بەناوی خوای بەخشندەی میهرەبان
ئێمە وەک زانایانی ئایینی و پیاوانی ئایینی سەرجەم پێکهاتە ئایینیەکانی هەرێمی کوردستان، ئەمرۆ (17-08-2015) لە بارەگای مەکتەبی تەنفیزی یەکێتی زانایان کۆبووینەوە، هەموومان یەکدەنگ و هاوڕابووین کە هەرێمی کوردستان بە ڕەوشێکی خراپدا تێدەپەڕێت و، کۆمەڵێک گرفت و قەیرانی ئابووری و ئەمنی یەخەی وڵاتەکەمانی گرتووە، بەتایبەتی شەڕی نەگریسی تیرۆریستانی داعش،
بۆیە لەو کاتەی هێشتا مزگەوت و کەنیسەو پەرستگەکانی سەرجەم ئۆل و پێکهاتە ئاینیەکانی کوردستان لەژێر دەستی تیرۆریستان دانەو، بە هەزاران ژن و منداڵی کوردستان دەستبەسەرو بارمتەی بەر دەستی تیرۆریستانن، هێشتا چاوی دایکی شەهیدان فرمێسکی وشک نەبووە، سات بە سات پێشمەرگە قارەمانەکانمان لەبەر سەرمای زستان و گەرمای هاوین دیفاع لە کەرامەتمان دەکەن، بەتایبەتی هەمیشە بە چاوی پەناگەی ئارامی پێکەوەژیانی ئاینی و نەتەوەیی تەماشای کوردستانمان کردووە.
بۆیە لێرەوە وەکو زانایان و پیاوانی ئایینی سەرجەم پێکهاتە ئایینی و مەزەبیەکانی کوردستان داوا لە هەموو لایەک دەکەین بە زووترین کات کۆتایی بەم گرژی و قەیرانەی ئێستا بهێنن و، پێکەوە بە برایانەو بە گیانی لێکحاڵیبوون کۆتایی بەم دۆخە بێنن، بۆ ئەوەی لە ئاست خواستی خەڵک بن و، خەڵک چاوەڕوانی چاکبوونی بژێوی ژیان و دابینکردنی ئاسایش وئارامییە، بۆیە دروستکردنی قەیرانێکی تر خەڵک بەرەو نائومێدی دەبات، بە دڵنیاییەوە ئەوانەی هەر شلەژانێک لەم وڵاتە دروست دەکەن مێژوو ڕەحمیان پێ ناکات.
دووبارە خوازیارین بگەنە سازان و پێکەوە کۆتایی بەم ڕەوشە بهێنن.
زانایان و پیاوانی ئاینی سەرجەم پێکهاتە ئایینی و مەزەبیەکانی کوردستان
17-08-2015