خەندان- هەڤاڵ محەمەد
نرخی خۆراکە سەرەکییەکان لەهەرێمی کوردستان زیاتر لەدوو هەفتەیە بەڕێژەیەکی بەرچاو بەرزبووەتەوە، نرخی یەک تەن برنج زیاتر لە 500 دۆلار گرانبووە، سەرۆکی ژووری بازرگانی سلێمانی دەڵێت بەرزبوونەوەی نرخەکان پەیوەندی بە بازاڕە جیهانییەکانەوە هەیە.
بەپێی بەدواداچونێکی ماڵپەڕی خەندان دەرکەوتووە کە نرخی زۆربەی خۆراکەکان لە بازاڕەکانی هەرێمی کوردستان بەتایبەتی برنج بەڕێژەیەکی بەرچاو ڕوویان لەبەرزبوونەوە کردووە.
کۆڕه و چراخ یەکێک لەفرۆشیارەکانی ناو بازاڕی شاری سلێمانی بەخەندان-ی ڕاگەیاند، نرخی خواردەمەنییە لەبازاڕەکان بەشێوەیەکی گشتی بەرزبووەتەوە، بەتایبەتی نرخی خواردەمەنیە وشکەکان.
ئاماژەی بەوەشکرد، نرخی یەک کیس برنجی پێنج کیلۆی زیاتر لە هەزار و 500 دینار چووەتەسەری، یەک کیس برنجی 10 کیلۆی زیاتر لە دوو هەزار و 250 دینار چووەتەسەر نرخەکەی.
بەوتەی کۆڕەو، بەرزبوونەوەی هەندێک لەنرخەکان جیهانیه و پەیوەندی بەهەرێمەوە نییە، بەڵام بەرزبوونەوەی هەندێک نرخی دیکە پەیوەندی بەبازرگانەکانەوە هەیە کەنرخەکانیان بەرزکردووەتەوە.
بەرزبوونەوەی نرخی خۆراک لەهەرێمی کوردستان لەکاتێکدایە، هەرێمی کوردستان زیاتر لە سێ ساڵە لەقەیرانی داراییدایه و بەهۆیەوە توانای دارایی خەڵک سنورداربووە، بەتایبەتی موچەخۆران کە حکومەت هێشتا سیستەمی پاشەکەوتی موچە پەیڕه و دەکات.
سۆران غەفور سەرۆکی لیژنەی چاودێری بازرگانی لە قایمقامیەتی سلێمانی کە چاودێری نرخەکان دەکەن بەخەندانی ڕاگەیاند نرخەکان بەشێوەیەکی گشتی بەرزبووەتەوە بەڵام برنج زۆرترین بەرزبوونەوەی تۆمارکردووە لەبازاڕەکانی جیهاندا.
ئاماژەی بەوەشکرد، هەندێک نرخی سەوزە وەکو تەماتە بەهۆی مەراسیمەکانی 13 بەدەر لەئێران بەرزبووەتەوە، هەروەها نرخی خواردەمەنی وشکە بەرزبووەتەوە، بەڵام نرخی ئاردو زەیت بەهیچ شێوەیەک بەرزبوونەوەی بەخۆوە نەبینیوە.
سۆران غەفور وتیشی لیژنەی چاودێریکردنی نرخ ڕۆژانە چاودێری بازاڕ دەکات و نرخەکان بڵاودەکاتەوە هەر بازرگانێک نرخ بەرزبکاتەوە بەبێ هۆ ڕێکاری یاسایی دەگیرێتەبەر.
هەرێمی کوردستان بۆ پڕکردنەوەی پێداویستی ناوخۆیی خۆراک، پشت بە هاوردەکردنی خۆراک دەبەستێت لەدەرەوە، بەتایبەتی لە وڵاتانی دراوسێی وەکو تورکیاو ئێرانەوە.
یەکێک له و خۆراکە سەرەکیانە کە ڕۆژان بەسەدان تەنی لەدەرەوە هاوردەدەکرێت و خواستێکی زۆری لەسەرە برنجە، کە چەندین جۆری هەیە لە بازاڕەکانی هەرێمدا کە نرخەکانیان جیاوازە.
سیروان محەمەد سەرۆک ژووری بازرگانی سلێمانی بەخەندان-ی وت نرخی هەندێک پێداویستی بەرزبوونەوەی بەخۆوە بینیوە، بەتایبەت نرخی برنج لەجیهاندا بەرزبوونەوەی زۆری بەخۆوە بینیوە، هەر تەنێک 500 دۆلار چووەتەسەری.
ئاماژەی بەوەشکرد، نرخی برنج لەنرخی جیهانیدا بەڕێژەی لەسەدا 75 زیادیکردووە، هۆکارەکەشی زۆربونی خواستە لەسەرجەم وڵاتاندا، ئه و نرخەی کەئێستا لەبازاڕەکانی کوردستاندا هەیە پێدەچێت بەرزبوونەوەی زیاتر بەخۆوە ببینێت.
سەرۆکی ژوری بازرگانی سلێمانی باسی لەوەکرد، بەشێکی بەرزبوونەوەی نرخەکان لەئێستادا ئەوەیە کە وەرزی پێگەیشتنی برنج نییه و تاوەکو مانگی 10 برنج بەرهەمناهێنرێت، هەروەها لەهەریەکە لەوڵاتەکانی سعودیه و ئێران خواستی لەسەرە.
19-04-2017