ساڵی 1954 لە گوندی #وەڕاز# ی سەربە شارۆچکەی #شارباژێڕ# چاوی بە ژیان هەڵهێناوە، تەمەنی پێنج ساڵان بووە کە ماڵیان هاتۆتە شاروچکەی #چوارتا# و هەر لەوێ قۆناغی سەرەتایی تەواوکردووە و قۆناغی ناوەندی و ئامادەیی کشتوکاڵی لە #سلێمانی# تەواوکردووە، هەر لە منداڵییەوە شەیدای خوێندنەوە و خۆشەویستی زۆری بۆ هونەر هەبووە.
ساڵی 1973 ئامادەیی کشتوکاڵی تەواوکردووە سەرەتای ڕێبازی هونەری لە هونەری شانۆ و خۆشنووسی وە دەستی پێ کردووە.
ساڵی 1970 و 1971 لە دامەزراندنی دوو تیپی شانۆگەریدا وەک ئەنامی دەستەی دامەزرێنەر ڕۆڵی هەبووە.
1-تیپی شانۆگەری سەر بە کۆمەڵەی هونەر و وێژەی کوردی چوارتا ساڵی 1970
2-تیپی شانۆیی ئامادەیی کشتوکاڵی بەکرەجۆ ساڵی 1971 تا ساڵی 1974
لە چەندین چالاکی هونەری ئەو دوو تیپەدا بەسەرکەوتوویی ڕۆڵی بینیووە، هەر لە ساڵی 1969وە لە ڕێگەی هاوڕێیەتی لەگەڵ هونەرمەندی کۆچکردوو ساڵح دڵخۆشی شانۆکاری کۆمێدی و خۆشنووسی بەتوانا کەبرای هونەرمەندان عومەر دڵخۆش و عەلی دڵخۆشی خۆشنووس بوو، خولیا و خۆشەویستی خۆشنووسی کەوتە سەری و کەوتە ڕاهێنان سەرجەمی تابلۆکانی شاروچکەی چوارتا و گەڕەکی مامۆستایان و مەجیدبەگی سلێمانی لە ساڵانی 1970؛ 1980؛ 1990 بەدەست و پەنجەی ئەو نووسراون لە چوارتا و لە سلێمانیش دوکانی خۆشنووسی هەبوو کاری خۆشنووسی بۆ چەندین پەرتووک و گۆڤار ئەنجامداوە.
لە ساڵی 1975 وە دەستی بەکاری شێوەکاری کردووە بە ڕێبازی واقیعی و (ٳنطباعي) و تەعبیری کاری کردووە یەکەم پێشانگە و دووەم پێشانگەی تایبەتیی خۆی ساڵی 1979 و 1980 لە شاروچکەی چوارتا کردووەتەوە هەشت پێشانگەی تایبەت و چەندین پێشانگەی هاوبەشی لەگەڵ هونەرمەندانی سلێمانی و کوردستان کردووەتەوە، وبەرگ و مۆتیفی بۆ دەیان پەرتووک و دیوانی هۆنراوەی شاعیران و گۆڤارەکان ئەنجامداوە و لە بواری کاریکاتێریشدا هەوڵی خۆی داوە چەندین کاریکاتیری سیاسی و کۆمەڵایەتی بۆ زۆر گۆڤار و ڕۆژنامە درووستکردووە بەتایبەت ڕۆژنامەی ڕێبازی ئازادی، ڕاستی، گۆڤاری دەنگی لاوان، ڕۆژنامەی خەرمان و چەندینی دیکە.
