سەردەشت دا لیاقەت و لێوەشاوەیی زۆری لەخۆی نیشان دا. دوژمنانی ئازادیی نەتەوەی کورد، زۆر لە هەوڵی ئەوەدا بوون کە هەستەکانی تەشکیلاتیی حیزب لە نێوشاردا بخەنە داو. بەڵام حەول و لێزانیی حوسێن پیلانەکانی دوژمنانی پووچەڵ کردەوە.
ساڵی 1359ی هەتاوی بڕیاری دا ببێتە پێشمەرگە و هەموو تەمەنی خۆی بۆ خزمەت بۆ حیزب و نەتەوەکەی تەرخان بکا. بۆیە چەکی پێشمەرگایەتیی کردە شان و زۆر زوو سەرنجی کۆمەڵانی خەڵک و هاوسەنگەرەکانی بۆ لای خۆی ڕاکێشا، بەهۆی لێوەشاوەییەوە لە لایەن تەشکیلاتەوە وەک جێگری لک لە هێزی شەهید موعینی ئەوکات دیاری کرا. هاوڕێ حوسێن شەمامی ئازا، فیداکار و چاونەترس بوو، خاوەن بیروباوەڕی قووڵی شۆڕشگێڕانە بوو، لە زۆربەی شەڕەکانی ئەوکات وەک شەڕی نێو شاری سەردەشت، دووڕێیانی سەردەشت- مەهاباددا ڕۆڵێکی بەرچاوی گێڕا و ئازایەتییەکی کەم وێنەی لە خۆی نیشان دا. حوسێن شەمامی هەر لەو کاتەدا کە پێشمەرگەیەکی ئازا و کادرێکی سیاسیی پێگەیشتوو بوو، فەرماندەیەکی لێوەشاوەش بوو. هاوکات لە بردنەپێشی سیاسەت و ڕێبازی حیزب دا شارەزا بوو، هەر ئەو تایبەتمەندییانەی بوون بەهۆی ئەوەی دواتر لە کۆنفرانسی کۆمیتەی شارستانی سەردەشت وەک ئەندامی کۆمیتەی شارستان هەڵبژێردرا، پاشان کاتێک کۆمیتە شارستانی ڕەبەت و هێزی زمزیران پێک هات، شەهید حوسێن شەمامی وەک ئەندامی کۆمیتەی شارستان و فەرماندەری یەکێک لە لکەکانی هێزی زمزیران دیاری کرا. ئەو سەرکەوتووانە قۆناغەکانی تێکۆشانی سیاسی و پێشمەرگانەی خۆی بڕی و بوو بە ڕۆڵەیەکی نەبەز و کوڕی ڕۆژی تەنگانە. ئەو لە ئەرکە پێ سپێردراوەکانیدا جیددی و هەڵسووڕ و ماندوویینەناس بوو. لە شەڕەکانی ناوچەی ڕەبەت ئازا و بەوەج و ورەبەخش بوو، چقڵی چاوی دوژمنان و خۆشەویستی خەڵکی زەحمەتکێشی ناوچەکانی ڕەبەت و سەردەشت بوو.
شەهید حوسێن شەمامی لە کاتی هێرشی دوژمن بۆ سەر کوردستان قورسترین مەسئولییەتی قەبووڵ کرد و ئازایانەش بەڕێوەی برد. ئەو لە تێکشکاندنی دەیان پەلاماری دوژمن دا ڕۆڵی بەرچاوی گێڕا. شەڕەکانی نێوشاری ڕەبەت، جادەی سەردەشت – پیرانشار، واوان و زۆر شەڕی دیکە بۆ هەمیشە شاهیدی ئازایەتی و فیداکاریی حوسێن شەمامین.
ئەو لە بڵاوکردنەوەی سیاسەتەکانی حیزب دا، لە تەبلیغ کردنی هەڵوێستەکانی حیزب دا، لە هەڵسوکەوت و بەڕێوەبردنی ئەرکە تەشکیلاتییەکانیدا نموونەی کادرێکی چالاکی حیزب بوو. ئەونچ لەنێو خەڵک و چ لە نێو تەشکیلات دا خاوەن ڕێز و خۆشەویستی بوو، هەربۆیەش لەلایەن تەشکیلاتەوە وەک فەرماندەیەکی لێهاتوو و کارامە بەرپرسایەتیی زیاتری پێ ئەسپێردرا.
لە بەهاری سالێ 1363ی هەتاوی لە کاتێک دا سروشت ڕەنگێکی تازە و نوێی بەخۆیەوە دەگرت و دار و دەوەن و لێڕەوارەکانی ناوچەی ڕەبەت لە خەوی چەند مانگەی زستان وەخەبەر دەهاتن و ڕوحێکی تازەیان وەبەر دەهات، دوژمنانی سوێندخواردووی نەتەوەی کورد بە هێزیکی یەکجار زۆرەوە هێرشیان هێنایە سەر گوندی “چوالان” لە ناوچەی ڕەبەت. تێکۆشەرانی دێموکرات ڕۆژی 15ی خاکەلێوە لە چەند شەڕگەدا بەرەنگاری هێزەکانی ڕێژیمی کۆماری ئیسلامی بوونەوە. ڕۆژی هەوڵ و هیممەت و ئازایەتی بوو، ڕۆژی دیفاع لە شەرەف و کەرامەتی نەتەوە بوو. بۆیە لە ڕۆژی یەکەمی شەڕدا سەلماندیان و بە داگیرکەرانیان نیشان دا کە کوردستان سەنگەری دیفاع لە ئازادییە. لەو شەڕەدا شەهید حوسێن فەرماندەریی بەشێکی زۆری لە شەڕگەکان دەکرد، ئەو سەنگەراوسەنگەری دەکرد و بۆ ساتێک وەستانی نەبوو، هیوا و ئۆمێد و ورەی بە هاوسەنگەرانی دەدا. ڕۆژەکانی 16 و17ی خاکەلێوەش شەڕ درێژەی هەبوو. لەو سێ ڕۆژەدا پێشمەرگە گیان لەسەردەستەکانی دێموکرات هەڵۆئاسا دەرسێکی لەبیرنەکراویان بە هێزی دوژمن دا کە ئێستاش خەڵک وەک نموونەی قارەمانەتی بۆ ڕۆڵەکانیان دەگێڕنەوە.
ڕۆژی 17ی خاکەلێوە فەرماندە حوسێن شەمامی لە ئاکامی ئەو خۆڕاگری و بەربەرەکانییە کەم وێنەیەدا لەگەڵ 6 هاوسەنگەری دیکەی بە ناوەکانی فەقێ عەوڵا محەممەدی، محەممەد شێخەیی، عەلی شەریف زادە، عومەر ڕەحمانی، برایم ئەحمەدی و محەممەد گەرۆری چوونە نێو ڕیزی پڕ لە شانازیی کاروانی شەهیدان و لە سەنگەری دیفاع لە ماف و ئازادییەکانی نەتەوەکەیان دا سەریان دانا[2]
ماڵپەڕی کوردستان و کورد
برایم چووکەڵی