دوایی پیشان دانی ئاستێکی بەرز لە پاڵەوانێتی گۆڕەپان و مەیدانی کچانی یانەکانی ئێراق و بەدەست هێنانی چەندین پلەی یەکەمی و شکاندنی ژمارەی پێوانەیی لە یارییەکانی دا و بە مەبەستی پاڵپشتی لە کیژە پاڵەوانەکانی یانەکەیان، ئێوارەی ڕۆژی هەینی #08-03-2024# و لە بەسەر کردنەوەیەکی مەیدانیدا، بەڕێز حاکم #مەحمود ئەحمەد موڕاد# جێگری سەرۆکی یانەی وەرزشی پێشمەرگە، دەستەی ڕاهێنەر و یاریزانانی تیمی گۆڕەپان و مەیدانی لەنێو هۆتێل پەرێژ بەسەر کردەوە.
لەو بەسەر کردنەوەیەدا و سەرەتا جێگری سەرۆکی یانە پیرۆزبایی لە سەرجەم یاریزانەکانیان کرد کە لە بەهێزترین پاڵەوانێتی ئێراق توانیویانە ئەنجامی بەرچاو بەدەست بهێنن و نازناوەکان مسۆگەر بکەن، هەروەک وتیشی ستایشی هەوڵە بەردەوامەکانی دەستەی ڕاهێنەرانتان دەکەم کە شەو و ڕۆژیان خستووەتە سەر یەک بۆ ئەو مەبەستە و دەیانەوێت ئێوەی یاریزانان لە ترۆپکی سەرکەوتن و لە لوتکەدابن و نازناوەکان بەدەست بهێنن.
لە درێژەی وتەکانیدا جێگری سەرۆکی یانە هەموو پاڵپشتییەکی بۆ تیمەکە و ڕاهێنەران دووپات کردەوە و وتی، یانەی پێشمەرگە گرنگی تەواو بەتەواوی یارییەکان دەدات و لەنێویاندا یاری گۆڕەپان و مەیدانە کە بۆ دوو دەیەیە نازناوەکان و قەڵغان و جامەکان لە یانەکەمان دانابڕێت و بوینەتە دووانەیەکی لە یەک دانەبڕاو هەر بۆیە بۆ ئەم پاڵەوانێتییەش دووپاتی دەکەمەوە و داواتان لێدەکەم کە لە دوا یارییەکانی دواڕۆژدا هەوڵی زیاتر و زیاتر بدەن و نازناو بهێننەوە بۆ یانەکەتان و شاری #سلێمانی# چونکە ئێوەن ڕەمزی یانەکەمان.
پاشان #نزار ئەکرەم# سەرپەرشتیار و ڕاهێنەری گشتی تیمی گۆڕەپان و مەیدان بە ناوی خۆی و ڕاهێنەرانی هاوکاری و سەرجەم کیژە یاریزانەکانەوە سوپاسی جێگری سەرۆکی یانەکەیانی کرد کە گرنگی تەواویان پێدەدات و ئەو پاڵپشتیانەشی بەرز نرخاند و دووپاتی کردەوە کە بووەتە نەریت لایان و وەک پێشمەرگەیەکی جەنگاوەر بۆ نازناوەکان جەنگاوەر دەبن .[1]