لە بواری ئەدەبیشدا دەستەوەستان نەوەستاوە لە ساڵی1980وە بەردەوام لە گۆڤار و ڕۆژنامەکاندا بابەتی ئەدەبی تایبەت بەکۆمەڵایەتی، هونەری، ئەدەبی و ڕۆشنبیری، زانستی، گەردوونی، هۆنراوە، هتد..بڵاوکردووەتەوە کە زیاتر لە 200 بابەت دەبێت و هاوبەشی کردووە لە ئامادەکرنی زیاتر لە 250 بەرنامەی کشتوکاڵی ڕادیۆیی لە ڕادیۆی دەنگی گەلی کوردستان کە بەرنامەیەکی هەفتانە بوو، زووربەی بابەتەکانی ئەو بەرنامەیە ئەم دەینووسی و ئامادەی دەکرد و هەموو بەرنامەیەکیش بەدەگی خۆی بە زمانی جوتیاران مەنەلۆجێکی تەنز ئامێزی پێشکەش دەکرد ئەو بەرنامەیە ڕێکخراوی جیهانی (FAO) سپۆنسەری دەکرد.
شەش پەرتووکی بە چاپ گەیاندووە کە زۆرترینیان وەرگێڕانن لە زمانی عەرەبییەوە لەوانە ڕۆمانی بەناوبانگی فەڕەنسی (ژنە نانفرۆشەکە، لاپە ڕەنادیارەکانی ژیانی تۆڵستۆی، ڕۆمانی چیرۆکی دووشاری نووسەری گەورەی ئینگلیز چارڵز دیکنز، ڕۆمانی مەملەکەتی دارستانی ڕەش کە نووسینی خۆیەتی، وەرگێڕانی دیوانێکی هۆنراوەی شاعیر عەلی مەعروف بەهرەوەردی بۆ سەر زمانی عەرەبی، وەرگێڕانی دیوانی هۆنراوەی ئازاد مامی بۆ زمانی عەرەبی، وەرگێڕانی دیوانێکی شاعیر عەبدولقادر سەعید بۆ زمانی عەرەبی کە ئامادەیە بۆ چاپ کردن، وەرگێڕانی دەیان پارچە هۆنراوەی شاعیرانی دیکە بۆ سەر زمانی عەرەبی یان لە عەرەبییەوە بۆ کوردی.
ئەندامی یەکێتی نووسەرانی کورد لقی سلێمانی بووە
ئەندامی سەندیکای هونەرمەندانی سلێمانی بووە
ئەندامی کۆمەڵەی کەلەپوور و فۆلکلۆری کورد بووە
ئەندامی دەستەی دامەزرێنەری ناوەندی ڕووناکبیری شارباژێڕ و ئەندامی دەستەی نووسەرانی گۆڤاری شارباژێڕ بووە
ساڵی 1980 ئەندام دەستەی سەرپەرشتی گۆڤاری دەنگی لاوان بووە کە 20 ژمارەی لە سلێمانی لێ دەرچووە
ڕۆڵی چالاکی هەبووە لە دەرچوواندنی ڕۆژنامەی خەرمان کە مانگانەیەکی جوتیاری و کشتوکاڵی بوو خوێندنگەی تەنفیزی یەکێتی جوتیارانی کوردستان لە ساڵانی 2000 بە دواوە دەریا دەکرد
هەموو ساڵێک ڕۆڵی بەرچاوی هەبووە لە سازدانی ئاهەنگی جەژنی نەورۆز لە شاری سلێمانی کە کۆمەڵەی کەلەپوور و فۆلکلۆری کورد لە گردی مامەیارە سازی دەکەن، دوابەرهەمی ئەدەبیشی ڕۆمانێکە لە سەردەمی کۆرۆنادا نووسراوە بەناوی ماڵی میرزا و دیلی جەنگ، کە بەداخەوە نووسەر بەهۆی نەخۆشییەوە نەیتوانی دوابەرهەمی خۆی بە چاپکراوی ببینێت بۆیە لە ڕۆژی چلەکەیدا بنەماڵەکەی توانییان بەچاپی بگەیەنن و بڵاوی بکەنەوە.
لە ڕێکەوتی #26-07-2020# کاتژمێر 10:00 ی سەرلە بەیانی دوای ململانەیەکی زۆر لەگەڵ نەخۆشی کۆرۆنا گیانی سپارد و بۆ هەتاهەتایە چاوانی لێکنا. [1]